Tomás Castellano Villarroya

Tomás Castellano Villarroya
Menistro d'Ultramar
1895 – 1897
Monarca	Alifonso XIII d'Espanya
Primer menistro	Antonio Cánovas del Castillo
Precedito por	Buenaventura Abarzuza Ferrer
Succedito por	Segismundo Moret y Prendergast
Menistro d'Hicienda
16 d'aviento de 1904 – 27 de chinero de 1905
Monarca	Alifonso XIII d'Espanya
Primer menistro	Marcelo Azcárraga
Precedito por	Guillermo de Osma y Scull
Succedito por	Antonio García Alix
Gubernador d'o Banco d'Espanya
aviento de 1903 – aviento de 1904
Precedito por	José Sánchez Guerra y Martínez
Succedito por	Manuel Allendesalazar
Naiximiento	5 de mayo de 1850 Zaragoza (comarca de Zaragoza, Aragón)
Muerte	11 de chunio de 1906 Madrit (Espanya)
Partito	Partido Conservador
Profesión	Interpresario

Tomás Castellano Villarroya, naixito de Zaragoza (comarca de Zaragoza) o 5 de mayo de 1850 y muerto en Madrit (Espanya) l'11 de chunio de 1906, estió un politico y interpresario aragonés, melitant d'o Partido Conservador, que mientres a suya carrera politica plegó en os cargos de Menistro d'Ultramar (1895-1897) y Menistro d'Hicienda (16 d'aviento de 1904-27 de chinero de 1905).

Mientres os alazetz d'a suya carrera estió vinclato a la comarca d'as Cinco Villas, estando esleito deputato en a Deputación Provincial de Zaragoza en 1878 y 1879 por o partito chudicial d'Exeya d'os Caballers, encara que dimpués (y dica a suya muerte, en una succesión de tretze lechislaturas) n'estió por o districto de Borcha-Zaragoza. Sindembargo, continó con a suya vinculación cincovillesa a traviés d'a suya familia eixeyana y d'as amistatz que teneba en Taust entre os ricos propietarios d'a villa.

Con a familia Castellano d'Exeya yera propietario en Zaragoza d'a banca Villarroya y Castellano, establita dende primerías d'o sieglo XIX, y que estió l'alazet d'o posterior Banco Zaragozano. Tamién yera propietario d'o Diario de Zaragoza, o portavoz d'as ideyas conservadoras en Zaragoza y cabecera decana d'a prensa d'Aragón.

Quan lo nombroron menistro d'Ultramar, fació quantos nombramientos de cargos publicos en as colonias d'Espanya entre os suyos familiars y amigos. Por a suya chestión en temas economicos colonials, lo nombroron en 1903-1904 gubernador d'o Banco d'Espanya, esdevenindo posteriorment menistro d'Hicienda.

En a suya faceta como interpresario, estió tamién muit vinclato a la construcción d'entibos en Aragón, estando president d'a chunta d'o entibo d'a Penya, d'o entibo de Mezalocha y d'o entibo de Sant Bertolomeu, iste zaguer en o río Arba de Luesia en o termin d'Exeya d'os Caballers.

Vinclos externos

• (es) Tomás Castellano Villarroya en a Gran Enciclopedia Aragonesa.