Ampriu

Un ampriu u empriu (posiblement dimane d'o verbo "amprar") ye un espacio vicinal que s'ampra u deixa emplegar en exclusiva a cualques vecins d'un lugar, a cambeo d'un preu achustau previament con éls. Iste preu que se satisfa a la comunidat puede composar-se d'una cantidat de productos u bels servicios y, nomás as menos vegadas, de diners.

Quitando feno d'un fenero. Os vecinos que podeban expleitar un ampriu soleban estar os mas pobres de lugar.

Oríchens

Os amprius yeran propiedaz vecinals de tot un lugar u d'una villa, que no teneban amo especifico, y a los suyos beneficios toz es vecins i teneban dreito. Manimenos, como en l'Alto Aragón y especialment en a montanya o sistema imperant ye o de chicoz propietarios y tradicionalment muitas casas han teniu prou con as suyas propias posesions ta sobrevivir y consumir a capacidat de treballo de toz os suyos miembros, os amprius se destinaban a estar logaus a propietarios concretos u, muit a sobén, arrendar-les-ne a las casas mas necesitadas, a preus asequibles, o que en muitos casos s'entendeba colectivament como una forma de caridat.

En pagas, os vecins que se beneficiaban de l'ampriu teneban que pagar tipicament una parte simbolica de o que a partida produciba; p. ex. un numero concreto de corders u bel vetiello si yera un prau, cualque cantidat de cuartals de farina si yera de campos, u tamién como servicio, achustar-se un fillo d'a casa como corderero u rapatán ta la cabanya comunal, etc.

As oríchens d'ista figura de propiedat colectiva son escuras, y se remontan muit probablement a formas d'expleitación antigas, ya desapareixidas, d'antes de l'advenimiento d'o feudalismo y atras formas de sistema economico que evolucionarían cara ta'l Primer Capitalismo.

Cheosinonimos y variants

A parola ampriu ye bien present en a toponimia de l'Alto Aragón. Se troba especialment present en l'alta Ribagorza y tamién en as valles altas d'a cuenca hidrografica d'a Cinca, como Bielsa y Chistau. Por tot l'Alto Aragón s'ha documentau tamién as formas empriu, amprío, emprío, ompriu y omprío.

Se veiga tamién

• Dreito d'alera
• Facera u facería

• Datos: Q25619874