Vespras Secilianas

(Reendrezato dende Viespras Secilianas)
As Vespras secilianas, quadro de 1846 de Francesco Hayez.

Se conoix en a Historia con o nombre de Vespras secilianas a una sublevación d'os secilians contra o dominio francés en a isla por a Casa d'Anchú o 30 de marzo de 1282, que remató en una mortalera d'os franceses d'a isla. Dimpués, Secilia s'adhibió a la Corona d'Aragón en a presona d'o rei Pero III d'Aragón, que prenió asinas o nombre de Pero I de Secilia en o reino de Secilia. A sublevación principió en Palermo, a on se deciba que bellos soldatos franceses heban forzato a unas mullers secilianas, y a escape s'estendilló ta otros lugars d'a isla, como Mecina u Corleone, dica rematar a mortalera d'os franceses d'a isla. Bells autors afirman que as vespras secilianas fuoron promovitas por Miguel VIII Paleologo, estando un eixemplo de "Diplomacia Bizantina".

Os secilians clamoron en la suya aduya a o rei Pero III d'Aragón, casato con Gonstanza II de Secilia, filla y heredera de Manfredo I de Secilia, o zaguer rei d'a Secilia independient antis de ser redotato y muerto por Carlos I d'Anchú en a batalla de Benavent o 26 de febrero de 1266. Pero III atrancó a Carlos II d'Anchú, o fillo de Carlos I d'Anchú, inicialment en o castiello de Monclús, pero veyendo la poca seguridat que ofriba per la proximidat con Francia, lo trayió a lo castiello de Mequinenza dica que estió meso en libertat en 1288 en complimiento d'o tractau de Canfranc. Un d'as condicions imposadas yera que la Provenza cayería baixo lo vasallaje aragonés si Carlos d'Anjou incompliba ixo a lo que se le obligaba.

BibliografíaEditar

  • Steven Runciman, The Sicilian Vespers: A History of the Mediterranean World in the Later Thirteenth Century (en) ISBN 978-0-521-43774-5
  • Michele Amari, History of the war of the Sicilian vespers. Earl of Ellesmere. Londres 1850 (en)
  • H. J. Chaytor. A History of Aragon and Catalonia (en)

Vinclos externosEditar