Parizón
|
Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla. |
A parizón (d'o latín <PARITIONE) ye a temporada de partos en o ganau domestico, y por extensión en cualsiquier remugant de rabanyo. En o hemisferio norte se produz tipicament en primavera, anque en os rabanyos d'animals domesticos siempre bi ha eixemplars isolaus que paren en cualsiquier epoca de l'anyo.
En as especies d'herbivoros socials, o ciclo reproductivo se troba asociau con a disponibilidat d'alimento y adaptativament s'ha visto favoreixiu cap a producir-se os partos en coincidindo con a época de mayor abundancia.[1] En o hemisferio norte y en latituz subtropicals y temperadas, como as d'Europa, a parizón gosa coincidir con os meses d'abril y mayo (primavera), de forma que o zelo se produz sincronicament antes, en función de a durada de chestación de cada especie[1] (5 meses en as ovellas y en as crabas, 7 meses en as vacas).
Importancia editar
Dende o punto d'envista de a ganadería a parizón ye una epoca d'especial treballo ta os pastors porque requiere muita cuenta con l'actividat d'os partos, pus no ye raro que a las mais les vienga la cría travesera y pasen contumancias que precisen a intervención de l'hombre ta desarrollar-se correctament. Tamién requiere especial atención separar correctament as mais de sus caloyos en os primers dias, pus ye fácil que no puedan seguir o paso d'aquellas y calga zarrar os corderetc en as horas diurnas mientres se suelta las fembras ta pasturar, habendo-se de parar muita cuenta que se reunen dimpuesas y que as crías no entivocan a mai, o que podría tener consecuencias fatals ta la supervivencia d'a cría (as fembras lactants s'aborrecen d'as crías d'as atras y no as deixarían tetar, o que conduciría a la muerte por inanición d'o caloyo).
En os rabanyos ovins transhumants de l'Alto Aragón, a parizón se soleba producir a prencipios d'abril, o que pillaba en Tierra Plana, bellas tres semanas u un mes antes d'escomenzar a cabanyera de tornada t'a montanya. Isto yera cabal porque significaba que as ovellas teneban chusto a millors tascas ta fartar-se y producir a cantidat de leit que permitiba a os corders estar en as condicions optimas ta comenzar o viache. As ovellas que libraban a rezago (tardanas), dimpués que as de demás, soleban fer-se pasturar en os millors puestos en es dias anteriors a la partida con a intención que os corderez recuperasen.[2]
Lexico editar
Como toz os episodios relacionaus con a ganadería, a parizón tien un extenso lexico relacionau en aragonés.
- Parizoner u parizonero, o pastor que s'encarga especialment d'as ovellas plegadas de librar y d'os caloyos.
- Crabitero u manta crabitera, una manta especial que lievaban as companyías que serviba ta transportar a codetas de bel pastor u en o somero cabanyero os calois naixius en a cabanyera y que encara no podeban seguir a su mai.
- Paridera, a cuadra u estallo a on se zarraba os corders mientres sus mais pasturaban.
- Facera, a partida mas verde a on se feba pasturar as ovellas paridas mas tardanas.[2]
- Acampaderas, as uellas que heban librau en rematar una chornada.[2] Se deciban asinas porque yeran prioritarias en fer-las «acampar» en l'arredol de a paridera. P. ex. Se diz: «Ista ovella está acampadera», querendo dicir que ye plegada de parir.
- Mai temprana, a fembra que pariba antes que a media en o rabanyo.
- Mai mediana, a fembra que pariba a la vegada que a mayoría en o rabanyo.
- Mai tardana, a que pariba dimpués.
Referencias editar
- ↑ 1,0 1,1 (es) PORRAS, Antonio, VALENCIA, Javier y ZARCO, Luis Alberto (2003); Estacionalidad reproductiva en ovejas
- ↑ 2,0 2,1 2,2 (es) SATUÉ BUISÁN, José (2007); Memoria de un montañés. Xordica Editorial. Zaragoza. ISBN 978-84-96457-25-6
