Meandre
Un meandre[1] ye una curva en un cauz sinuoso d'un río u un curso d'augua a on se produce erosión en la part externa, y sedimentación en la part interna, por lo que la curva irá fendo-se mes gran y lo meandre irá migrando auguas enta baixo. Los meandres se forman en arias de pendients minimas, a sobén en lo curso baixo y curso meyo de los ríos, y ixamplan las planas aluvials por erosión lateral.
Los meandres presentan fonduras mes grans en la part externa, y tamién ripas mes altas.[2]
Un meandre va evolucionando fendo-se mes gran dica trobar-se con atro meandre. Alavez la diferencia d'altaria accelera la corrient en lo punto de contacto, adrezando-se lo cauz u deixando un cauz abandonau en forma de falz u ferradura que se converte en un galacho.
Los meandres son mecanismos autorreguladors de lo río, y permiten que lo río pueda seguir erosionando y transportando materials en endreituras con poca pendient.[3]
Cuan un río s'encaixa en lo substrato rocoso por cualsiquier causa y los cauces de los meandres ya no circulan por materials tovos d'una plana aluvial, plegan a erosionar lo substrato por erosión linial en lo mesmo cauz y dica fan foces con forma de meandre vistas en planta. Alavez estos meandres ya no pueden evolucionar con la rapideza de los meandres de las planas aluvials tovas y queda fosilizada la forma curva por muito tiempo, convertindo-se en recolons.[2]
Denominacions y toponimos sobre meandres
editarLa palabra meandre ye un tecnicismo cheolochico present en muitas luengas occidentals y deriva de lo griego Μαίανδρος u Maiandros, un río de la Peninsula d'Anatolia. En las diferents luengas bi ha nombres denominacions tradicionals que coexisten con "meandre".
En aragonés bi ha toponimos tipo "auguas tuertas" relacionaus con meandres, pero asociaus a formas d'orichen glacial. Tamién existe en aragonés la denominación especifica de "recolón" pa una clase especial de meandres que influiban en lo treballo de los navaters.
En castellano d'Aragón se rechistra dos aragonesismos referents a meandres: los meandres abandonaus d'Ebro se dicen "galachos" (palabra que en aragonés cheneral tien atros significaus como "sulco erosivo") y regar distribuindo l'augua en sulcos meandriformes se diz regar a tornallo en Torrociella d'Alcanyiz[4].
A fins de la decada de 1470 cuan adrezaban la Uerba en Villadolz denominaban los tramos meandriformes "vueltas"[5] en aragonés de las comunidaz aragonesas:
Sin estar necesariament un aragonesismo, dicen "vueltas" a los meandres en la Ribera Baixa d'Ebro y Baixo Aragón-Casp en castellano d'Aragón, y una huerta de Casp que bi heba en una ribera embadinada por l'actual entibo de Mequinenza li deciban "La Herradura". Tamién en las comarcas churras lis dicen "vueltas": en Exerica bi ha un recolón dito "La Vuelta de la Hoz".[6]
En Toledo lo recolón que bi ha se diz "Torno del Tajo", que puet estar un mozarabismo toponimico. En Asturias "La Revoltona" ye un meandre de lo río Nalón, y tamién un lugar de lo concello d'Ayer. En la Ribera d'Ebro catalana lo toponimo Flix se remonta a lo latín FLEXU ("curva"), y esta localidat ye rodeyata como una peninsula por un meandre d'Ebro.
Referencias
editar- ↑ (an) Diccionario aragonés-castellano-catalán. Versión preliminar. Estudio de Filología Aragonesa. Edacar num. 14. Zaragoza. Edicions Dichitals de l'Academia de l'Aragonés. ISSN 1988-8139. Octubre de 2024.
- ↑ 2,0 2,1 Eumenio Ancochea Soto, Francisco Anguita Virella, Fernando Moreno Serrano. Geología Procesos Externos. Editorial Edelvives, 1990. pp 85-88
- ↑ Francisco Anguita Virella, Fernando Moreno Serrano. Procesos geológicos externos y geología ambiental. Editorial Rueda, 1993. p 70
- ↑ (es) QUINTANA i FONT, Artur et al. (2004). El Aragonés residual del bajo valle del Mezquín (2ª Ed.); Ayuntamiento de Torrecilla de Alcañiz. Torrociella d'Alcanyiz. ISBN 84-606-3647-X
- ↑ (es) María Luz Rodrigo Esteban: Maestros paleros y endreçadores de ríos. Revista Xiloca, Nº 20, Noviembre de 1997 [1]
- ↑ (es) Diego Lópèz Olivares: La ordenación y planificación integrada de los recursos territoriales turísticos: estudio práctico de un espacio de desarrollo turístico incipiente. El Alto Palancia (Castellón). Universitat Jaume I, 1998. p 110 [2]
Bibliografía
editar- Eumenio Ancochea Soto, Francisco Anguita Virella, Fernando Moreno Serrano. Geología Procesos Externos. Editorial Edelvives, 1990.
- Francisco Anguita Virella, Fernando Moreno Serrano. Procesos geológicos externos y geología ambiental. Editorial Rueda, 1993.
