Abrir menú principal
Acropoli de Cabezo d'Alcalá

Lo Cabezo d'Alcalá ye un important chacimiento arqueolochico que se troba en lo termin municipal de Zaila (Baixo Martín, Teruel, Aragón) que ha proporcionato muitos repuis, porque se i han feito excavacions dende fins de lo sieglo XIX.[1] Las troballas s'escalonan dende la I Edat de Fierro dica la época de Chulio César. La estratigrafía ha dato 3 libels: Campos d'Urnas tardanos (I Edat de Fierro), cultura iberica (II Edat de Fierro) y ciudat ibero-romana.

Se crei que lo libel iber corresponde con lo toponimo conoixito por atras fuents (monedas por eixemplo) Sedeis, Sedeiskem, capital de los ibers sedetans. Manimenos Miguel Beltrán Lloris crei que corresponde con Beligion.

La ciudat ibero-romana ye la que ha dato més información. Paradochicament las inscripcions en alfabeto iberico son de lo libel ibero-román. Tamién ye paradochico trobar-se palabras celtas como belenos; esto s'interpreta como que la cultura iberica s'estendió por la val de l'Ebro sobre un sustrato cultural indoeuropeu de la I Edat de Fierro. Bi ha un templo on se troboron estatuas de bronze: un toro con una roseta hexapetala en la frent y repuis d'atra que yera un ombre con un caballo.

Se crei que atacoron la ciudat ibero-romana en una guerra civil romana (bells investigadors creyen que en las Guerras Sertorianas, 72 aC-76 aC), pero bi'n ha beluns creyen que estió más tarde, en lo 49 aC. Cosa curiosa ye que pa puyar ta la ciudat calió fer una rampa como la que se fació en Masada (Israel). La rampa enrunó un tumulo de la I Edat de Fierro que s'ha reconstruito como simbolo en una curva de la carretera que pasa por lo lugar. Dezaga la guerra la ciudat no se reconstruyó, porque no feba falta un lugar fortificato pa articular lo territorio (y en la zona creixió la ciudat romana de Lepida Celsa en un puesto millor comunicato y más plan, on huei son Exelsa y Viliella d'Ebro).

ReferenciasEditar

  1. P. Gil, 1885-1890; J. Cabré y Pérez Temprado, 1919-1935 y 1940-1942; Universidat de Zaragoza, 1964; M. Beltrán, dende 1971