Caixubos

Caixubos Kaszëbi
Territorio etnico caixubo a fins d'o sieglo XX.
Población total
50.000 - 500.000
Rechions con comunidatz importants
Polonia
Idiomas
Caixubo
Relichión
Catolica (mayoritaria) Luterana (minoritaria)
Pueblos relacionatos
Pueblos eslavos

Os caixubos son un pueblo que habita l'este de Pomerania y a zona d'o corredor de Danzig y son en camín d'asimilación a los polacos. Charran una luenga eslava occidental, o caixubo, que ye d'una branca diferent a lo polaco, y son cristians catolicos u luterans.

A prencipal ciudat d'os caixubos ye Wejherowo (Wejrowo en caixubo). Entre as ciudatz grans de Polonia, Gdynia (Gdiniô en caixubo) ye a que tién o porcentache més alto de caixubos.

Modo de vida tradicional

Os caixubos yeran tradicionalment agricultors y tamién bi n'heba que se dedicaban a la pesca. Huei os caixubos gosan dedicar-sen a l'agricultura y o sector servicios, como por eixemplo l'agrotorismo.

Historia

Han tenito una larga historia como pueblo baixo dominio alemán mientres o reino de Prusia, minorizato en a expansión alemana enta l'este, pero que no se chermanizó como os atros vendos. Os polacos consideran a los caixubos como parte d'o pueblo polaco. Pa o estato polaco a presencia d'os caixubos eslavos, consideratos como polacos, estió una ferramienta politica pa chustificar a inclusión d'o corredor de Danzig en Polonia mientres as discusions d'o Tractato de Versailles, considerando que ya i heba una población polaca antiga.

Caixubos famosos

• Günter Grass, escritor en luenga alemana, qui en beluns d'os suyos libros, como O tambor de lata (Die Blechtrommel) (1959), admite a suya identidat caixuba.
• Gerard Labuda, historiador.
• Aleksander Majkowski, escritor.
• Danuta Stenka, actriz.
• Donald Tusk, politico, líder de Platforma Obywatelska.