Iste articlo tracta sobre colla como grupo de personas. Pa atros usos de colla se veiga Colla (desambigación).

Una colla (d'o latín < COPULA)[1] ye un grupo de personas[2][3] que son chuntas deliberadament pa acometer bell obchectivo u porque tienen una finalidat;[4] por eixemplo, una colla de navaters, una colla de bailes (chent que s'aplega pa bailar), una colla d'excursionistas u simplament una colla d'amigos.

Una colla de Boy Scouts.
Y si nunca les brinca bela colla de lladres [...] y les gazupian las bestias?[2]
-Les ne puedo decir a os d'a colla nuestra?
-A Carlos no, que le sabrá malo.

En un sentiu mas amplo, una colla puet estar qualsiquier grupo mas u menos casual de personas.

Vaya colla de críos que ny'i hai astí abaixo![5]
La colla de chent enfila el camín de la Ribera.[2]

Manimenos, no s'ha de pensar que sía un sinonimo pleno de grupo, porque a parola grupo tamién s'emplega en aragonés y tiene atras accepcions que colla no tiene, en especial quan no s'aplica a personas u pa definir conceptos scientificos (grupo filochenetico, grupo d'os alcalinoterrios, etc), por meter-ne dos eixemplos.

Entre que se feban os diferents intentos de creyar un estándar pa l'aragonés, s'ha fabricau por fuerza bells terminos a partir d'a parola colla, como o verbo «acollar» querendo dicir «agrupar». En realidat, o verbo acollar existe, dimana de cuello,[6] no pas de colla, y significa meter dos abríos chuntos (chunir) con un chubo u con colleras.[6]

ReferenciasEditar

  1. (es) Santiago Bal Palazios:Vocabulario dialectal del habla de Maella (Aragón), Gubierno d'Aragón, 2000, ISBN 84-7753-840-9, p.79
  2. 2,0 2,1 2,2 (es) BLAS GABARDA, Fernando y ROMANOS HERNANDO, Fernando, Diccionario Aragonés: Chistabín-Castellano; Gara d'Edizions. Zaragoza, 2008. ISBN 978-84-8094-061-0
  3. (es) LOZANO SIERRA, Chabier, Aspectos Lingüísticos de Tella. Aragonés de Sobrarbe (Huesca); Gara d'Edizions. Zaragoza, 2010. ISBN 978-84-8094-062-7
  4. (ca) Dentrada colla en o DIEC, consultada o 4 de chunio de 2017.
  5. (es) ARNAL PURROY, Mª Luisa, Diccionario del habla de la Baja Ribagorza Occidental -Huesca-; Gara d'Edizions. Zaragoza, 2003. ISBN 84-8094-052-2
  6. 6,0 6,1 (es) MOTT, Brian L.. Diccionario etimológico chistabino-castellano castellano-chistabino. Institución «Fernando el Católico». Zaragoza, 2000. ISBN 84-7820-553-5

Se veiga tamiénEditar