Manuel Giménez Abad

Manuel Giménez Abad
Consellero de Presidencia y Relacions Institucionals d'o Gubierno d'Aragón
12 de chulio de 1995 – 5 d'agosto de 1999
President	Santiago Lanzuela Marina
Precediu por	Ramón Tejedor Sanz
Succediu por	José Ángel Biel Rivera
Deputau en as Corz d'Aragón por Uesca
7 de chulio de 1999 – 6 de mayo de 2001
Senador en as Corz Chenerals por designación d'as Corz d'Aragón
31 de marzo de 2000 – 6 de mayo de 2001
President d'o Partido Popular de Aragón
24 de febrero de 2001 – 6 de mayo de 2001
Precediu por	Santiago Lanzuela Marina
Succediu por	Gustavo Alcalde Sánchez
Naiximiento	4 d'aviento de 1948 Pamplona, Espanya
Muerte	6 de mayo de 2001 Zaragoza, Aragón
Partiu	Partido Popular de Aragón
Profesión	Politico y avogau
Alma Máter	Universidat de Navarra

Manuel Giménez Abad (Pamplona, 4 d'aviento de 1948 - Zaragoza, 6 de mayo de 2001) estió un politico aragonés perteneixient a o Partido Popular de Aragón y president d'o mesmo, asasinau por a banda terrorista ETA en 2001.

Formación y carrera

Naixiu de Pamplona o 4 d'aviento de 1948, estudió Dreito en a Universidat de Navarra, a on una vegada licenciau impartió docencia, como tamién en l'Instituto Aragonés d'Administración Publica y en a Universidat de Granada.

Pasó a perteneixer a o Cuerpo Superior d'Administradors Civils d'o Estau. Astí ocupó relevants puestos, como Secretaire de l'Instituto d'Estudios Administrativos, Chefe d'a Sección de Selección y Perfeccionamiento de Funcionarios de Titulación Superior, y Consellero Tecnico.

Siempre ligau a l'administración, ingresó en a Deputación Cheneral d'Aragón, a on en 1995 plegó a o cargo de Consellero de Presidencia y Relacions Institucionals d'o Gubierno d'Aragón.

En 1999 fue eslechiu deputau a las Corz d'Aragón por o Partido Popular, y dimpués senador por a Comunidat Autonoma d'Aragón.

O 24 de febrero de 2001 fue nombrau president d'o Partido Popular de Aragón, sustituyindo en o cargo a Santiago Lanzuela. Iste asumió a dirección d'o partiu en un momento critico debiu a la presión social en Aragón contra o Plan Hidrolochico Nacional y o trasvase de l'Ebro.

Asasinato

O 6 de mayo de 2001 n'iba con un d'os suyos fillos a o estadio de la Romareda de Zaragoza a veyer un partiu de fútbol d'o Real Zaragoza cuan un miembro d'a banda terrorista ETA le pretó tres tiros por a esquena, dos d'els en o tozuelo. Os servicios sanitarios plegoron ascape ta o puesto, pero no pudioron reanimar-lo.

A o día siguient, se fació una gran manifestación en a capital aragonesa d'a que facioron parti más de 350.000 personas, convocada por todas as fuerzas politicas, en repulsa por o crimen. Os suyos funerals y sepelio se facioron en a localidat de Chaca (Uesca), a on heba pasau gran parti d'a suya choventut. A o funeral acudió l'alavez president d'o Gubierno, José María Aznar.

Homenaches

Placa en memoria de Giménez Abad.

Un día dimpués d'o suyo asasinato, o Concello de Zaragoza lo nombró fillo adoptivo d'a ciudat. O 20 de mayo d'ixe mesmo mes, os suyos fillos reculloron de mans d'o president d'o Real Zaragoza, Alfonso Soláns, a títol postomo, a insignia d'oro y brillants, a maxima distinción d'o club, d'o que yera socio Giménez Abad. Días dimpués, as Corz d'Aragón le imposoron a títol postomo a medalla d'a institución. Amás, en 2002 fue inaugurau o puent Manuel Giménez Abad sobre l'Ebro con o suyo nombre, disenyau por Javier Manterola. Tamién en a suya memoria se creyó a Fundación Manuel Giménez Abad d'Estudios Parlamentarios y d'o Estau Autonomico, fundada por as Corz d'Aragón, o Concello de Jaca, Ibercaja y a Caja Inmaculada.

O 5 de mayo de 2021, en o XX cabo d'anyo d'a suya muerte, o Concello de Zaragoza rendió homenache a la suya fegura con o descubrimiento d'una placa informativa en a suya memoria en o puesto a on fue asasinau.