Comportamiento

Iste articlo ye escrito con as normas graficas EFA. Si quiers, puez aduyar cambiando a la grafía oficial de Biquipedia y sacando dimpués ista plantilla.

O comportamiento u conducta ye una acción u reacción d'un subchecto debant d'o suyo entorno, o conchunto d'actividatz que fa un animal ta relacionar-se con o medio ambient. Muitos d'os comportamientos son comuns a la mayoría d'individuos d'una especie.

Tradicionalment s'ha dito que os animals son os sers que tienen comportamiento, encara que bells vechetals fan movimientos que pueden estar caracterizatos como "comportamiento". Por extensión, o termin puet aplicar-se a totz os sers vivos.

Un comportamiento puet estar voluntario u no, innato u adquirito por medio d'a socialización. Prencipia con a presencia d'estimulos como por eixemplo cambeos a lo suyo arredol, variacions en o medio interno u l'actitut d'os atros sers vivos. Pende de l'acción d'o sistema niervoso y d'o sistema endocrino y quanto más complexos son istos, más variedat de comportamientos presenta a especie en qüestión. As disciplinas scientificas que estudian a conducta son a Etolochía ta os sers vivos en cheneral y, en o caso d'os humans, a Psicolochía.

Tipos de comportamiento

• Innatos: Son os que se tienen dende o naiximiento y no s'han d'aprender.
• Adquiestos: Son os que reproducen un aprendizache. S'han de practicar dica que un estimulo desencadene siempre a mesma respuesta.

O comportamiento humán se puet veyer condicionato por a chenetica (os instintos sobretot), a educación recibita, a moral u a situación a on que actua. O ser humán chuzga siempre tot comportamiento dende d'un punto d'anvista etico, a diferencia d'atros animals, y por ixo considera as conductas como aceptables u no seguntes as normas d'a suya cultura.