Abrir menú principal

As selvas mixtas submediterranias son agrupacions forestals dominatas por diferents combinacions d'especies caducifolias (tipicament cerolleras, acirons, freixeras, cornicabra, caixicos), que se troban en as sierras costeras de l'este d'a peninsula iberica: sierras d'Aitana, Aixorta, Puertos de Bezeit, Mayestrato, Espadán, Alcoi, Sierras de Cazorla y Magina, Sierra Nevada y dica os Monts de Toledo. Se troban en fondons, pacos, y en zonas de suelos con alta capacidat de retención d'augua. Huei ocupan redueitas extensions, sustituitas por hortals, y matullars caducifolios, (artetas).

As formacions més termofilas corresponden a la freixera Fraxinus ornus, a Pistacia terebintus u a la cerollera Sorbus domestica. As selvas d'a freixera Fraxinus ornus se troban en as sierras alicantinas como a Sierra del Arc, con presencia d'a palmacia Chamaerops humilis.

As formacións de tipo microtermo corresponden a l'acirón Acer granatense, Quercus pyrenaica y Sorbus aria. Eixemplo de selva mixta submediterrania d'este caracter ye a defesa de Camarate (costera norte de Sierra Nevada), con Acer granatense, Quercus pyrenaica, Quercus faginea, Crataegus monogyna, Sorbus ssp, ecetra y dica abetullos Betula pendula fontqueri.

En os pisos bioclimaticos supramediterranios y oromediterranios dende as Serranías Beticas dica o Mayestrato ye posible trobar agrupacions de cinco u seis especies.

As situacions d'alta pendient, de substrato rocoso poco favorable y/u falta de suelo por degradación d'orichen antropico pueden conducir a una mesma especie, la menos desichent, como ye o caso d'a senera. Os senerals se troban a sobén en as Serranías de Cuenca, en Gúdar, o Mayestrato, destacando os senerals d'Aliaga. En un grau mayor de condicions naturals desfavorables u de degradación d'orichen antropico tenemos formacions de matullos caducifolios con punchas d'os cheners Rosa, Crataegus, Rubus y Rhamnus, a segunda y quarta conoixitas como artos en aragonés, nombre que tamién s'ha aplicato esporadicament a la galabardera.

BibliografíaEditar

  • Emilio Blanco Castro et al. LOS BOSQUES IBERICOS UNA INTERPRETACION GEOBOTANICA. Editorial Planeta