Planas de Canterbury

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

As planas de Canterbury (en anglés Canterbury Plains) son una rechión natural de Nueva Zelanda situada a o sud d'a ciudat de Christchurch, en a rechión de Canterbury. O suyo extremo norte plega dica o semontano de Hundalee Hills en o districto de Hurunui, y a o sud se chuntan con as planas d'Otago Septentrional a l'atro canto d'o río Waitaki.

Cheografía

Situación d'as planas de Canterbury

As planas de Canterbury se formoron a partir d'os sedimentos d'una morrena d'o cuaternario depositaus mientres os periodos glacials d'o Pleistoceno tardano, alto u baixo fa entre 3 millons d'anyos y 10.000 anyos.^[1] Dimpués as gleras situadas en ista plana aluvial fuoron erosionadas por cuantos grans ríos, mas que mas o Waimakariri, o Rakaia, o Selwyn y o Rangitata. Parti d'as tierras perteneixients a os praus de Canterbury-Otago son adecuadas ta un uso agricola moderadament intensivo, encara que ye un terreno propenso a las sequeras, mas que mas cuan bi ha vientos d'o norueste. En ixas ocasions, o fenomeno atmosferico conoixiu como Nor'west arch (literalment en anglés Arco d'o norueste) gosa dar-se en as planas.

Un gran tierratremo o 4 de setiembre de 2010 en ista zona, reveló una falla, desconoixida dica alavez, baixo as planas de Canterbury, que creyó crepazas y eslices.^[2]

Ríos

Os ríos d'as planas de Canterbury tienen unos caracteristicos cauces anastomosaus, que diferencia ista zona d'as planas d'Otago Septentrional a o sud, dillá d'o Waitaki, a on os ríos tienen cauces mas estritos, conformaus y amugaus.

Población

A mayoría d'a población de Canterbury vive en una serie de ciudaz grans y chicotas espardidas por todas as planas y conectadas por a carretera estatal numero 1 y a prencipal linia de ferrocarril d'o sud d'o país. Entre as prencipals ciudaz s'incluyen Christchurch, Ashburton y Timaru y entre as chicotas Kaiapoi, Dunsandel, Rakaia, Temuka y Glenavy. Atras localidaz d'as planas son Rangiora, Leeston, Lincoln, Darfield, Geraldine, Methven y Waimate.

Fauna

A extremadament rara especie de Curculionidae, o Hadramphus tuberculatus, ye endemica d'as planas.

Referencias

↑ (en) Gage, M., (1969), 'Rocks and Landscape', in The Natural History of Canterbury, edited by Knox, G. A., Canterbury Branch of the Royal Society of New Zealand, A H & A W Reed, Wellington, page 35.
↑ (en) Fault awakens after 16,000 years of inactivity.Paul Gorman. The Press Christchurch. 7 de setiembre de 2010

Datos: Q1033781
Multimedia: Canterbury Plains / Q1033781

[1] (en) Gage, M., (1969), 'Rocks and Landscape', in The Natural History of Canterbury, edited by Knox, G. A., Canterbury Branch of the Royal Society of New Zealand, A H & A W Reed, Wellington, page 35.

[2] (en) Fault awakens after 16,000 years of inactivity.Paul Gorman. The Press Christchurch. 7 de setiembre de 2010

[1]

[2]