Biquipedia

O Cucaracha

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.
Mariano Gavín "O Cucaracha"
Información personal
Calendata de naixencia 1838
Puesto de naixencia Alcubierre (Aragón)
Calendata de muerte 28 de febrero de 1875
Puesto de muerte Penyalveta, Lanacha (Aragón)
Ocupación Bandoler

Mariano Gavín Suñén, conoixiu per a motada de O Cucaracha, (Alcubierre, 1838 - † Lanacha, 28 de febrero de 1875) estió lo mas celebrau d'os bandolers aragoneses. As suyas accions se desvinioron en os Monegros en a segunda metat d'o sieglo XIX.

O Cucaracha yera fillo de Manuel Nicolás Gavín Ariño y d'Ignacia Suñén. Creixió en Alcubierre, en a resecada tierra d'os Monegros, muit pobra en o sieglo XIX. O 26 de marzo de 1861 se casó con Jobita Amador.

Bien poco ye lo que se conoix con certeza d'iste personache. Pa belunos sería estau o Robin Hood aragonés, que furtaba a os ricos pa dar-les-ne a os pobres; pa unos atros, yera nomás un bandolero que, igual como atros bandolers d'ixe tiempo, s'adedicaba a asaltar, furtar, extorsionar y secuestrar. A fama la consiguió en escapar-se a-saber-los anyos d'a Guardia Civil cada vegata que lo encorreban, o que fería que naixiese a expresión "estar mas vivo que Cucaracha".

Morió en una emboscada que li heba parau a Guardia Civil amán de Lanacha o 28 de febrero de 1875. Os guardias lo rodión en una paridera y disparón dica rematar con él y con a suya colla. Amás d'o Cucaracha, i morión o Cerruto, o Ferrero d'Osso, o Molinero de Belver y o Guarnicionero d'Alcoleya (Antonio Lampériz, José Berna, Melchor Colomer y José Solanilla). En a pocha d'o Cucaracha i trobón una carta que demandaba lo indulto a lo rei. O cuerpo fue levau ta Lanacha, a on que permaneixió en exposición pa escarmiento publico.

I hai un cómic con o nombre d'El bandido Cucaracha.

A leyenda

editar

I hai unas cuantas leyendas arredol d'o personache, en as cuals se ixemplifica la suya aduya a os pobres.

En La Pobla d'Alfindén contan que o Cucaracha mató una vegata dos mulas viellas y arguelladas de tío Ramulla, y que contino li dio diners pa que se'n comprase unas atras. Mas tardi tornó ta comprebar que las heba compradas, enfiló enta o marchant d'as mulas y li furtó os diners que tío Ramulla heba pagau per ellas.

En Castillón de Monegros contan que, en preguntar o Cucaracha a un zagalet si levaba diners, iste respondió que su mai no li heba dau so que tres pecetas perque o Cucaracha li'n furtaría si en levaba mas. O Cucaracha li dio diners a o zagal y li respondió: "Di-le a la puta de tu mai que Cucaracha no furta a os pobres."

D'a suya muerte tamién se'n diz que un boticario lo enverenó, u bien que secuaces d'a Guardia Civil bella cosa ficón en o vino d'a banda, y que ixo estió lo que permetió que podesen apercazar-lo.

Bibliografía

editar
  • Andolz, Rafael. El bandido Cucaracha y Puchamán de Lobarre. Librería General, Zaragoza, 1982.

Vinclos externos

editar
Obteniu de "https://an.wikipedia.org/w/index.php?title=O_Cucaracha&oldid=2156006"