Christchurch
![]() |
Iste articlo ye escrito con as normas graficas EFA. Si quiers, puez aduyar cambiando a la grafía oficial de Biquipedia y sacando dimpués ista plantilla. |
Christchurch (maorí Ōtautahi) ye a ciudat mas gran d'a Isla d'o Sud de Nueva Zelanda y a capital d'a rechión de Canterbury. L'aria urbana de Christchurch se troba situada en a costa este d'a Isla d'o Sud, chusto a o norte d'a peninsula de Banks. A suya población ye de bells 375.000, lo que la fa a tercera ciudat mas gran de Nueva Zelanda por dezaga d'Auckland y Wellington.
Christchurch Ōtautahi | |||
Localidat de Nueva Zelanda | |||
| |||
Estau • Rechión • Autoridat territorial |
![]() Canterbury Christchurch City Council | ||
Superficie | 1.426 km² | ||
Población • Total • Densidat |
358062 hab. (2018) 260 hab/km² | ||
Altaria • Meyana |
20 m. | ||
Codigo postal | 8011, 8013, 8014, 8022, 8023, 8024, 8025, 8041, 8042, 8051, 8052, 8053, 8061, 8062, 8081, 8082, 8083 | ||
Coordenadas | | ||
Web oficial |
A ciudat fue nombrada por a Canterbury Association, que establió a provincia de Canterbury. O nombre de Christchurchfue trigau en a primera reunión de l'asociación o 27 de marzo de 1848. Estió una sucherencia de John Robert Godley, qui heba alumno d'o colechió de Christ Church en Oxford. Christchurch se convirtió en ciudat por Carta Reyal d'o 31 de chulio de 1856, estando asinas oficialment a ciudat mas antiga establida en Nueva Zelanda.
O río Avon fluye por o centro d'a ciudat, con un parque urbán a o largo d'os suyos cantos. A requesta d'os chirmans Deans, o río recibió o mesmo nombre que o río Avon en Escocia, que naixe en os tozals d'Ayrshire amán d'an yera a grancha d'o suyo lolo.[1]
O nombre maorí mas habitual ta Christchurch ye Ōtautahi ("o puesto de Tautahi"), estando orichinalment iste o nombre d'un puesto especifico chunto a o río Avon amán de l'actual carrera Kilmore y a estación central de bomberos de Christchurch. Iste yera un puesto de vivienda temporal de Te Potiki Tautahi, chefe d'os Ngāi Tahu, que tenia a suya vivienda oficial en Port Levy, en a peninsula de Banks. O nombre Ōtautahi fue adoptau en a decada de 1930. Antis d'isto os Ngāi Tahu feban referencia por un regular a l'aria de Christchurch como Karaitiana,[2] una transliteración d'a palabra anglesa Christian.
A ciudat sufrió una serie d'importants tierratremos entre setiembre de 2010 y primerías de 2012, estando o pior d'ells o que acayeció chusto dimpués de meyodía d'o 22 de febrero de 2011, en o qualo 185 personas murioron y cientos d'edificios por toda a ciudat s'espaldoron u estioron estricallaus. Dica zaguerías de 2013 s'habioron d'espaldar en total bells 1500 edificios en a ciudat, prencipiando asinas un prochecto ta a suya recuperación y reconstrucción.
CheografíaEditar
Christchurch se troba situada en Canterbury, amán d'o centro d'a costa este d'a Isla d'o Sud, a l'este d'as Planas de Canterbury. Ye localizada amán de l'extremo sud d'a badía de Pegasus y ye rodiada por l'este por l'Ocián Pacifico y o estuario d'os ríos Avon y Heathcote. Por o sud y o sudeste una parti urbana d'a ciudat muga con as faldas volcanicas de Port Hills que la desepara d'a peninsula de Banks. En 2006, a peninsula de Banks fue incorporada o municipio, triplicando asinas l'aria d'iste,[3] encara que adhibindo nomás 8.000 personas a la población d'a ciudat. A o norte a ciudat muga con o río Waimakariri.
Christchurch ye un d'os ueito pars de ciudatz en o mundo que tien una ciudat exactament u muit amán d'as suyas antipodas. A metat d'istos pars de ciudatz antipodals se troban en Nueva Zelanda y Espanya/Marruecos, estando concretament A Coruña a ciudat situada en as antipodas de Christchurch.
A ciudat de Christchurch ye una d'as quatre unicas d'o mundo que ha estau cuidadosament planificada seguindo o mesmo esquema d'una plaza central prencipal, quatre plazas complementarias rodiando a la primera y una zona de parque arredol d'o centro d'a ciudat. A primera ciudat que se construyió baixo iste patrón estió Filadelfia, dimpués Savannah y Adelaida antis que Christchurch.
Christchurch tien un d'os sistemas d'abastecimiento d'augua de mayor calidat d'o mundo, estando a suya augua entre as mas puras y limpias d'a planeta.[4] Sin tractar y filtrada naturalment, l'augua se quita a traviés de mas de 50 estacions de bombeyo por toda a ciudat, d'aqüifers que emanan a os pietz d'os Alpes d'o Sud.[5]
Se veiga tamiénEditar
ReferenciasEditar
- ↑ (en) A History of Canterbury, Vol. 1 – Sir James Hight & Straubel, C.R.; Canterbury Centennial Association and Whitcombe and Tombs, Christchurch 1957, Page 121
- ↑ Ōtautahi (from the Christchurch City Library website)
- ↑ (en) [1] (en) BanksPeninsula. 11 d'abril de 2008
- ↑ (en) "Community Outcomes Baseline Report". Christchurch City Council. 4 de septiembre de 2010. http://www.ccc.govt.nz/LTCCP/CommunityOutcomes/BaselineReport/Environment/.
- ↑ (en) "Where our water comes from". Christchurch City Council. 4 de septiembre de 2010. http://www.ccc.govt.nz/homeliving/watersupply/ourwater/whereourwatercomesfrom.aspx.
Vinclos externosEditar
- Se veigan as imachens de Commons sobre Christchurch.