Barranco

Un barranco ye una forma erosiva de releu de versants abruptas y en forma linial creyada por l'augua corrient quan erosiona lo suelo. Los barrancos tienen formas de vals chicas con unas midas que van dende metros a decenas de metros de fondura y amplura.

Barranco formau por erosión.

Determinaus barrancos u las suyas morfolochías se nombran en aragonés a vegadas como "galachos", concepto diferent de lo galachos de la Ribera d'Ebro, que son brazos secundarios u cauces abandonaus d'Ebro, a vegadas meandros abandonaus.

Los barrancos son lo resultau de la formación de vallons y lavallos progresivament mes fondos y amplos. Las versants tienen mes tendencia a sufrir erosión en barrancos quan desapareix la vechetación y l'augua corrient se leva lo suelo facilment, en especial en zonas con fuertes plevias y intensas tronadas. La erosión en galachos u barrancos se considera un indicador fisico d'erosión de grau 3 si los sulcos son d'escala metrica. La erosión en barrancos reduce la productividat de las tierras de cautivo favorindo la desertificación.

Toponimia

Envista frontal de lo Barranco d'Arás.

En la toponimia lo nordeste de la Peninsula Iberica muitos barrancos corresponden a torrents, en especial a las suyas canals de desaugue, por eixemplo los barrancos d'Arás y Ascaso.

La caracteristica de no levar augua tot l'anyo (u levar-ne poca por un regular), ha feito que en bella zona d'aragón se nombre como "barrancos" a los regallos, regachos, rigachuelos u arroyos, que a diferiencia de los verdaders barrancos no amuestran uns sinyals d'erosión tant vistables.