Casualties of War
| Casualties of War | |
|---|---|
| Títol | Casualties of War |
 Póster d'a cinta. | |
| Ficha tecnica | |
| Dirección | Brian De Palma |
| Aduyant de dirección | Brian W. Cook |
| Producción | Art Linson Fred C. Caruso |
| Guión adaptau | David Rabe |
| Basau en | articlo de Daniel Lang en The New Yorker (1969) |
| Musica | Ennio Morricone |
| Soniu | Richard P. Cirincione |
| Fotografía | Stephen H. Burum |
| Montache | Bill Pankow |
| Escenografía | Wolf Kroegerr |
| Vestuario | Richard Bruno |
| Maquillache | Bron Roylance |
| Peluquería | Mike Lockey |
| Efectos especials | Terence J. Cox |
| Actors | Michael J. Fox Sean Penn Don Patrick Harvey John C. Reilly John Leguizamo Thuy Thu Le Erik King Ving Rhames Dale Dye |
| Datos y cifras | |
| País(es) | Estaus Unius |
| Anyo | 1989 |
| Debantadera | 18 d'agosto de 1989 Estaus Unius[1]
|
| Chenero(s) | Cine de drama Cine belico |
| Durada | 113 min. |
| Idioma(s) | Anglés Vietnamita |
| Companyías | |
| Productora(s) | Columbia Pictures Art Linson Productions |
| Distribución | Columbia Pictures |
| Presupuesto | 22,5 millons de dólars |
| Recauto | 18,7 millons de dólars |
| Informacions en bases de datos especializadas: | |
         
| |
Casualties of War (títol orichinal en anglés, en aragonés Victimas d'a guerra, enguerada en Aragón con o títol en castellano de Corazones de hierro, Corazons de fierro en idioma aragonés) ye una cinta estausunidense de l'anyo 1989 de drama belico dirichida por Brian De Palma seguntes un guión adaptau por David Rabe d'un articlo publicau por Daniel Lang en o diario The New Yorker (1969) que dimpués se convertió en libro y que a la vegada ye basau en feitos reals. Con una Banda Sonora Orichinal d'Ennio Morricone y una dirección de fotografía de Stephen H. Burum, Casualties of War fue producida por Art Linson y Fred C. Caruso ta las productoras Columbia Pictures y Art Linson Productions y en l'elenco d'a cinta destacan os actors Michael J. Fox, Sean Penn, Don Patrick Harvey, John C. Reilly, John Leguizamo, Thuy Thu Le, Erik King, Ving Rhames y Dale Dye, entre d'atros.
Casualties of War ye ambientada en os anyos 1960 mientres a guerra de Vietnam y se rodó mas que mas en escenarios naturals en Tailandia, con bellas escenas d'estudio filmadas en San Francisco (California). L'incident real, lo clamau incident d'a colina 192, s'escaició lo 19 de noviembre de 1966, cuan un grupo de soldaus de l'exercito estausunidense secuestroron, violoron y asasinoron a una mesacha vietnamita en o lugarón de Cat Tuong, en o districto de Phù Mỹ (provincia de Bình Định). Sobre iste mesmo feito delictivo ya s'heba rodau anteriorment una atra cinta en o cine alemán, o.k. (Michael Verhoeven, 1970). Ta Casualties of War se cambioron tot os nombres d'os participants en os feitos y tamién bellos aspectos relativos a ixos feitos.
Argumento
editarLa historia se presenta en forma de flashback, explicada por Max Eriksson, un antigo soldau de l'exercito estausunidense mientres a guerra de Vietnam. Eriksson remera que feba parte d'un grupo de soldaus estausunidenses en un servicio de patrulla nocturna, mandaus por o tenient Reilly. Cuan un d'os components d'a patrulla dentra en panico y revela la posición, reciben un ataque d'o Viet Cong y Eriksson caye en un tunel excavau por o Viet Cong mientres que ye cosirando un d'os flancos d'a posición en o combate. Tony Meserve, lo lider d'o pilotón d'Eriksson, consigue sacar-lo d'aintro d'o tunel y salvar-lo, y posteriorment os soldaus albandonan la chungla.
A patrulla descansa por difuera d'un lugarón a lo canto d'un río en a rechión de Tây Nguyên cuan lo Viet Cong lis fa una emboscada, morindo en l'ataque lo soldau especialista "Brownie" Brown, feito que provoca un gran impacto en Meserve en estar "Brownie" un d'os suyos amigos. Cuan tornan en a suya base, reciben como enfuerzo a lo soldau de primera clase Antonio Díaz, qui fará las funcions d'operador de radio d'o pilotón.
Frustrau porque ya fa tiempos que no li conceden un permiso, Meserve decide ordenar a lo suyo pilotón secuestrar a una nina vietnamita. Eriksson s'oposa frontalment, pero Meserve, o cabo Thomas E. Clark y lo soldau de primera clase Herbert Hatcher lo ignoran. Cuan Meserve, Clark, Hatcher, Díaz y Eriksson reciben a orden de fer un atra patrulla, Eriksson li eplica las suyas preocupacions por a situación a lo suyo amigo mas amanau, Rowan. En plegar a nueit, o pilotón dentra en un lugarón para secuestrar-ie a una nina vietnamita, Tran Thi Oanh.
Mientres que fan a suya patrulla por a chungla y las montanyas, Díaz prencipa a planteyar-se la suya participación en tot ixo y li demana a Eriksson que lo refirme. Pero cuan la patrulla y la nina secuestrada plegan en un lugar despoblau, Meserve, Clark y Hatcher menazan a Eriksson y Díaz decide a la fin ceder a la presión d'os atros, dixando solo a Eriksson en a esfensa d'a nina. Finalment, Meserve ordena a Eriksson fer de sentinela para asinas poder fer una violación en grupo de Tran, violando-la succesivament toz cuatro.
En rayar l'alba, Meserve ordena a Eriksson protecher a Tran mientres que los atros cuatro miembros d'o pilotón ocupan una posición amán d'un puent de ferrocarril dende lo cual se pueden controlar os accesos a una base d'operacions y deposito de subministros d'o Viet Cong. Simultaniament, Eriksson consigue que Tran comprenda que él no li fará garra mal y decide marchar sin permiso ta tornar a la nina con a suya familia. Tanimientres, Meserve ninvía a Clark ta que reculla a Eriksson y Tran y los porte con él en lo puent con o pilotón, y Eriksson no puet fuyir con a nina.
Meserve fa que Díaz demane refirme aerio amanau ta asinas poder fer un asalto en a base d'o Viet Cong y dimpués li ordena tamién que mate a Tran en emplegando un cutiello. Tanimientres, antes de que Díaz pueda matar-la, Eriksson dispara lo suyo rifle en l'aire revelando asinas a presencia d'o pilotón a lo Viet Cong y entablando-se un tiroteyo. Tran preba de fuyir-ne, encara que Clark l'apunyala terne que terne. Eriksson intenta salvar-la pero Meserve lo fa planto en seco y lo fa cayer en golpiando-lo con a culata d'a suya arma. Cayiu en o suelo, Eriksson veye con impotencia cómo tot o pilotón dispara contra Tran cuantas vegadas dica que caye d'o puent y muere.
En rematar a batalla, Eriksson dispierta en a base militar estausunidense, en una cama d'un hespital de campanya. Bien luego troba a lo suyo amigo Rowan y li explica los feitos. Rowan li diz que lo millor ye de charrar con o tenient Reilly y con o capitán Hill, os suyos superiors. Cuan lis explica, Reilly y Hill son partidarios d'ixuplidar lo succediu. Dabant d'a insistencia d'Eriksson, Hill decide disolver la unidat en asignando a los suyos miembros a d'atros destins; a Eriksson lo destina a una unidat especializada en dentrar en os tunels excavaus por o Viet Cong y a on iste ha plantau preseras, manifiestament ta situar-lo en un puesto bien perigloso.
Días dimpués, mientres que Eriksson se troba en una latrina, Clark intenta matar-lo fendo servir una granada de man (ye decir, un intento de fragging, palabra encunyada mientres ixa guerra, a on l'asasinato d'un companyero, a sobén un superior, estió frecuent) y Eriksson li fa cara y lo golpia con una pala, en decindo-le a Meserve, que ye present, que no cal matar-lo a él porque, total, a denguno no li importa lo que éls facioron. Meserve li fa la birla y finalment Eriksson marcha.
Eriksson ye en un bar trobando-ne-ie a un capellán castrense, a qui explica lo que s'escaició mientres a patrulla, y lo capellán lo comunica a los suyos superiors, ubrindo-se una investigación que remata con a compareixencia d'os cuatre violadors debant d'un consello de guerra. En a sentencia Meserve ye condenau a 10 anyos de treballos forzaus en licenciando-lo con deshonor de l'exercito estausunidense, Clark ye condenau a cadena perpetua, Hatcher a 15 anyos de treballos forzaus y Díaz a 8.
Alavez Eriksson dispierta en o mundo actual d'o suyo malsuenio y se troba en un tramvía en San Francisco, amán d'una estudiant d'orichen vietnamita que tiene bel pareixiu con Tran. Cuan a mesacha vietnamita baixa d'o tramvía, ixuplida la suya bufanda y Eriksson corre dezaga d'ella ta tornar-ne-la y la mesacha li fa la rialleta y marcha, pero Eriksson la clama en vietnamita y la mesacha creye que li remera a Eriksson bella persona y marcha.
Producción
editarDesembolique
editarCasualties of War se basa en feitos reals, en o clamau incident d'a colina 192 que s'escaició lo 19 de noviembre de 1966, cuan un grupo de soldaus de l'exercito estausunidense secuestroron, violoron y asasinoron a una mesacha vietnamita en o lugarón de Cat Tuong, en o districto de Phù Mỹ (provincia de Bình Định). Pero tamién se basa en Casualties of War, un amplo articlo publicau por Daniel Lang en octubre de l'anyo 1969 en The New Yorker y que publicó como libro un mes dimpués.[3] O productor David Susskind en mercó los dreitos cinematograficos asperando producir-ne una cinta ta Warner Bros..[4] Pete Hamill redactó un guión y Jack Clayton heba de dirichir a cinta resultant,[5] pero finalment o prochecto no se fació. En ixe inte, Michael Verhoeven dirichió ta lo cine alemán a cinta o.k., basada directament en os feitos reals, presentando-la a concurso en o Festival Internacional de Cine de Berlín en 1970 y que provocó controversias entre los miembros d'o churau d'os premios dica lo punto que en ixa edición finalment no s'atorgoron premios. Brian De Palma yera present en ixe Festival en presentando la suya cinta Dionysus in '69.
A finals d'os anyos 1970, Susskind anunció que finalment la cinta s'heba de producir ta la productora American Broadcasting Company,[6] pero en zagueras o prochecto no se concretó. En l'anyo 1979 David Rabe li mencionó la existencia d'o prochecto a Brian De Palma, qui s'intresó en él, pero no podió trobar financiación en ixe momento. Bellas anyadas dimpués Rabe ya heba escrito un guión y De Palma adhibió a lo prochecto a los actors Michael J. Fox y Sean Penn. Dentroron en conversacions con Paramount Pictures ta que finanzase la cinta pero la productora decidió no continar cuan o presupuesto ta la cinta puyó dende 17 millons de dólars dica los 20 millons. De Palma albandonó momentaniament o prochecto ta dirichir The Untouchables, que tenió a-saber-lo d'exito. Dawn Steel heba conoixiu o prochecto de Casualties of War cuan yera executiva d'a Paramount y cuan se convertió en chefa de producción en Columbia Pictures decidió que lo prochecto de Casualties of War estase la primera d'as suyas produccions.[7][8][9] Steel afirmó que "Historicament, as cintas sobre la Guerra de Vietnam han estau bien rendals. Todas istas cintas, Platoon, Full Metal Jacket, Apocalypse Now, The Deer Hunter, ye veyendo cintas que mai no han teniu prou exito, pero han teniu muito exito. Os numeros en l'estranchero han estau extraordinarios".[7]
Rodache
editarO rodache d'a cinta se fació entre abril y mayo de 1988, mas que mas en localizacions en Tailandia encara que tamién con bellas escenas filmadas en San Francisco (California). As escenas d'o puent están rodadas en a localidat de Kanchanaburi, en o mesmo puesto a on se i localizaba l'autentico puent d'a cinta The Bridge on the River Kwai (1957, David Lean).
Ista cinta estió lo tercer treballo dramatico de Michael J. Fox, qui anteriorment heba protagonizau Light of Day (1987, Paul Schrader) y Bright Lights, Big City (1988, James Bridges). Tamién estió la cinta de debut de John C. Reilly, qui tornaría a treballar con Sean Penn en We're No Angels (1989, Neil Jordan) y State of Grace (1990, Phil Joanou). Casualties of War tamién estió lo primer papel important de l'actor John Leguizamo, qui tornó a compartir papel con Sean Penn en una cinta dirichida por Brian De Palma en Carlito's Way (1993).
Enguero
editarCasualties of War s'engueró en Estaus Unius o 18 d'agosto de 1989, prochectando-se en 1.487 cines y en ocupando la cuatrena posición por o suyo recaudo mientres a suya primera semana en cines, fendo un recaudo total de 18,7 millons de dólars, inferior a los 22,5 millons de presupuesto d'a cinta.
En devedé s'editó en 2001 con o montache cinematografico orichinal con una durada de 113 minutos, pero en 2007 se publicó una edición estendida de 119 minutos que incluyiba dos escenas eliminadas d'o montache orichinal: un interrogatorio d'os investigadors a Eriksson y una escena en o chudicio cuan l'advogau d'os acusaus (interpretau por Gregg Henry, no acreditau) preba de desacreditar a Eriksson.
Critica
editarA cinta tien una calificación d'un 83% en Rotten Tomatoes. O consenso d'a web afirma: "Casualties of War se submerche desgarradorament en a guerra de Vietnam con una obra de conchunto bien interpretada que se troba entre los treballos mas granaus d'o director Brian De Palma".[10] O publico encuestau por CinemaScore li dio a la cinta una calificación promeyo de "B+" en una escala de A+ a F.[11]
O critico Roger Ebert le dio a la cinta tres estrelas de cuatro posibles y escribió: "Mas que a mayor parte d'as cintas, l'efecto depen d'a fuerza d'as suyas actuacions, y especialment de l'actuación de Penn. Si no puet convencer-nos d'o suyo poder, d'a suya rabia y d'a suya esquiva por a vida d'a nina, la cinta no funcionaría. Lo fa, en una actuación de poder abrumador y brutal".[12] Vincent Canby de The New York Times declaró: "Casualties of War abanza enta lo suyo clímax de manera tan inevitable y segura que los consellos de guerra, que son la penultima secuencia d'a cinta, no son menos fascinants por a forma teatral en que se presentan, han estau comprimius". Tamién calificó l'actuación de Penn como "extremadament buena" y escribió sobre Fox que "s'está firmement en o personache" en un papel "difícil".[13] Todd McCarthy de Variety escribió: "Una poderosa metafora d'a vergüenya nacional que estió la orchía de destrucción d'Estaus Unius en Vietnam, a cinta de Brian DePalma tien bellos defectos, pero fácil que dispierte un gran intrés en l'audiencia, mesmo si l'enguero de Columbia estará un trago amargo ta muitos".[14] Gene Siskel d'o Chicago Tribune li dio a la cinta tres estrelas de cuatro y la clamó "una chulapina en un tono menor por as limitacions d'una historia simpla".[15] Michael Wilmington de Los Angeles Times escribió, "Casualties of War ye la cinta numero 19 de DePalma y fácilment la millor. Os suyos detractors veyoron os suyos thrillers como uns pastiches manipuladors y sadicos de Hitchcock, pero astí no se tracta de slashers con estilo u escenas sangrientas. Él no cal que s'acate en provocar un shock. Él acoladia un horror mas fundo: l'infierno que se troba baixo d'a piel de cada hombre, en asperando esclatar".[16] Hal Hinson de The Washington Post la elochió como "una cinta de gran poder emocional" y "una d'as mas duras moralment y complexas cintas sobre hombres en guerra que mai no s'han feito".[17]
A Dra. Valerie Wieskamp, qui ha escrito sobre la violencia sexual en as guerras estausunidenses, cita la cinta como un eixemplo de l'encubrimiento d'os crímens de guerra militars estausunidenses en a cultura popular estausunidense. Ella destaca cómo os pocos cambios feitos en a historia real sirven ta refirmar una narrativa d'as fuerzas armadas como una institución defectuosa, pero que en zagueras ye chusta y heroica. Entre los detalles que destaca se troba lo feito de que no menciona que las sentencias que s'imponioron en os chudicios estioron dimpués severamente retalladas, y a lo zaguero d'os perpetradors lo liberoron dimpués de nomás que cuatro anyos en a garchola. Encara que Eriksson/Storeby ye l'heroi l'hardimiento d'o cual se suchiere que representa la identidat nacional y militar d'os Estaus Unius, mesmo a los violadors y asasins d'o suyo pilotón se lis atorga una historia de fondo imachinaria d'un companyero d'armas cayiu recientment ta "explicar" os suyos actos.[18]
Kathryn McMahon diz que:[19]
O guionista David Rabe se desvincló d'a cinta, en decindo que De Palma no heba estau fidel a lo suyo guión,[13] y la cinta tamién recibió criticas d'os veterans estausunidenses d'a guerra de Vietnam;[20] sindembargo, Quentin Tarantino la considera como "la millor cinta sobre la guerra de Vietnam".[21]
Premios
editar| Premio | Calendata | Edición | Categoría | P | Notas |
|---|---|---|---|---|---|
| Premios d'a Political Film Society[22] | 1990 | Political Film Society d'a Paz | Casualties of War | ||
| Premios Globos d'Oro[23] | 1990 | 47ena edición | Nominau a lo Globo d'Oro a la Millor Banda Sonora Orichinal | Ennio Morricone | |
| Premios Motion Picture Sound Editors | 1990 | Nominau a lo MPSE a lo Millor Montache de Soniu en Efectos de Soniu | Maurice Schell |
Se veiga tamién
editarReferencias
editar- ↑ (en) Enguero de Casualties of War en Internet Movie Database.
- ↑ (en) Casualties of War en Internet Movie Database.
- ↑ (en) Christopher Lehmann-Haupt: Incident on Hill 192, en The New York Times, 14 de noviembre de 1969, p. 45.
- ↑ (en) Second Phase Will Begin in Warners Revamping, en Los Angeles Times, 21 de chinero de 1970. p. d10.
- ↑ (en) Leonard Sloane: Kinney Defends Warner Actions: Holders Are Told of Major Filming Activities, en The New York Times, 18 de febrero de 1970, p. 69.
- ↑ (en) Mitch Broder: David Susskind: Growing Up in TV], en The New York Times, 19 de febrero de 1978, p. D31.
- ↑ 7,0 7,1 (en) Bruce Weber: Cool Head, Hot Images, en The New York Times Magazine, 21 de mayo de 1989.
- ↑ (en) Lawrence Van Gelder: At the Movies: A Linson-De Palma Vietnam film The man who makes Merchant-Ivory music The woman who made Day-Lewis sound like a Czechoslovak, en The New York Times, 26 de febrero de 1988, p. C8.
- ↑ (en) Paul Rosenfield: It's Back to Vietnam for Hollywood: Columbia's Dawn Steel has a lot riding on a brutal Brian DePalma war movie. The tale behind her commitment to "Casualties of War", en Los Angeles Times, 13 d'agosto de 1989, p. R1.
- ↑ (en) Casualties of War en Rotten Tomatoes.
- ↑ (en) Busqueda en CinemaScore (escribir "Casualties of War" en o box de busqueda), en CinemaScore.
- ↑ (en) Roger Ebert: Casualties of War, en RogerEbert.com, 18 d'agosto de 1989.
- ↑ 13,0 13,1 (en) Vincent Canby: In "Casualties of War", Group Loyalty vs. Individual Conscience, en The New York Times, 18 d'agosto de 1989, p. C10.
- ↑ (en) Todd McCarthy: Film Reviews: Casualties of War, en Variety, 16 d'agosto de 1989.
- ↑ (en) Gene Siskel: "Casualties of War" story worthy of contemplating, en o Chicago Tribune, 18 d'agosto de 1989, p. 7A.
- ↑ (en) Michael Wilmington: DePalma's Dark Victory, en Los Angeles Times, 18 d'agosto de 1989, Parte VI, p. 1, 21.
- ↑ (en) Hal Hinson: The Explosive Power of "Casualties of War", en The Washington Post, p. D1.
- ↑ (en) Valerie N. Wieskamp: Sexual Violence and the U.S. Military: The Melodramatic Mythos of War and Rhetoric of Healing Heroism (PDF), 2015.
- ↑ (en) Kathryn McMahon: Casualties of War: History, Realism, and the Limits of Exclusion, en o Journal of Popular Film and Television, 22 (1): 12–21, 10 de chinero de 1994.
- ↑ (en) Elizabeth Kastor: Vets Join List of "Casualties" Critics: De Palma's Film Draws Protest of Soldier's Image De Palma Assailed, en The Washington Post, 24 d'agosto de 1989, p. C1.
- ↑ (en) Tarantino on Casualties of War, De Palma a la Mod, 29 d'agosto de 2009.
- ↑ (en) Political Film Society - Previous Award Winners". Political Film Society. Political Film Society, en a web d'a Political Film Society.
- ↑ (en) Ganadors y nominaus d'a 47ena edición d'os Premios Globos d'Oro en a web oficial d'os Premios.
Vinclos externos
editar- (en) Casualties of War en Internet Movie Database.
- (en) Casualties of War en Rotten Tomatoes.
- (en) Casualties of War en AllMovie.
- (en) Casualties of War en Box Office Mojo.
- (en) / (es) Casualties of War en FilmAffinity.
- (en) Casualties of War en l' American Film Institute Catalog de l'American Film Institute.
- (fr) Casualties of War en Allociné.
Datos: Q1126637
