Betula
|
Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla. |
| Betula | ||||||||||||||
 Betula pendula | ||||||||||||||
| ||||||||||||||
Os abetullos[1] (d'o latín <ABETŪLLA) u abetoches/as[2] (posiblement, con a mesma etimolochía) son un chenero d'árbols de fuella caduca en a familia Betulaceae, conoixitos cientificament como Betula. O nombre latín «betūlla» u «abetūlla» pareix que demana d'una radiz celtica «betu», que ya gosaba significar abetullo en tiempos prerromans.
Os abetullos fan fuellas simples, con una forma caracteristicament romboidal, d'entre 3 e 6 cm de lonchitut per alto u baixo 2/3 d'amplo, con variacions per a especie. A crosta ye caracteristicament clara, grisa blanquinyosa. As flors, como en totas as Betulaceae, hi brostan fendo amentos masculins o femenins diferents, anque se troban toz en o mesmo árbol. Estes árbols gosan creixer dica fer d'entre 10 e 30 metros d'altaria.
As especies de Betula se troban per tot l'hemisferio norte, en Europa son omnipresents en os climas menimament humidos (fendo albarosas só que en as zonas de montanya en l'aria mediterrania) anque en Rusia y Escandinavia gosan formar grans extensions selvosas. En Nordamerica y Asia tamién son muit frecuents, pero en o norte d'Africa, per estar tan xuco lo clima suyo, tansament se i troban cualcuns. En os Pireneus espanyols, as albarosas mes grans se troban en Ribagorza y lo Pallars.
O nombre vernaclo «abetoch» pareix que ye exclusivo d'a Chacetania, documentable seguntes R. Vidaller en as localidaz d'Echo, Chasa y Aragüés de lo Puerto.[2] En a vecina val d'Ansó se i conoix tamién a forma femenina «abetocha»,[2] que coexiste con betocha y bitocha[3]. A forma «albar» que ye como se siente decir en a mes gran parte de puestos per l'Alto Aragón oriental[2] no fa referencia exclusiva a las especies Betula, sino que s'aplica a toz os árbols (encluitos barrazeras, albernices, tremoletas, poplos, ecetra) que manifiestan cualques caracteristicas fisicas en común, como de tener a crosta blanca (en latín, «alba») u de creixer en puestos humidos.
Vinclos externos
editar
Wikispecies tiene un articlo sobre Betula.
Se veigan as imáchens de Commons sobre abetullos.
Referencias
editar- ↑ CARRASCO CANTOS, Pilar; Área actual del mantenimiento de las consonantes oclusivas. Archivo de Filología Aragonesa, Nº XLI.
- ↑ 2,0 2,1 2,2 2,3 (an) VIDALLER TRICAS, Rafael; O Libro d'as Matas y os Animals; Dizionario aragonés d'espezies animals y bechetals; Ed. Bal de Onsera. Zaragoza, 2004. ISBN 978-84-89862-35-7
- ↑ (es) Miguel Ánchel Barcos, El Aragonés Ansotano: estudio lingüístico de Ansó y Fago; Gara d'Edizions. Zaragoza, 2007, p 163.ISBN 978-84-8094-058-0
