Obertauern

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Obertauern ye una estación d'esquí y centro turistico que se troba en a sierra de Radstädter Tauern en o estau austriaco de Salzburgo. A estación d'esqui ye deseparada en dos localidaz: Tweng y Untertauern.

Obertauern
Pistas d'Obertauern
Situación cheografica
Situación	Untertauern/Tweng, Salzburgo, Austria
Altaria maxima	2.526m
Altaria minima	1.630m
Pistas
Total km.	100 km
Pistas	85
Pista mas gran	2km
Verdas
Azuls	41
Royas	34
Negras	9
Travesía	1
Fundo
Terrain parks
Esquí nocturno	Sí
Remontaderas
Telesquís	6
Telecadieras	18
Telecabinas	2
Cintas
Canyons
Superficie	km²
Datos chenerals
Pachina oficial	www.obertauern.com
Correu-e	info@obertauern.com
Telefono	+43 (0)6456 7252
Fax	+43 (0)6456 7252 9

Cheografía

Obertauern ye entre as mayors estacions d'esqui d'Austria.

Obertauern se troba en o sudeste d'o estau de Salzburgo en a cordelera de Radstädter Tauern entre os 1.630 y os 2.526 metros d'altaria sobre o livel d'a mar. O centro hibernal ye amán d'o punto mas alto d'o collau de Radstädter Tauern por o que pasa a carretera de Katschberg (en alemán Katschberger Straße u B99). Obertauern ye trestallau en dos districtos: St. Johann/Pongau y Tamsweg, por o que ye deseparau en os municipios d'Untertauern (Pongau) y Tweng (Lungau). A muga entre os dos municipios ye en o punto mas alto d'o puerto, estando asinas o centro d'a estación d'esqui.

Historia

Celtas y romanos

Obertauern tien una luenga historia que prencipia con os celtas (sieglos IV–I aC). Ya existiba una calzada romana que trescruzaba o paso d'o Tauern (en os Alpes) dica Iuvavum (Salzburgo). S'han puesto trobar marcas feitas por os carros romanos que cubriban ista ruta, asinas como fitas antigas que amuestran l'uso d'iste puerto por os romanos. A millora d'a calzada se fació probablement en tiempos de l'emperador Claudio (anyos 41-54).

Desenvolique d'a ciudat

A primera vegada que se nombra o Radstädter Tauern ye en l'anyo 1207. En 1224, os rechistros dicen que bi heba una chicota ilesia en o cobalto d'o paso. En 1517, son decumentadas dos posadas en o Tauern, fendo referencia a las casas de Schaidberg y Wisenegg. Istos dos edificios encara son en servicio actualment. En 1519, s'enampló a carretera ta permitir o paso de carruaches. En 1764, l'arcebispe Sigismund de Schrattenbach ubrió una oficina postal en Untertauern, a on bi heba dos servicios postals cada semana. En 1870 a frecuencia s'incrementó a cuatre por semana, y, en 1895, yeran dos por día. En 1902, se rechistran os primers esquiadors.

O centro turistico d'Obertauern

En 1920, dimpués d'a Primera Guerra Mundial, os primers esquiadors plegoron enta Obertauern a piet y tresportando o suyo equipache con caballos. Entre 1925 y 1927, se facioron as conoixidas cursas d'autos y motos de Tauern, eventos que atrayeban a muitos vesitants. A chent d'Obertauern data a fundación d'o suyo lugar en o día 8 d'aviento de 1929, ya que ye o día en que prencipió a pasar por primera vegada de traza regular o trafico a traviés d'o paso de Tauern d'hibierno. En 1948, s'instaló a primera remontadera en Seekarhaus. Entre 1948 y 1960, as pistas las feban os propios esquiadors, por una hora de treballo en a preparación d'as pistas teneban gratis 3 baixadas. As carreteras y as proteccions contra os lurtes s'amillororon en 1950 y se construyoron tamién as primeras remontaderas de percha. A creyación d'o primer hotel en a localidat d'Obertauern estió en 1952. Entre 1952 y 1961, s'instaloron muitos telesquís, telecadieras y telecabinas modernos.

D'os ueitanta dica l'actualidat

En 1961 dentró en servicio una moderna telecabina en Zehnerkar. A l'anyo venient, en 1962, Obertauern se convirtió en o nombre oficial d'a localidat. Un anyo dimpués, a primera maquina pisanieus motorizada d'Austria prencipió a treballar en Obertauern, ya que dica alavez as pistas yeran pisadas a piet por os propios esquiadors. Por ixas envueltas se creyó a "Escuela popular ta esquiadors" (Schifahrende Volksschule) en a que os alumnos esquiaban de tardis dimpués d'as clases normals d'o maitín.

En 1965, Obertauern estió un dos puestos trigaus por The Beatles ta apareixer en a suya cinta "Help!". A localidat fue trigada por estar una d'as pocas zonas que teneban nieu por ixos tiempos.

En l'anyo 1967 se construyó a primera pista fendo servir un bulldozer. O resultau estió un gran cambeo d'o terreno ta fer as pistas mas facils de mantener y de baixar ta os esquiadors, permitindo asinas o suyo uso a un mayor rango d'usuarios. A traviés d'una serie de remontaderas se creyó o precursor de l'actual circuito de Tauern (Tauernrunde).

En 1985 s'instaló o primer canyón de nieu y en os siguients anyos a-saber-los telesquis y telecadieras fuoron esviellaus. Entre 1991 y 1998 s'heban completau cuantos prochectos de modernización – como a creyación d'una pista nocturna iluminada y a introducción d'o sistema de lectura d'o pase d'esquí a distancia. En aviento de 1999, l'alemán Christian Flühr, fació o record d'o mundo de maratón con esquís en Obertauern – esquiando mientres tres días sin aturar (68 horas y 23 minutos), fendo a distancia entre America y Europa. Una temporada dimpués, en febrero de 2001, Christian Flühr tornó a batir o record d'o mundo esquiando mientres mas de 4 días (103 horas y 21 minutos) sin aturar. Dimpués batió o suyo propio record mundial cuantas vegadas, encara que en atras localizacions.

Obertauern s'ha estableixiu tamién como un d'os prencipals centros d'après ski d'Austria. O Edelweißalm y a zona d'arredol de Lürzer Alm son reconoixius internacionalment.

Fosal d'o desconoixiu

En o punto mas alto d'o collau se trona o "fosal d'o desconoixiu" (en alemán Friedhof der Namenlosen). Dita denominación viene d'os tiempos en que a chent travesaba o collau de Tauern a piet con vestius y equipación malos, muito a sobén con mal orache, morindo muitas vegadas como resultau. A ormino istos viachers no yeran identificaus y por ixo yeran apedecaus como "desconoixiu". Actualment iste ye tamién o fosal d'a localidat d'a estación d'esquí d'Obertauern.

Esporte d'hibierno en Obertauern

Esquí y snowboard

O lechendario pico Gamsleiten

O esquí ye o esporte mas popular en Obertauern, seguiu d'o snowboard. A estación d'esquí tien alto u baixo 100 kilometros de pistas paradas y 26 remontaderas que son capables de tresportar entre 48.000 y 49.000 personas por hora. As remontaderas d'a estación se dividen entre 1 telecabina, 19 telecadieras y 6 telesquís. As pistas se graduan fendo servir o tipico sistema de colors, con pistas fácils marcadas en azul (61%), meyas en royo (35%) y dificils en negro (4%). A pista d'o Gamsleiten 2 ye a pista d'esqui con mayor pendient d'Austria. Os no esquiadors pueden prener toz os remontaderas ta puyar, encara que nomás o Zehnerkarbahn y Grünwaldkopfbahn se pueden pillar ta baixar. Os vesitants pueden aparcar l'auto en un d'os 24.000 m² d'aparcamientos que se troban chunto a las pistas. A empresa Liftgemeinschaft Obertauern (LGO) ye responsable de mantener as remontaderas.

O circuito de Tauern

Como os remontaderas se troban rodiando a localidat, ye posible fer o "circuito de Tauern" (Tauernrunde), bien en a endrecera d'as agullas d'o reloch (si se siguen os sinyals royos) u en contra d'as agullas d'o reloch (seguntes os sinyals verdes). Ta trescruzar a carretera B99 (Katschberg-Straße) bi ha puents ta pasar esquiando en as pistas de Gamsleiten/Edelweiß, Kirchbühel (dos puentes) y Grünwaldkopf/Zehnerkar. O circuito puet prencipiar-se en cualsiquier remontadera, tornando dica o mesmo punto en rematar. A buena senyalización fa que sía posible esquiar tamién difuera d'as pistas.

Esquí nordico

A mas d'as pistas d'esquí alpín y snowboard, Obertauern ufre atras actividaz esportivas d'hibierno. Os vesitants pueden fer servir os 26 kilometros de pistas paradas ta esquí nordico, incluyindo una que se fa servir en a copa d'o mundo, asinas como bellas pistas ta fer senderismo.

Pases d'esquí

Obertauern tien o suyo propio forfait que, dende a temporada 2012/13, tamién ye valido ta la vecina rechión de Großeck-Speiereck, que se troba a nomás 15 kilometros de distancia. O Lungo Ski Pass (ta a rechión Obertauern - Lungau - Katschberg) y o "Super Salzburg Ski Card" (Estau de Salzburgo) tamién son validas, pero no'n ye o pase de Ski Amadé.

Vinclos externos

• (en) Pachina oficial d'Obertauern

• Datos: Q675661
• Multimedia: Obertauern / Q675661