Arroba (simbolo)

L'arroba ye un símbolo que s'emplegaba ta representar a unidat de masa dita arroba: @ (plural @@). Una arroba equibale á la cuatrena parti d'un quintal e prozede de l'arabe الربع (ar-robʿ, cuatrena parti, un cuatreno de quintal, ye dezir 25 libras - 36 libras en Aragón, peso equibalent á 11,502 kg – 12,5 kg en Aragón).

Arroba seguntes a tipografía Arial

En l'autualidat ye muit conoxito por os usuarios de informatica ya que s'emplega ta indicar «en» (at en anglés) en as adrezas de correu eletronico e atros serbizios en linia que fan serbir o formato usuario@serbidor.

Origen

O suyo orichen se troba en una ligadura, primero caligrafica e dimpués tipografica, que representaba en a tradizión paleografica anglosaxona á la preposizión latina ad u, seguntes atras fuents, a conchunzión at; en as diferents bariedaz d'a escritura gotica cursiba castellana, e espezialment en a dita escritura prozesal representa á lo digrafo an. Aintro d'o codigo ASCII, se puet representar con o dichito 64.

O periodico britanico The Guardian publicó que unos imbestigadors italians eban trobato a primera representazión escrita d'iste simbolo. Aparexió en una carta nimbiata por un mercader italián en l'año 1536, dende Sebilla enta Roma; en a carta se describe a plegata de tres barcos cargatos con tresoros probenients d'America: «Así una @ de vino, que es 1/13 de un barril, vale 70 u 80 ducados...». Manimenos, atras imbestigazions han trobato o simbolo de l'arroba en a taula de Ariza de 1448, en una dentrata de trigo en o Reino d'Aragón dende Castiella .