Escultura

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Se clama escultura a:

• L'Arte de modelar, entretallar u entretallar en bardo, piedra, fusta u atro material ye una d'as Artes Polidas en a cual l'artista se espresa por meyo de volumens y espacios. A escultura ye l'arte plastico, l'arte de modelar feguras y reproducir obchectos de bulto. Se i incluyiban d'antis mas todas as artes alfareras, as d'entretalladura y cincel chunto con as de fundición y remoldato.
• A obra feita por o escultor.

O David de Miguel Ánchel.

A escultura se divide en dos grans brancas,Estatuaria y Escultura ornamental, seguntes que represente a forma humana y esprese as concepcions suprasensibles de l'hombre u s'ocupe en reproducir artisticament os demás sers d'a naturaleza, animals u vechetals. A primera leva con propiedat o nombre d'escultura y tien un ideyal mesmo, desempenyando a segunda un papel secundario a lo servir d'auxiliar a la primera y a l'Arquitectura.

A estatuaria complega tres cheneros :

• a estatua, que reproduce una fegura humana u animal solada y por entero, a lo menos o suyo parti mas noble que ye la cabeza
• a colla que representa cuantas feguras humanas en escena ye dicir con una acción común
• o relieu, que presenta feguras en escena u soladas pero nomás brullando sobre una superficie.

Conducta de proporcions

A conduta representa en escultura y en pintura lo que o modulo en arquitectura y no ye atra cosa, en cheneral, que o conchunto d'as mesuras proporcionals que s'alufran en a fegura humana.

Os artistas griegos d'o sieglo d'oro (sieglo V a.C.) tenioron ya a suya conducta atribuiu prencipalment a lo escultor Policleto y anque dende allora ha ito i habendo rectificacions y variacions en mans d'os antigos y mudenos artistas, quedó pro establito por o pintor Leonardo da Vinci a remates d'o sieglo XV acomodando-se-ie a mayoría d'os pintors y escultors. A mesura fundamental d'a conducta florentina prenita de l'hombre bien establiu ye en a cabeza. Ista se considera en altaria como a ueitena parti de tot o cuerpo, estando a cara a sobre parti d'o mesmo y d'una altaria igual a la largaria d'a man. Estando l'hombre en piet y estendillando os brazos, determina un cuadrau perfecto con as ringlas que baixan a plomo y pasan por as estrimeras d'as mans y as que horizontalmén se tienden sobre a cabeza y debaixo d'os piules. As diagonals d'iste cuadrau se tallan en a zaguer vertebra lumbar y fixan en o centro de toda la fegura. Tirando una horizontal por dito punto central se divide l'hombre en dos partis iguals y cada una d'istas en atras dos, por ringlas paralelas que trescruzan por a metat d'o peito y por as rodetas. A cabeza se divide a la suya vegada en cuatro partis iguals estando una d'ellas a nariz.

Procedimientos

A Escultura y mas encara as artes a ella subordinadas, se sirven de variaus procedimientos t'a suya execución. Os escultors gosan aprestar a suya obra formando en modelo (modelando) con buro u cheso fin a fegura que ha de servir-les como base y este modelo equivale ta éls a lo boceto t'o pintor u o plan ta l'arquitecto. Dimpués, l'artista quita de puntos a suya obra con auxilio d'una cuadricla fendo-la proporcional a o suya mena. A materia sobre a cual treballa o escultor gosa estar bardo, piedra, fusta, bronce, fierro, vori, plata u oro.

O procedimiento fundamental y clasico siguito por os escultors ye o entretallau, servindo-se d'escobre y buril u cincel seguntes os casos pos incluso l'atros procedimientos de fundir y moldeyar desichen mas u menos retoques de cincel si a obra ha de salir perfecta. S'emplegan antimás o remoldato u vudau, o cincelau, o repuxau, o embutiu, o gravau y o raxoso u troquelau.

• Entretallar pende en tirar particlas a lo mazacón ya esbastato dica lograr otener a fegura que se pretende.
• Moldeyar ye dar a una pasta la deseyada forma adhibindo u quitando micotas de pasta .
• Vudar ye obtener una forma en vuedo t'aplenar-la dimpués con fundición u con una pasta cualsiquiera y lograr a positiva.
• Cincelar ye retocar con cincel as feguras obtenitas por o vudau y tamién formar baixo relieus con o cincel en una lamina metalica.
• Repuxar ye producir en una lamina de metal a fuerza de martiello sobre bel molde los relieus y os vuedos amenistables ta consiguir a forma que se pretende.
• Entallar ye afundir u fixar por curte (por meyo de cincel u buril) sobre material duro un debuixo cualsiquier.
• Estampar u troquelar ye imprentar dencima una lamina de metal u de pasta un siello u troquel con as feguras en vuedo ta que istas resulten de relieu.
• Embutir ye aplicar sobre un molde duro una delgada chapa de metal poliu ta que a fuerza de trucos prena as suyas formas y dimpués, quitando a chapa y unindo-ne os cantos quede una estatua u arreparo artistico vuedo pero con apariencia maciza. Tamién se clama embutiu y encrustato lo resultau de ficar bellas piezas en os foraus u vallos practicatos en atras. Son variedaz d'istas incrustacions mui emplegatas en artes decorativas, a taracea que se fa con fusta u vori embutindo-ne en a superficie de bel mueble de fusta y a ataujía u damasquinato que se practica ficando laminas de metal poliu en os debuixos ubiertos en bronce, fierro u acero. Con istas formas decorativas se relaciona o granulau y a filigrana. Ista se fa aplicando filos u vaguetas de metal poliu dencima d'atro d'a mesma clase u inferior producindo debuixo y aquer sembrando de chicotas perlas metalicas a superficie d'a choya u pieza parellana.