Hermandad de Cristo Despojado de sus Vestiduras y Compasión de Nuestra Señora

Hermandad de Cristo Despojado de sus Vestiduras y Compasión de Nuestra Señora
Información cheneral
Establita	2007
Seu canonica	Ilesia de Sant Chuan d'os Panetz
Seu social	RR. MM. Franciscanas Clarisas Descalzas de Santa María de Jerusalén (Zaragoza)
Cofadres	51
Pasos	1
Instrumentos	Cornetas, tambors y timbals
Uniforme	Caperucho y capa blancos y tunica granat
Web	Pachina oficial

A Hermandad de Cristo Despojado de sus Vestiduras y Compasión de Nuestra Señora (en aragonés Chermandat de Cristo Espullato d'as suyas Vestiduras y Compasión d'a Nuestra Sinyora) ye una cofadría d'a Semana Santa zaragozana.

Historia

L'orichen d'ista chermandat ye l'Agrupación Musical Getsemaní de Zaragoza, una asociación musico-cultural que fue establita o 6 d'aviento de 2001. Mienbros de dita agrupación deciden fundar una cofadría ta salir en as procesions de Semana Santa y lo fan oficialment o día 14 de setiembre de 2003, festividat de l'Aponderación d'a Santa Cruz y d'o Cristo de Chetsemaní, patrón tetular de l'agrupación musical.

Ixe mesmo anyo lo 15 de noviembre se presentan os documentos d'a chermandat a lo chermano mayor d'a Sangre de Cristo y bells días dimpués a l'arcebispato de Zaragoza. Quatro anyos mas tardi, o 28 de chinero de 2007 s'aproboron os estatutos y a seu canonica d'a chermandat, que sería la ilesia de Sant Chuan d'os Panetz de Zaragoza.

O día 7 de marzo s'entregoron as copias d'a documentación orichinal a los presidents d'a Sangre de Cristo y d'a Chunta Cordinadora de cofadrías. Asinas en o pregón d'a Semana Santa de 2007 a cofadría fue presentata y por invitación d'a Sangre de Cristo salió en o Santo Entierro, dezaga d'a cofradía de Nuestra Señora de la Asunción y Llegada de Jesús al Calvario y debant d'a cofradía de la Exaltación de la Santa Cruz, en l'orden que les corresponderba en l'inte d'a Pasión de Cristo que representa la chermandat.

Quan se creyó a chermandat se demandó a la Sangre de Cristo l'ampren de l'antigo paso d'o Balcón de Pilatos que ye en a Reyal Capiella d'a Ilesia de Santa Isabel de Portugal (Sant Cayetano) y que actualment no sale en procesions de Semana Santa. A la fin no i habió un alcuerdo sobre as condicions d'o contrato d'amprato d'a imachen y a chermandat decidió mercar a suya actual imachen en propiedat.

Anque a suya seu canonica ye a Ilesia de Sant Chuan d'os Panetz a seu social se troba en o convento de Santa María de Cherusalem d'a chermanas clarisas de Zaragoza.

Paso

Cristo Despojado

• Cristo Despojado: Obra d'estilo barroco feita por os escultors d'Arte Sacro de Madrit sobre fusta de cedro con una altaria de 180 cm. Policromata por o pintor José Soriano. A corona de punchas d'o Cristo ye feita con punchas naturals. Os suyos vestitos son de tierzopelo granat, ubiertos por o peito representan l'inte en que Chesús yera espullato d'ells ta estar penchato en a Cruz. Iste paso ye prou nuevo, de l'anyo 2007, por o que encara no ye rematato y en os siguients anyos s'adhibirán atras feguras como romans u hebreus ta completar a scena.

Uniforme y emblema

Conflaires d'a sección d'instrumentos.

L'habito d'a chermandat ye una tunica de color granat, os miembros d'a sección d'instrumentos levan totz tercerol granat, igual que os portaestandartes y cetreros y a resta de seccions incluyitos os portiadors d'os pasos leban caperucho blanco. Totz os cofadres levan capa de color blanca con o emblema d'a chermandat en o huembro ezquierdo.

O emblema ye una cruz con una sabana dencima d'os suyos brazos.