Vlacos transilvanos
|
Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla. |
| Vlacos de Transilvania Români din Transilvania | |||
|---|---|---|---|
 | |||
| |||
| rumano | |||
| Cristiana ortodoxa, Cristiana Greco-Catolica | |||
| Pueblos vlacos | |||
 Mapa d'os Balcans con as poblacions vlacas y rumanas. | |||
Os vlacos transilvanos[1] (en rumano români din Transilvania) son os habitants de Transilvania (Rumanía) que tienen como luenga tradicional o rumano y son de relichión ortodoxa u greco-catolica. Encara que son a mayoría d'a población de Transilvania, en o pasau estioron sozmesos politica y socialment a la minoría hongara.
Modo de vida tradicional
editarBi ha agricultura sedentaria con cautivos como a panicera en a cuenca transilvana y ganadería transhumant en o cabalto d'os Carpatos.
Relichión
editarA terminolochía cristiana dacorrumana mes antiga ye d'orichen latín y occidental y no d'orichen griego u eslau, o que indica que a cristianización d'os dacos y daco-romanos se fació dende l'ueste.
Os vlacos transilvanos encomenzoron a tener una influencia relichiosa bizantina por o menos dende o sieglo X, (antes en podeban tener pero no ye demostrable), y baixo esta influencia se convertioron en cristianos ortodoxos (u como dicen en os países vlacos pravoslavnici).
Os cristianos vlacos antes d'estar pravoslavians u greco ortodoxos por influencia d'os eslaus u Costantinoble debeban mantener un cristianismo tradicional d'os antigos romanos (igual como os udis d'o Caucaso manteneban un cristianismo tradicional sin clero). Este cristianismo debeba estar trasmeso tradicionalment mes per leyendas que por a conoixencia d'a biblia. Os feitos d'os martirs (Sângeorz, Sânmedru), chunto con faciendas y personaches tanto d'o nuevo testamento]] (Sântãmãria, Sâmpietru), como d'o viello (os santos) fuoron combinaus en una especie de mitolochía popular, con os santos convertindo-se en dioses con a mesma traza que en a mitolochía griega.
Os protestants preboron d'atrayer a los vlacos enta a suya reforma relichiosa, y os primers textos extensos en luenga rumana son textos protestants. Manimenos os vlacos continoron estando greco-ortodoxos.
En tiempos d'o dominio austriaco amaneixió a Ilesia d'Alba Iulia, greco-catolica, que seguindo l'eixemplo d'a Ilesia Uniata Rutena, mantién o rito griego pero accepta l'autoridat d'o Papa de Roma. Paradochicament os sacerdotz se pueden casar en a ilesia uniata pero no en a ilesia catolica de rito occidental.
Luenga
editarEn o sud de Transilvania as parlas dacorrumanas se clasifican en o dacorrumano meridional en continación territorial con o dacorrumano d'Oltenia y Muntenia. En o centro y norte de Transilvania as parlas se clasifican en o dacorrumano septentrional chunto con as parlas moldavas.
En muitos puestos de Transilvania a c inicial de ce-, ci- no se leye ch como en rumano estándard y italiano y se leye x.
O dacorumano de Transilvania tien mes influencia lexica ongara que atras parlas rumanas y menos influencia turca.
Historia
editarDimpués d'o fracaso d'o setio de Viena en 1683 os otomans encomienzan a reblar y os austriacos conquerirán Hongría y Transilvania. En o tractau de Karlowitz de 1699 os otomans renuncian a Transilvania ya de pa cutio. En o tractau de Passarowitz os otomans renuncian a lo Banato y a Oltenia, (Oltenia se reintegrará a Vlaquia en o tractau de Belgrado de 1739).
A Transilvania adhibida los dominios d'os Habsburgo conserva a suya dieta con seu en Cluj y dominada por a nobleza hongara. En 1698 se creya a Ilesia Uniata d'Alba Iulia y o metropolitano d'Alba Iulia reconoix l'autoridat d'o Papa. En 1794 os vlacos se sublevan a los hongaros.
O 14 de mayo de 1848 bi ha una asamblea de notables en un prau de Blac, “o campo d'a libertat”, con os bispes ortodoxo y uniata y aprueban una propuesta pa solicitar a organización d'una nación rumana, una autonomía relichiosa pa os ortodoxos (que dependeban d'o metropolitano serbio de Karlowitz), un estatuto especial pa Transilvania y diferents libertaz. Adrezan esta demanda a la dieta de Cluj y a lo Emperador pero no lis contestan y o 29 de mayo a dieta decide a incorporación de Transilvania a Hongría.
En octubre de 1848 os campesins vlacos s'organizan en lechions con l'aduya de l'exercito imperial pa combatir a los nobles hongaros. Bi ha combates entre chinero y chulio de 1849 y a la fin os hongaros entran en Sibiu.
En 1863 os vlacos de Transilvania ya pueden esleyir representants en a dieta de Cluj. O compromís austrohongaro de 1867 posa fin a l'autonomía de Transilvania y, dende 1875, o gubierno de Budapest imposa una politica de maguiarización. En 1884 se funda en Sibiu o partiu nacional rumano, pero ye prohibiu en ixe mesmo anyo. En 1905 torna a tener actividat. En 1868 a Ilesia Ortodoxa rumana pasa a estar autocefala con un metropolitano con seu en Sibiu.
O 27 d'agosto de 1916 Rumanía (que alavez no yera que a suma de Vlaquia y Moldavia) declara a guerra a l'Imperio Austrohongaro, con a intención d'adhibir a lo territorio rumano Transilvania con una muga occidental en a linia Debrecen-Szeged promesa por as potencias aliadas. As tropas rumanas invaden Transilvania y prenen Braşov. A población hongara fuye, pero dimpués en septiembre as tropas rumanas son as que s'ha de retirar acompanyaus de 80.000 vlacos de Transilvania, y ha d'acceptar a perduga en a guerra por l'armisticio d'o 9 d'aviento de 1917 de Focşani y o tractau de Bucarest d'o 7 de mayo de 1918.
Manimenos l'armisticio de Villa Giusti d'o 3 de noviembre de 1918 fa que l'Imperio Austrohongaro s'esboldregue, y esto lo aproveita o gubierno rumano pa atacar o 10 de noviembre a Hongría. O día 15 de noviembre as tropas rumanas entran en Transilvania. O 1 d'aviento representants d'os vlacos de Transilvania y d'Hongría s'aplegan en Alba Iulia, se constituyen en asamblea y esleyen un gran consello nacional que o día 14 demanda a unión con Rumanía. Os saxons se i apegan o 8 de chinero de 1919. O día 24 o Parlamento de Bucarest ratifica totas as decisions d'a unión. Amaneix o problema d'a muga con Hongría y o Reino d'os Serbios, Croatas y Eslovenos.
A formación en Budapest d'o gubierno comunista de Bela Kun en marzo de 1919 se fació servir d'enchaquia pa que Rumanía intervenise en Hongría en abril. Bela Kun abandonó o poder o 1 d'agosto y os rumanos ocuporon Budapest o día 3, y no se'n fue dica o día 15 de noviembre. Por o tractau de Trianón d'o 4 de chunio de 1920 Hongría ha de ceder a Rumanía tota Transilvania y a mes a metat d'o Banato y una ampla francha de territorio d'Hongría mugant con Transilvania de mayoría rumana dito por os rumanos Crişana y a on son as ciudaz de Arad, Oradea y Satu Mare.
O 15 de chunio Hitler planteya a cuestión de Transilvania. En o segundo arbitrache chermano-italiano de Viena (30 d'agosto de 1940) Rumanía ha de ceder a Hongría o norte de Transilvania. Os hongaros fan campanyas de limpieza etnica en os territorios que controlan, fendo mortaleras con a población rumana. Manimenos soldaus rumanos de Transilvania d'o norte combaten en l'exercito hongaro en o frent oriental.
O 23 d'agosto de 1944 un golpe d'estau en Rumanía fa que o rei Miguel prenga o poder, y declara a guerra a Alemanya y Hongría. L'exercito rumano combate chunto con l'exercito royo sovietico en Transilvania, que ye reconquiesta en octubre y dimpués en Hongría y Eslovaquia. O tractau de París de 1947 confirma a recuperación de Transilvania d'o norte.
En o rechimen comunista que siguió a la segunda guerra mundial s'ha feito menor a presencia d'a población y a cultura hongara con a supresión de l'autonomía d'a rechión hongara en 1968, con a venida de rumanos d'atras parz de Rumanía y una prebatina de concentración parcelaria a zaguers d'a decada de 1980. En a Transilvania postcomunista bi ha habiu tensions politicas entre os rumanos u vlacos y a minoría hongara, y en chulio de 1993 se produció un alcuerde entre as autoridaz y os representants d'os hongaros de Rumanía.
Referencias
editar- ↑ (an) Diccionario aragonés-castellano-catalán. Versión preliminar. Estudio de Filología Aragonesa. Edacar num. 14. Zaragoza. Edicions Dichitals de l'Academia de l'Aragonés. ISSN 1988-8139. Octubre de 2024.
Datos: Q13050460
