Cichorium

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

«Chicoria» y «achicoria» reendrezan ta iste articlo. Pa atros usos d'o fitonimo «chicoria» se veiga Chicoria (desambigación).

Cichorium
Roseta d'as fuellas de Cichorium intybus, una d'as chicorias bordes mas comuns.
Denominacions populars
Chicorias, achicorias, chicoiras, achicoiras, chicoinas, chocorias, chocainas
Clasificación cientifica
Dominio:	Eukaryota
Reino:	Plantae
División:	Magnoliophyta
Clase:	Magnoliopsida
Subclase:	Asteridae
Orden:	Asterales
Familia:	Asteraceae
Subfamilia:	Cichorioideae
Tribu:	Cichorieae
Chenero:	Cichorium
Descripción
Cichorium L., 1753

As chicorias u achicorias (cientificament Cichorium) son un chenero de plantas herbacias en a familia d'as asteracias que concabe especies como Cichorium intybus, una hierba silvestre muit común, y Cichorium endivia, con variedaz d'uso culinario que se conoix popularment como escarolas.

Descripción

As chicorias son siempre plantas herbacias no lenyosas. Producen una roseta de fuellas que se debanta a poco sobre o suelo, con un tallo curto en as primeras fases d'o suyo desarrollo vechetativo.

As fuellas tienen distribución alterna arredol d'o tallo, y son mas largas que amplas, enteras, lancioladas u ovo-lancioladas, d'aparencia fresca, a sobén con espiclas en o revés. O limbo foliar gosa aparentar dentadura u estar aserrau, nunca no liso. A radiz ye napiforme, central, y almagazema nutrients que a planta emplega en a florada y fructificación.

En a florada a planta cambea a-saber-lo a suya morfolochía. O tallo se prolarga verticalment dica poder pasar d'o metro d'altaria. As fuellas funcionals, as d'a roseta chovenil, s'ixecan y cayen. O tallo comienza bien luego a ramificar-se (de forma dicotomica) y en os forcons amaneixen fuellas nuevas, mas chicorronas que as d'as fases anteriors d'a planta.

As flors son azuls u moradas, de color muit viva, y brostan en numero par en un involucro en o extremo de cada tallo floral, refirmadas por dos (u multiplo de dos) bracteyas por cada involucro. Os petalos en a corola son fusionaus lo menos por a base, pero en bels casos dica la punta. Os estambres son poco vistables, en o centro d'a flor y fusionaus por l'antera.

Os fruitos son vilanos monospermos, aon que as escratas voladeras son mas curtas que o fruito. Dimpues d'haber-se produciu o fruito, a planta muere. Os tallos florals d'a segunda fase vital d'a planta gosan quedar-se de piet, secos, en forma de lastons, dica que o tempero y a calamón les fan vulcar-se.

Habitat

As chicorias habitan en una ampla diversidat de suelos, dende calsineros dica silicios u basalticos, siempre que i troben cualque cosa de compuestos nitrochenaus, pues son plantas mayoritariament nitrofilas. Ista preferencia por o nitrocheno fa que se'n gose trobar en arias humanizadas u aon que i haiga presencia frecuent d'animals (en a naturaleza, os compuestos nitrochenaus en o suelo dimanan con muita frecuencia d'as deposicions -fiemo y orina- d'os animals, u bien d'o contacto entre a tierra y l'aire atmosferico cuan se'n ha feito un movimiento). Por ixo son hierbas habituals en as marguins d'os camins, cunetas de carreteras, pratos, uebras, articas, femallas y un largo etcetera de micro-habitats que tienen l'acción de l'Hombre como denominador común.

As chicorias precisan un buen grau d'humedat en a tierra mientres que creixen, y como a mayoría son encara funcionals a temperaturas baixas, muitas forman y fan creixer a suya roseta de fuellas principals en os meses de l'hibierno. A florada se desviene en os meses de mas calor, cualques especies en a primavera y belatras en os meses estivals. S'ha descrito o comportamiento de florada d'as especies con interés economico, como a escarola, y pareix que a disminución d'a humedat en o suelo podría estar o factor desencadenador.

Imáchens

• 
  Fuellas basals de C. intybus.
• 
  Flor.
• 
  Florada de Cichorium endivia, a escarola domestica.
• 
• 
• 

Vinclos externos

• Se veigan as imáchens de Commons sobre Cichorium.
• Wikispecies tiene un articlo sobre Cichorium.

• Datos: Q158514
• Multimedia: Cichorium / Q158514
• Especies: Cichorium