Indicación Cheografica Protechida Pataca negra de Teruel

A Indicación Cheografica Protechida Pataca negra de Teruel ye una indicación cheografica protechida sobre a pataca negra d'a provincia de Teruel.

Pataca negra de Teruel

Redolada

A zona de cautivo, recolección, conservación, calificación y envasau ye toda a provincia de Teruel. Iste territorio se troba situau entre a parti oriental d'a Meseta Central y a sudoriental d'a Depresión Ibérica. Ye una provincia bien montanyosa con altarias importants en as sierras de Cucalón (1.478 m) y Sant Chust (1.547 m) por o nord-este, sierra Menera (1.603 m) y sierra d'Albarracín (1.920 m) y os Monts Universals (1.830 m) por o sud-este. Entre istas cadenas se troban as depresións de Calatayú-Mont Albán y Calamocha-Teruel. Dende as estriberas septentrionals d'a sierra de Cucalón enta l'ueste y dende o Mayestrato enta o norte y nord-este, arribando dica o río Ebro, s'estendilla a Depresión Iberica.

Clima

O clima d'a provincia de Teruel ye un clima mediterranio, de montanya meya y de fuerte matiz continental, con veranos curtos y de pocas precipitacions (por debaixo d'os 20 mm) que favoreixen o creiximiento d'a pataca negra, y hibiernos fredos y con chelada, lo que ye menester pa a suya maduración.

Caracteristicas

O carpoforo u cuerpo fructifero presenta un peridio, u parte exterior, con estructura vorrucada u piramidal, aparentement crebazada y de color negra mate, a vegadas con bel tono royenco-marrón. A gleba u parte interior ye compacta y de color pardo-negrenca y ye recorrida por venas finas, blancas y bien definidas.

As condicions edafoclimaticas d'a zona dan a o producto una sabor singular y aroma distintiva y penetrant, razons por as que se valura tanto en a gastronomía.

Variedaz

As patacas negras amparadas por a indicación cheografica protechida Pataca negra de Teruel son fongos hipocheus d'a especie Tuber melanosporum vitt.

Producción y comercialización

A presentación comercial d'a pataca negra de Teruel será en fresco y se puet comercializar entera y en as categorías Extra, Primera y Chicota u bien en trozos.

Mas de dos terceras partis d'a producción de pataca negra d'Espanya provienen d'a provincia de Teruel, estando a comarca de Gúdar-Chabalambre l'orichen d'o 75% d'a producción estatal. A superficie de plantacions de pataca negra en a provincia de Teruel ye de 11.000 hectarias, lo que suposa un total de 52 toneladas de producto a l'anyo, convertindo-la en mayor rechión productora a livel mundial.

Vinclos externos

• (es) Pataca negra de Teruel

• Datos: Q131278736
• Multimedia: Trufa negra de Teruel / Q131278736