Chuana Coscujuela

Iste articlo ye escrito con as normas graficas EFA. Si quiers, puez aduyar cambiando a la grafía oficial de Biquipedia y sacando dimpués ista plantilla.

Chuana Coscujuela Pardina
Información personal
Naixida o:	1910
Naixida de:	Fumel
Muerta o:	19 de febrero de 2000
Muerta en:	Barcelona
Ocupación:	Escritora
Obras:	A lueca, Continazión

Chuana Coscujuela Pardina (Fumel, Francia, 1910- † 19 de febrero de 2000) estió una escritora en aragonés, muit conoixita por a suya novela autobiografica A lueca.

A suya vida

Chuana Coscujuela naixió l'anyada 1910 de Fumel (departamento d'Òlt y Garona, Francia), enta do yeran itos a treballar os suyos pais. A o poco tiempo de naixer Chuana, tornan ta o lugar de do yera a familia, Adahuesca, en o Semontano: astí pasa Chuana a suya nineza. En 1922 se'n fue ta Barcelona, en do ya yeran bell unos d'os suyos chirmans. En Barcelona se casó con Joan Mirambell (Chuan en a obra de Chuana Coscujuela) y tenió dos fillas, una d'as quals, a chicota, morió en as anyadas 80. Continó vivindo en Barcelona, mesmo dimpués d'a muerte d'o suyo mariu en 1991.

A suya obra

A finals d'os anyos 70 escribe noveladas as suyas memorias de nina en Adahuesca y a redolada (Radiquero, Uerto, ermita d'o Trevinyo, Uesca...). O libro se publicó en 1982 con o títol A lueca (a historia d'una mozeta d'o Semontano) (Uesca, Publicazions d'o Consello d'a Fabla Aragonesa). Yera o primer libro que se publicaba en aragonés popular d'o Semontano. L'aceptación estió enorme, más que más por a espontaneidat y naturalidat con as que reconta os más duros episodios d'a suya vida, y por a sencilleza con a que replega a vida tradicional en un lugar d'o Semontano. O suyo estilo ye pleno antimás d'expresions y frases feitas de carácter coloquial que li dan a o texto una gran viveza. Dimpués d'acotolata a primera edición (de 2000 exemplars), se'n fació una segunda, tamién de 2000 exemplars, en 1988. Una tercera edición d'A lueca, tamién de 2000 exemplars, s'ha feito en 1998.

Chuana Coscujuela yera Consellera d'Honor d'o Consello d'a Fabla Aragonesa. Ye estata una d'as millors y más populars escritoras en aragonés d'o zaguer tercio d'o sieglo XX. Estió ganadora d'o Premio Arnal Cavero d'o Gubierno d'Aragón en l'anyada 1992.

Ye autora de:

• "Adahuesca", en A l'aire (Garbas), BBAA, Zaragoza, D.G.A., 1985.
• "Chunio de 1937". Fuellas, lº. 86, 1991.
• "Bellas expresions, mazadas y palabras d'Adagüesca". Fuellas, lº. 87, 1992.
• "A casa mía está en o Semontano". Fuellas, lº. 100, 1994.
• A lueca (a historia d'una mozeta d'o Semontano). Uesca, Publicazions d'o C.F.A., 1ª ed., 1982; 2ª ed., 1988; 3ª ed., 1998.
• Continazión (1922-1983).Uesca, Publicazions d'o Consello d'a Fabla Aragonesa, 1992.

Predecesor: Cleto Torrodellas Mur (en 1990)

Premio Arnal Cavero 1992

Succesor: Seminari de Filologia Romànica de la Universitat de Heidelberg (por a edizión de l'antolochía Memòrias de la set, BB.AA.)