Comanda de Villel

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

La Comanda de Villel estió una comanda primero templera y dimpués hespitalera con seu en Villel que incluyiba ames las localidaz de Bellestar, Libros y Río Deva. Yera situada entre lo Rincón d'Ademuz (Reino de Valencia) y la Comunidat de Teruel (Reino d'Aragón), fendo part d'este zaguero reino.

Los templers emprendioron prochectos de colonización y repoblación con cristianos aragoneses y d'atros orichens en esta comanda. Las cartas de población de cualques localidaz d'esta comanda son escritas en aragonés. Manimenos en Villel quedó una important población musulmana.

Cuan por orden papal la Orden de lo Temple fue disuelta a principios de lo sieglo XIV la comanda de Villel estió una de las comandas templeras que presentoron resistencia a lo exercito de Chaime II d'Aragón. Manimenos lo Castiello de Villel remató capitulando.

Las Cronicas de los Chudeces de Teruel n'informan, dicindo cosas como:

Fue cercada Villuel que era del Temple. (1307, versión BAR).

Fue cercada Villel porque se estrujo el Temple. (1307, versión B).

Fueron estroidos los templeros. (1307, versión A).

En esti año fue destruido el Temple et el Papa Juan XXII dio la sentencia en Viana et fizieron estrado et vestidos de duelo porque destruian tan alta orden et fueron vestidos de maregas; aquel año fueron sobre Villel et todos los otros lugares de los templeros destruidos et cercados. (1307, versión AHT, la mes tardana).

La bula de lo 2 de mayo de l'anyo 1313 disposó que las propiedaz europeas de los templers pasasen a depender de la Orden de lo Hespital. Lo rei Chaime II d'Aragón pretendió adhibir las propiedaz templeras a lo patrimonio reyal y nombró administradors pa las diferents comandas en l'anyo 1312. Dimpués d'unas negociacions las comandas templeras situadas en lo Reino d'Aragón y en Catalunya pasoron a los Hespitalers. Lo ixamplamiento territorial de la orden estió tan gran que habioron de fer una reorganización administrativa y creyar la Castellanía d'Amposta lo 26 de chuliol de 1319 pa las anteriors comandas templeras que yeran en lo Reino d'Aragón, como yera lo caso de la Comanda de Villel.

En lo fogache de 1495 encara se menciona a la Comanda de Villel.

Por lo menos en ciertos periodos temporals tamién ha perteneixiu a la Comanda de Villel la localidat de Cabronciello, mesmo cuan a principios de lo sieglo XIX yera una simpla partida de lo termin de Rio Deva.

Bibliografía

• (es) Antonio Ubieto Arteta: Historia de Aragón Divisiones Administrativas, Anubar, 1983.
• (ca) Enric Guinot: Els límits del regne, el procés de formació territorial del País Valencià Medieval (1238-1500). Edicions Alfons El Magnànim. 1995.
• (es) Antonio Gargallo Moya: El Concejo de Teruel en la Edad Media volumen I. Instituto de Estudios Turolenses, 1997.

• Datos: Q20604225