Pelletería

(Reendrezau dende Pellicer)
Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

A pelletería ye la industria que s'adedica a la elaboración d'indumentarias a partir d'as piels y cuers d'animals. Se tracta d'una d'as tecnolochías mas antigas que sen conoix, posiblement practicada dende a prehistoria, y tamién posiblement a forma mas antiga d'elaboración de vestuaches.

Pelleter canadenco en as zaguerías d'o sieglo XIX.

Mientres que o cuer, especialment o que s'estrai d'o bestiar ye en l'actualidat un articlo muit emplegato en a vestimenta occidental, a popularidat d'as prendas de piel ha sufierto una mingua important en os zaguers anyos. A cuenta tan fina que requiere tan en a suya confección como en l'uso que se'n fa d'as prendas son feitos que se considerás tradicionalment un articlo de luxo. Cualques prendas, como las que son feitas d'erminios, son estadas simbolicas d'o vestuache reyal de bellas culturas. O movimiento ecolochista ha gosato luitar contra l'emplego de piels, afirmando que ye una practica crudel y inhumana, y que la cazata indescriminata per as piels y las plumas ye portiatas numerosas especies enta amanar-se a la estinción, d'entre ellas cualques felins, focas y numerosos mustelidos.

En l'Alto Aragón, a persona que s'adedica profesionalment a la pelletería se i diz pelleter/o, anque per o poco costumbre de fer lucir piels de salvachinas a presencia d'esta industria en as comarcas pirenencas d'Aragón se yera tradicionalment asociata con a figura d'os compradors d'ixes materials mes que no con os artesanos que n'elaboraban as prendas, estando cuasi siempre compradors foranos (d'a «Tierra Plana» u Francia) que les ne compraban a os pobladors ta lievar-se-las dimpués ta os suyos lugars de procedencia. A cazata d'especies silvestres ta vender-ne os pellizos (piels que encara no son treballatas) heba estata un complemento economico ta os pobladors d'as comarcas montanyesas, habendo-se feito per muitas cheneracions y siempre a escala muit redueita y pormenorizata, sin que b'haigan existito nunca cazataires especializatos como sí que heba pasato en altros puestos d'o mundo.

En as montanyas de Uesca, o procedimiento mes común yera de cazar os animals (en muitos causos, especies perchudiciosas ta l'agricultura, ganadería u l'apicultura) con trampas (chuelos, lazos y cepos), matando-se-ie siempre animals a nivel individual, espellizando-los dimpuesas en a casa y aprobeitando-ne a sobén tamién a carne ta consumo familiar. As piels s'ixecaban en a falsa y s'acumulaban dica las ferias de bestiar u altros acontecimientos en os que os pelleters (comerciants) se i deixaban veyer, comportiando ansinas un tanso complemento economico ta l'habitant d'os lugars pirenencos.

En altras comarcas d'Aragón que no teneban tantas especies cazables de piel fina, como pasaba en a valle d'Ebro, b'existiba l'oficio de pellicer/o u pellizoner/o, que diz que yera lo qui compraba os pellizos d'animals domesticos de consumo (vetiellos, crabas, ecetra.) pasando per as casas. A destinación d'ixes pellizos, a la contra que en as especies salvaches, yera sobretot a fabricación de cuer.

Se veiga tamién editar

Vinclos externos editar