Escode
Se diz escode[1] a la operación que practican os pastors consistent en tallar a codas a os corders deixando-los nomás con cuatre didos de largo. Practican ista operación metendo a coda sobre un lenyo y tallando-la con un trucazo cerenyo dau con un buen cutiello en o puesto por a on conviene.
Gosan tamién os pastors prener a l'animal entre as piernas y tallar-le a coda con una novalla u cutiello y a vegadas le'n quitan retorciendo-la dica que se desprende. Pero de cualsiquier traza, siempre rematan a operación aplicando un poco de cenisa en a ferida.
O tiempo d'escodar ye en primerías de primavera y os pastors que creyen en a influyencia d'a luna, reservan ista operación pa la luna en mingua. En bels puestos se deixan as colas a o ganau lanar pero o ganau fino y transhumant las tiene siempre talladas. O bardo que se pega y ixeca en as extremidaz d'as colas largas, azota y estrafalla as garras de l'animal cuan corre y muitos d'éls, febles, mueren en os terrenos montanyencos, porque en agavillar-se a coda a las matas, no tienen prou fuerza pa crebar a branca que las enreta, u pa deixar en ella a lana enretada.
En Aragón no s'escodan as uellas martas, ya que se piensa que tienen o poder de protecher a tot o rabanyo d'os rayos y as malautías y d'estar escodadas u marcadas se reducirían as suyas propiedaz machicas.[2]
Referencias
editar- ↑ (an) Diccionario aragonés-castellano-catalán. Versión preliminar. Estudio de Filología Aragonesa. Edacar num. 14. Zaragoza. Edicions Dichitals de l'Academia de l'Aragonés. ISSN 1988-8139. Octubre de 2024.
- ↑ (es) Bizén d'o Río Martínez, "Ritos, mitos y tradiciones de la ganadería altoaragonesa", pp. 183-188 en I Congreso de Aragón de Etnología y Antropología (PDF), Institución Fernando el Católico, 1981, ISBN 84-00-04802-4
Vinclos externos
editar
Datos: Q20014541
