Cerebro

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

O cerebro, celebro u cerviello ye l'organo d'a parti debantsuperior d'o encefalo y o centro supervisor d'o sistema niervoso central en toz os vertebratos. En bels invertebratos bi ha estructuras analogas como os "ganglios cerebrals". Bels animals como as medusas u as estrelas de mar tienen, d'atra man, un sistema niervoso descentralizato sin de cerebro, y atros, como as esponchas, no tienen denguna traza de sistema niervoso.

En a mayor parti d'os animals o cerebro se troba adintro d'a capeza; d'aquí o nombre d'encefalo (en griego, encefalon). En os vertebratos, o cerebro ye protechito por o cranio. A lo cerebro, tamién li se diz prosencefalo ya que ye a estructura mas recient en a escala evolutiva. As estructuras evolutivament anteriors se dicen metencefalo y mielencefalo y s'ocupan de funcions basicament reguladoras, como lo mantenimiento d'o ritmo respiratorio. As funcions intelectuals son reservatas a lo prosencefalo.

O cerebro puet estar muit complexo; l'humán tien alto u baixo 100 billons de neuronas, unitas cadaguna, a traviés de bellas 10.000 connexions sinapticas, que se materializan en unas prolongacions protoplasmicas ditas axons que tresportan trens de sinyals en forma de potencials d'acción a zonas distants d'o cerebro u d'a resta d'o cuerpo.

Controla y coordina o comportamiento, a homeostasi (funcions corporals como lo traquetiar d'o corazón, a presión sanguinia, o balance de fluidos y a temperatura corporal) y as funcions mentals (a emoción, a memoria, l'aprendizache, a cognición, a percepción y l'atención), amás de replegar os aparatos sensitivos primarios d'a vista, oyida, equilibrio, gusto y fato. Controla tamién a transición entre os estaus de suenio y vichilia, fundamental ta o funcionamiento correcto d'o cerebro ya que, por eixemplo, aprofeita o estau de suenio ta organizar a información adquirita mientres o estau de vichilia. Un insomnio porlongato produce malautía mental y, dica alucinacions. Cada estato cerebral ye asociato a unas determinatas ondas d'actividat.

Denominacions

A denominación de "cerebro" deriva d'o latín CEREBRUM y en aragonés se documenta en la traducción herediana d'"Historia contra los paganos" y en o "Libro d'el Trasoro":

et leuanta(n)dosse co(m)mo de cabo por fuyr otra uegada fue le dado vn colpe de vna maça sobre el cerebro dela cabeça et murio.^[1]

e es a si como aq(ue)l q(u)i duerme por q(ue) su seso es ligado en to(r)no su celebro por las bafores q(ue) puya(n) en su cabeça^[2]

Tamién ha existiu la denominación de cerviello:

por que entre las otras crueles et abhominables cosas assi de dezir como de oyr quelas dichas gentes fazian enlos catiuos que por ellos era(n) presos si era esta que q(u)ando les fazia menester de beuer tomaua(n) los caxcos delas cabeças d(e)los hombr(e)s seyendo haun sangrientos et suzios et plenos de cabellos et mal a limpiado el celebro o ceruiello delos medollos enlos concauamientos o foyos que son de dentro de los cuales assi caniname(n)t con deseyo et sin ningu(n)t error nin asco deturpados et enpegaçados husaua(n) como de uerdaderos vasos pora beuer alos cuales muyt cruel et terribleme(n)t auia(n) traspassados los corac[']ones con astas^[1]

estavan como si poco a fues muerto, al cual fue trobado un clau por medio del corazón muy gran et otro por el cerviello de polso a polso e otro en la fruent^[3]