Fuesa de Xiloca
La fuesa de Xiloca ye una fuesa tectonica con dirección norte-sur que s'ubrió en lo Plioceno superior en lo Sistema Iberico despartindo a l'este la sierra Palomera de las sierras Menera y Albarrazín a l'ueste. Ye plena de sedimentos d'edat plio-quaternaria correspondients a ventallos aluvials u conos de dechección.
En la marguin oriental de la fuesa de Xiloca bi ha unas quantas fallas con grans frontons. En la marguin sudoccidental en contacto con la Sierra d'Albarrazín bi ha unas fallas con frontons més chicos que trencan en graus la superficie fundamental d'erosión de la Cordelera Iberica.
Las fallas de la marguin oriental que van una dezaga de l'atra en la dirección de lo Sistema Iberico son la falla de Calamocha, la falla de Palomera y la falla de Concut[1]. La fuesa de Xiloca queda topograficament dichós la depresión de Calatayú y Mont Albán por l'acción de la falla de Calamocha que las desparte y que encara ye activa. Tamién queda dichós los materials neochenos de la fuesa de Teruel por l'acción de la falla de Caudet[2] u falla de Concut.
En lo cabo meridional de la fuesa de Xiloca ye lo glacis d'Exea d'Albarrazín, con caita enta l'Este[2]. La zona mes meridional de la fuesa ye travesada en sentiu ueste-este por lo río Guadalaviar, que ye muito encaixau por l'acción de procesos de captura fluvial.[3]
Se veiga tamiénEditar
ReferenciasEditar
- ↑ (es) García Prieto, F.J: Evolución Geomorfológica de la región de Gallocanta (Cordillera Ibérica Central). Localización: Geographicalia, ISSN 0210-8380, Nº 30, 1993 (Eixemplar dedicau a: Homenaje a la profesora María Jesús Ibáñez Marcellán), pachinas. 3-18.
- ↑ 2,0 2,1 (es) Jose Luís Peña Monne et al. : Geomorfología de la Provincia de Teruel. Instituto de Estudios Turolenses, 1984. p 73.
- ↑ (es) Jorge Hermosilla Pla (dir.):Los regadíos históricos del Alto Turia turolense. Generalitat Valenciana, Conselleria de Cultura, Educació i Esport, Universidad de Valencia, 2008. ISBN: 978-84-370-7316-3. p 94, p 101.
BibliografíaEditar
- (es) Mateo Gutiérrez elorza, José Luis Peña Monné: Las formas del relieve de la provincia de Teruel. Instituto de Estudios Turolenses, 1990. p 51.