Alfredo Boné Pueyo
| Alfredo Boné Pueyo | |
|---|---|
| 4 d'aviento de 2002 – 16 de chulio de 2011 | |
| President | Marcelino Iglesias Ricou |
| Gubierno | Primer Gubierno Iglesias Segundo Gubierno Iglesias Tercer Gubierno Iglesias |
| Precediu por | Víctor Longás Vilellas |
| Succediu por | Federico García López (Agricultura, Ganadería y Medio Ambient) |
| 20 de chunio de 2003 – 17 de chunio de 2015 | |
| Naiximiento | 12 de chinero de 1955 Torrelconte, Aragón
|
| Partiu | Partido Aragonés |
| Profesión | Politico |
| Alma Máter | Universidat de Zaragoza Universidat Politecnica de Madrit |
Alfredo Valeriano Boné Pueyo (Torrelconte, Matarranya, 12 de chinero de 1955) ye un politico aragonés. Ha estau deputau en as Corz d'Aragón por Zaragoza entre 2003 a 2015, y portavoz d'o Grupo Parlamentario d'o Partido Aragonés (PAR) en a legislatura 2011-2015. En o PAR ha desempenyau responsabilidaz organicas, como vicepresident,[1] adchunto a o president, secretaire cheneral y secretaire de comunicación.
Biografía
editarNaixió o 12 de chinero de 1955 de Torrelconte (Teruel). Ye doctor en Ciencias de l'Actividad Fisica y d'o Esporte por a Universidat de Zaragoza y licenciau en Educación Fisica por a Universidat Politecnica de Madrit. Estió numero uno en a primera oposición de profesors agregaus de bachillerato d'Educación Fisica. Ye profesor d'Ensenyanza Segundaria en excedencia y profesor titular en a Facultat d'Educación d'a Universidat de Zaragoza, a on ha dirichiu cuantas tesis doctorals. Ha dirichiu y coordinau cuantos prochectos d'investigación en l'Instituto de Ciencias d'a Educación[2] sobre educación fisica y esporte. Estió asesor cientifico de l'I.C.E.F. y d'o Consello Superior d'Esportes.
Amás, ha organizau y feito parti d'a-saber-los cursos, seminarios y congresos. Autor y coordinador de cuantas publicacions sobre ciencia de l'actividad fisica y sobre chestión publica (sobre politica territorial y administrativa, concertación en a chestión de l'augua y experiencias pioneras en a chestión d'o medio ambient).
En a suya trachectoria profesional en l'Administración estió director d'o Secretariau d'Actividaz Fisico-Esportivas d'a Universidat de Zaragoza, estando dimpués nombrau director cheneral d'Esportes d'o Gubierno d'Aragón. En o gubierno aragonés, desempenyó posteriorment os cargos de director cheneral de Servicios Agrarios; director cheneral de Servicios Agroambientals; director cheneral d'Administración Local y Politica Territorial en o Departamento de Presidencia y Relacions Institucionals (dende a on metió en marcha o proceso de comarcalización d'Aragón) y secretaire cheneral tecnico d'o Departamento d'Agricultura y Medio Ambient, asinas como president d'Aramón.
Estió consellero de Medio Ambient d'o Gubierno d'Aragón dende aviento de 2002 dica chulio de 2011, dende a on empentó belún d'os plans de depuración más ambiciosos d'Europa, mereixedors de distincions, como os Global Water Awards[3] y que fuoron obchecto d'analís por parti d'a OCDE pa a suya aplicación en atros países. Tamién estió president d'o Patronato d'Ordesa y Tres Serols,[4] secretaire cheneral d'a Conferencia de Rechions d'Europa sobre Medio Ambient (ENCORE) y copresident d'a Network of Regional Governments for Sustainable Development.[5]
En marzo de 2015 anunció que ya no concorrería en denguna lista electoral,[6] y dimpués d'as eleccions autonomicas de 2015 se retiró d'a vida politica. Dende alavez, ha empentau cuantos prochectos empresarials d'asesoramiento y consultoría medioambiental y de sostenibilidat social. Entre o suyos clients, colaboró con Forestalia en os primers anyos d'existencia d'ista empresa d'enerchías renovables, d'a que se desligó en 2019 por discrepancias sobre cuantos desarrollos proposaus por a empresa en o Mayestrato, territorio en o que heba empentau cuantas feguras de protección ambiental en a suya etapa de consellero de Medio Ambient.
Vinclos externos
editar- (es) Blog Personal
Referencias
editar- ↑ (es) Biel, Boné y Aliaga, los tres primeros de la nueva Ejecutiva del PAR
- ↑ (es) Instituto de Ciencias de la Educación
- ↑ (es) Los Global Water Awards premian al Plan Especial de Depuración de Aragón
- ↑ (es) Boné, nuevo presidente del parque de Ordesa
- ↑ (es) Alfredo Boné, elegido copresidente de la mayor red mundial de Gobiernos Regionales para el Desarrollo Sostenible
- ↑ (es) Boné no concurrirá en ninguna lista electoral. Aragondigital.es. 18 de marzo de 2015
| Predecesor: Víctor Longás Vilellas |
Consellero de Medio Ambient d'o Gubierno d'Aragón 4 d'aviento de 2002 - 16 de chulio de 2011 |
Succesor: Federico García López (Agricultura, Ganadería y Medio Ambient) |
Datos: Q16145503
