Biquipedia

Rete Ferroviario d'Intrés Cheneral

(Reendrezau dende RFICh)
Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

O Rete Ferroviario d'Intrés Cheneral (RFICh) (en castellano Red Ferroviaria de Interés General - RFIG) ye a denominación que recibe a parte d'o rete ferroviario d'Espanya que ye d'intrés publico a livel estatal pa satisfer a demanda de transporte. O concepto s'introdució por primer vegada en a Lei 39/2003 d'o Sector Ferroviario[1] como una d'as mesuras precisas pa fomentar a competitividat en o ferrocarril. Dende l'anyo 2015, o Rete Ferroviario d'Intrés Cheneral ye regulau por a Lei 38/2015.[2]

Linias d'o RFICh d'amplo iberico en Aragón.

O menister de que s'establise o Rete amaneixe con as obligacions dictadas por a Directiva 91/440/CEE d'a Comunidat Economica Europea, y as suyas modificacions posteriors, o suyo obchectivo consiste en creyar un espacio ferroviario europeu unico y facilitar a liberalización d'o transporte ferroviario.

Composición d'o Rete

editar

D'acuerdo con l'articlo 4 d'a Lei 38/2015, corresponde a o Ministerio de Fomento adhibir u sacar linias d'o Rete Ferroviario d'Intrés Cheneral, con a obligación de consultar a las comunidaz autonomas se se'n saca u se'n mete una que transcorra de tot adintro d'a comunidat en cuestión.[2] As linias se listan en o «Catalogo de Linias y Tramos d'o Rete Ferroviario d'Intrés Cheneral» que fa o Ministerio de Fomento.[3] As linias que no son afectadas por o RFICh pueden clausurar-se u transferir-se a la comunidat autonoma que pertoque.[1][2]

Particularidaz

editar

A linia Leida-La Pobla de Segur ye afectada parcialment en o RFICh en o trachecto que va dende a estación Leida-Pirineus dica la bifurcación Pla de Vilanoveta (p.k. 1+927). Anque a resta d'a linia se troba transferida ta la Generalitat de Catalunya dende l'1 de chinero de 2005,[4] FGC ha de cumplir con as normas vichents pa o RFICh pa poder dentrar en a estación de Leida.

Caracteristicas

editar
 
Un automotor 596 de Renfe en a linia 204 d'Adif por o termino municipal d'Ayerbe (Plana de Uesca).

O rete ferroviario d'intrés cheneral se composa d'as linias ferroviarias d'intrés publico a livel estatal, y contaba cuan se creyó en 2005 con 11.780 kilometros de vía d'amplo iberico, 1010 km d'amplo UIC y 1269 km d'amplo metrico.[5] En 2019 as linias d'alta velocidat heban arribau ta 3.240 kilometros en servicio,[6] o que situaba a Espanya por debant de Francia y Chapón en kilometros d'ista infraestructura y nomás por dezaga de China a ran mundial.[6] Actualment se'n sigue construindo,[6] y bi ha unas cuantas linias en obras u que no son encara si que prochecto.

O rete ferroviario d'intrés cheneral incluye tamién os rez ferroviarios d'os Puertos d'Intrés Cheneral, o que fa posible a intermodalidat d'o transporte.[3] Por contra, no fan parte d'o rete d'intrés cheneral os trazaus que s'ha transferiu ta las comunidaz autonomas ni as linias ferroviarias de propiedat privada.

Chestión d'o Rete

editar

A chestión d'a infraestructura ferroviaria d'o Rete Ferroviario d'Intrés Cheneral corresponde por defecto a l'Adif, seguntes a Lei d'o Sector Ferroviario. Manimenos, cualques tramos son chestionaus por unatro administrador, como a parte espanyola d'a linia d'Alta Velocidat Figueres-Perpinyán, os rez d'os Puertos d'Intrés Cheneral y as linias que s'ha transferiu ta Adif Alta Velocidat.[2] Adif y Adif AV expublican cada anyada la suya Declaración sobre o Rete sobre as linias d'aon que detentan a titularidat.[7][8]

A linia d'Alta Velocidat Figueres-Perpinyán, que mete en comunicación o rete feroviario d'Espanya con o de Francia entre ixas dos ciudaz, a construyó TP Ferro y obtenió a concesión d'o suyo mantenimiento y expleitación entre 50 anyos.[9] A companyía TP Ferro, participada 50%-50% por a constructora espanyola ACS y por a francesa Eiffage, se declaró en quiebra en 2013 y escomenzó una serie de pleitos con os gubiernos francés y espanyol pa que le indemnizasen 93 millons d'Euros por o baixo trafego de trens que experimentó a linia y 350 millons por os sobrecostes de construcción que heba teniu.[9] A la fin, Francia y Espanya rescatón a dita infraestructura[10] por un valor aproximau de 600 millons d'euros, y actualment s'opera baixo a sociedat conchunta d'Adif y SNCF Réseau, Línea Figueras Perpiñán S.A. (LFP Perthus).[11]

Con a liberalización d'os servicios ferroviarios en Espanya, pueden acceder ta o Rete ferroviario d'intrés cheneral toz os operadors ferroviarios que cumplan os requisitos que estableix a lei, disposen de licencia y certificau de seguridat que les haiga emitiu l'Achencia Estatal de Seguridat Ferroviaria (AESF).

Referencias

editar
  1. ↑ 1,0 1,1 Ley 39/2003, de 17 de noviembre, del Sector Ferroviario en o BOE de 18/11/2003; consultada o 9 de marzo de 2019.]
  2. ↑ 2,0 2,1 2,2 2,3 (es) Ley 38/2015, de 29 de setiembre, del Sector Ferroviario en o BOE de 30/09/2015; consultada o 9 de marzo de 2019.
  3. ↑ 3,0 3,1 (es) Orden FOM/710/2015, de 30 de enero, por la que se aprueba el Catálogo de líneas y tramos de la Red Ferroviaria de Interés General en o BOE de 23 d'abril de 2015, consultau o 16 d'aviento de 2016.
  4. ↑ (es) Real Decreto 2398/2004, de 30 de diciembre, sobre el traspaso a la Generalidad de Cataluña de la línea...; en o BOE de 31 d'aviento de 2004, consultau o 16 d'aviento de 2016.
  5. ↑ (es) Red de Interés del Estado (2005), comnsultau o 9 de marzo de 2019.
  6. ↑ 6,0 6,1 6,2 (es) Infraestructuras y Estaciones en www.adif.es, consultada o 9 de marzo de 2019.
  7. ↑ (es) Declaración sobre la Red (Adif); consultada o 16 d'aviento de 2016.
  8. ↑ (es) Declaración sobre la Red (Adif AV); consultada o 16 d'aviento de 2016.
  9. ↑ 9,0 9,1 (es) Noticia El administrador concursal de TP Ferro presiona a España y Francia por el túnel del AVE, de 13 d'aviento de 2017; consultada o 9 de marzo de 2019.
  10. ↑ (es) Noticia España y Francia rescatan el túnel del AVE por los Pirineos, de 16 d'aviento de 2016; consultada o 9 de marzo de 2019.
  11. ↑ (es) Empresa en www.lfpperthus.com; consultada o 9 de marzo de 2019.

Se veiga tamién

editar
Obteniu de "https://an.wikipedia.org/w/index.php?title=Rete_Ferroviario_d%27Intrés_Cheneral&oldid=2187244"