Abrir menú principal
Pellizo d'un cerval iberico.

Un pellizo (d'o latín <*PELLICIU, «relativo a la piel» u «feito de piel») ye a piel d'un animal, cheneralment un mamifero, extraida de forma mas u menos entera. Reciben iste nombre tanto as piezas de piel d'animals domesticos como salvaches.

Os pellizos son una important materia prima ta la confección de cuero y atros derivaus de piel. Pueden curtir-se, pelar-se (sacando-le o pelo) ta transformar-se en piel, u simplament secar-se ta confeccionar con ellas a'l natural qualques prendas, como por exemplo determinaus abrigos. L'acción de quitar o pellizo d'o cuerpo d'un animal se diz «espellizar» u «espelletar».

Importancia historicaEditar

En Espanya, y en especial en zonas montanyesas con abundancia de selvas, como l'Alto Aragón, os pellizos d'animals salvaches que se capturaba con trampas u por cazada suposaban una fuent d'ingresos extra ta os habitants de muitas aldeyas y lugars, pus se podeban vender a uns comerciants especializaus, os pellicers u pellizoners, que dica meyaus d'o sieglo XX soleban viachar por os lugars y les ne pagaban en efectivo. Bells exemplos d'as especies que mas a sobén se cazaba ta iste manister, y as que millor se pagaba por lo finos que yeran os pellizos, son as fuinas, as rabosas u os taixudos.

A importancia d'iste comercio fue cabal en epocas de crisi, pus yera una d'as pocas vías de dentrada de diners en efectivo que teneban as familias, sobre tot en zonas caracterizadas por un fuerte caracter autarquico como lo Pireneu, a on que dica bien dentrau o sieglo viello as transaccions comercials se soleban satisfer como en una economía de trueque y a presencia de a divisa yera muito mas testimonial que en l'actualidat.

Iste tipo de transaccions se siguión desarrollando de forma legal dica os anyos 1970, quan apareixión leis succesivas de protección d'as salvachinas que contribuyón, en chunto con a despoblación d'os lugars d'a montanya, a'l declive d'o negocio. Manimenos, dica meyaus d'os anyos 1990 no yera raro que bells habitants d'aldeyas poco pobladas seguisen con ista forma de comercio en a clandestinidat, como complemento d'atras actividatz economicas que yeran a suya forma de vida, anque ya lievando personalment o resultau d'as suyas capturas dica bells establimientos en poblacions mas importants como as cabeceras d'as vals u as diferents capitals comarcals.

O perfeccionamiento legal y l'endurimiento d'as penas por capturar animals protechius y comerciar con ells ha contribuiu a que garra comercio s'arriesgue a traficar iste tipo de productos, y con ello ha conduciu a la práctica desaparición d'o furtivismo en l'Alto Aragón. Manimenos, o debate i contina estando present, pus no deixa d'estar una actividat economica que s'ha desarrollau muitos sieglos y que mayoritariament se basaba en tecnicas de caza sostenibles, sin que i hese cazataires profesionals documentaus en a rechión, por o que en desapareixer en un entorno tradicionalment humanizau podrían tener conseqüencias difícils de preveyer en as poblacions d'as antigas presas.

Se veiga tamiénEditar

Vinclos externosEditar