Nogará
L'Asociación Cultural Nogará – Religada, conoixida tamién como Nogará, ye una asociación cultural que los suyos fins son estudiar, extender, amostrar, promocionar, desfender, socializar y normalizar la luenga y cultura aragonesas. Nogará se funda en Zaragoza en 1991, an contina realizando la suya labor.
Historia
editarL'Asociación Cultural Nogará – Religada se funda en 1991 per Chabi Gimeno, Pablo León y Antoni Ripoll con l'obchectivo de treballar per la recuperación d'a luenga y cultura aragonesas y con o compromiso que estase un espacio plural en o cual cullisen totas las visions y sensibilidaz sobre Aragón y sobre la luenga aragonesa.
En os suyos primers anyos, l'actividat de Nogará se centró en a realización d'actividaz ludicas en a Casa de Choventut d'o Casco Viello de Zaragoza, la cuala plegó a chestionar entre un periodo de tiempo. Estes inicios de Nogará marcoron la esencia de l'asociación, establindo una base de socialización y convivencia en aragonés como traza de transmitir y perpetuar la luenga y cultura aragonesas. Este carácter socializador ye lo que levó a la fundación d'a penya de fiestas Nogará, que entre anyos yera la mas conoixida entre los movimientos socials zaragozans. Tamién levó a la creyación d'a cafetería Borina, que estió un important punto de trobada pa las personas aragonesofablans de Zaragoza. La socialización, un d'os pilars fundamentals de l'asociación dende los suyos inicios, facilitó la encorporación de nuevas personas socias y lo desenrollo de nuevos prochectos.
De forma adicional, luego s'empecipió a crear un sistema d'ensenyanza d'a luenga aragonesa que resultó en a creyación d'a primera Escuela d'Aragonés de Nogará en 1996. En a suya Devantadera estioron personas que han destacau en o panorama social aragonés como Emilio Gastón (Chusticia d'Aragón) y Chesús Bernal (deputau d'as Corz d'Aragón).
Lo compromiso de Nogará con una percepción global d'a luenga, que agrupase totas las sensibilidaz y puntos de vista sobre la mesma, levó a empentar, de conchunta con atras asociacions, lo proceso de Chuntos per l’aragonés. Dende lo I Congreso ta ra Normalizazión de l’Aragonés de 1987, s'arrocegaba una problematica arredol d'a normativización d'a luenga, ya que no existiba un refirme total, ni entre las personas fablants nativas ni entre una gran parte d'o movimiento de defensa d'a luenga aragonesa. En chinero de 2005 se celebró en Uesca una asemblea historica entre asociacions y personas d'o mundo d'a luenga aragonesa. Como resultau d'esta asemblea, s'aprebó lo Manifiesto per la unidat d'a Luenga Aragonesa que recibió l'adhesión de 4200 personas, 180 entidaz (entre asociacions, interpresas, clubs, sindicatos, etc.), 44 concellos, 5 comarcas, la Deputación Provincial de Uesca y la Deputación Provincial de Zaragoza. D'esta asemblea naixió lo proceso Chuntos per l’aragonés con l'obchectivo de sensibilizar a la sociedat aragonesa y crear una autoridat lingüistica d'a luenga aragonesa, en o cual l'Asociación Cultural Nogará – Religada participó de forma activa como parte dinamizadora d'o mesmo. Lo proceso Chuntos per l’aragonés, culminó en 2006 con a celebración d’o II Congreso de l’Aragonés en o cual se proclamó, con o refirme de cuasi tot lo movimiento de defensa de l'aragonés, l’Academia de l’aragonés baixo lo nombre d’Estudio de Filolochía Aragonesa.
Entre los suyos mas de 30 anyos d'existencia, l'Asociación Cultural Nogará – Religada s'ha convertiu en un referent dentro d'o mundo d'a luenga aragonesa a causa d'a suya implicación con a dignificación d'a luenga y la labor desenvuelta en o fomento de l’estudio y d'a investigación de l'aragonés. En l'actualidat, entre las numerosas actividaz que se fan dentro de l'ambito asociativo, en a suya mayoría realizadas per personas socias y voluntarias, se troban:
- l'estudio y un mayor conoixencia d'a luenga y cultura aragonesas,
- la difusión d'ixes conoixencias pa que la ciudadanía pueda acceder a ellas,
- la ensenyanza d'a luenga aragonesa a traviés d'a suya Escuela d’Aragonés,
- la socialización en luenga aragonesa,
- la promoción d'a cultura musical aragonesa y d'os artistas graficos aragoneses.
L'Asociación Cultural Nogará – Religada ha estau pionera en l'uso d'as nuevas tecnolochías pa la difusión d'a luenga aragonesa. Eixemplo d'ixo estió la creyación, en 1994, d'a primera pachina web en aragonés, d'a man d'os periodistas Jorge Romance y Rubén Ramos. En l'actualidat la suya presencia en rez ye muito elevada.
- Evolución d'o Logotipo de Nogará
-
-
-
-
-
Organización
editarNogará ye una asociación con independencia organizativa d'atras entidaz (asociacions, partius politicos, sindicatos, etc.) y tiene unas bases bien definidas que se fundamentan en os prencipios democraticos de chusticia, igualdat, solidaridat, integración social, libertat y respecto per la naturaleza, lo meyo ambient y las diferencias personals y ye defensora d'a paz como prencipio pa la convivencia entre los lugars. Amás, Nogará desfiende lo respecto a la diversidat, en o suyo sentiu mas amplio y, especialment, a la orientación sexual, a la identidat de chenero y a l'orichen cheografico y/u etnico d'as personas, condenando cualsequier postura u acción que supose una violación d'estes prencipios. L'Asociación Cultural Nogará – Religada se define como feminista.
L'Asociación Cultural Nogará – Religada se basa en o prencipio de horizontalidat, en a cuala toz los miembros tienen la mesma capacidat d'influencia y decisión. En esta estructura los grupos participan de totas las etapas d'o proceso, dende la fase d'analisi u deliberativa, la resolución de conflictos y la de decisions.
L’Asemblea Cheneral ye l’organo supremo de gubierno de l'asociación y ye integrada per totas las personas socias.
La Comisión Permanent ye un organo de chestión y representación de l'asociación, compuesto per los cargos de Secretaría, Tresorería, Coordinación d'as Collas de treballo (en l'actualidat: Local, Amostranza, Actividaz y Comunicación), Representación territorial y Vocalías. Baixo lo prencipio de horizontalidat de l'Asociación, no existe la figura d'a Presidencia.
Escuela d’Aragonés
editarLa Escuela d’Aragonés de l'Asociación Cultural Nogará – Religada estió creada en 1996. D'a suya chestión s'encarga la Colla d’Amostranza y ye compuesta per personas socias de l'asociación, con un libel d'aragonés reconoixiu, que exercen esta labor docent de forma voluntaria.
En l'actualidat, Nogará ofreix cursos propios de luenga aragonesa estructuraus en 3 libels de dificultat. Dende lo curso 2023-24, estes cursos se troban completament adaptaus a la norma lingüistica oficial de l'Academia Aragonesa d'a Luenga.
Los cursos ofiertos per Nogará siguen formatos presencials, semipresenciales (connexión en directo con as clases presencials) y online (a traviés d'a plataforma d'aprendizache Moodle).
Amás d'os cursos propios, Nogará colabora con atras entidaz y institucions pa la realización de cursos d'a luenga aragonesa. Cualques d'ellas son lo Concello de Zaragoza, lo Concello de Villamayor de Galligo, lo Concello d’a Muela, la Comarca d'A Plana de Uesca, la Deputación Provincial de Zaragoza u diversas Asociacions. Tamién ha colaborau con a ONCE en a impartición d'un curso de luenga aragonesa pa personas invidents.
Actividaz y prochectos
editarL'Asociación Cultural Nogará – Religada realiza y empara actividaz y prochectos muit variaus.
Actividat editorial
editarEn l'anyo 2002, Nogará prencipió la edición d'una revista periodica clamada “O Espiello” y que estió activa entre los anyos 2002 y 2011, con una edición especial en l'anyo 2016. Esta revista buscaba reflectar la pluralidat d'as variedaz de l'aragonés y d'os prochectos que se cheneraban arredol d'a luenga, pero sin ixuplidar-se de temas actuals, como las nuevas tecnolochías, la ciencia u la cultura. Entre las suyas seccions habituals se trobaba una sección de noticias relacionadas con l'aragonés y unatra de noticias d'actualidat, entrevistas y reportaches, recesions literarias u musicals, apuntes de gramatica aragonesa y tamién una muito especial dedicada a los mas chicoz.
Nogará ha aduyau a desenrollar cuantos prochectos literarios per medio d'a edición de libros.
-
Ucronía, de Dabi Lahiguera -
Punto Seguiu, de Dabi Anquela y Martín Galbe -
Parola de follet, de Carlos G. Esteban -
Penchada d'un filo, de Carlos G. Esteban
Actividat musical
editarEn l'anyo 2017 naixe O Zaguer Chilo como un prochecto pa la creyación de material musical actual en luenga aragonesa. En esta primera edición, 20 grupos d'a escena musical actual aragonesa cantoron una d'as suyas cancions en aragonés pa este disco recopilatorio. L'exito d'a primera edición estió immediato y una d'as cancions presents en o disco recibió lo Premio a Millor Canción en Luenga Autoctona d'os Premios d'a Mosica Aragonesa y atras tres cancions mas recibioron nominacions en esta categoría.
En l'actualidat, O Zaguer Chilo conta con 6 edicions, en as cualas da cullida a 120 grupos y cancions actuals cantadas en luenga aragonesa, con estilos tan diversos como pop, rock, rap, punk, hip-hop, folk, flamenco, tradicional, medieval, etc. Las cancions que forman parte d'este prochecto han recibiu 23 nominacions en os Premios d'a Mosica Aragonesa, d'as cualas en han ganau 4. La portiada d'a 5ª edición, treballo d'a disenyadora grafica Eva Cortés, ganó lo Premio a la Millor Portiada de 2022, con o suyo homenache a l’álbum “Con el agua al cuello” d’Ixo Rai!
- Portadas d'os discos d'O Zaguer Chilo
-
-
-
-
-
-
O Zaguer Chilo ye un prochecto desenrollau per l'Asociación Cultural Nogará – Religada con a colaboración d'o Concello de Zaragoza a traviés d'o Laboratorio Audiovisual de Zaragoza.
Actividat audiovisual
editarNogará ha participau en cuantos prochectos audiovisuals:
- Charrín charrán: ye lo primer programa de televisión integrament en luenga aragonesa, con formato de magazín, que repasa diferents aspectos sobre l'actualidat social y cultural d'a comunidat dende una perspectiva choven y desenfadada. Nogará empentó este prochecto y colaboró con a productora como asesoría lingüistica.
- Albert: ye lo primer largometrache doblau de forma profesional a la luenga aragonesa. Estió un prochecto completament desenrollau y financiau per Nogará que buscaba crear contenius en aragonés pa toz los publicos.
Estudios arredol d'a luenga aragonesa
editarNogará ha estau una fuent d'emparo a investigacions y estudios que se realizan arredol de l'aragonés. Ha colaborau pa lo desenrollo de:
- Fau Blimming, Erik (2019). The Aragonese resistance. A qualitative study on the attitudes and motivations of new speakers of an endangered language in Zaragoza. (Master’s Thesis). Uppsala University.
- Ibáñez Alcázar, Alejandro (2021). El aragonés en la red. Presencia, uso y aprendizaje (Trabajo Final del Máster). Universidad Nacional de Educación a Distancia.
Creyación de materials didacticos
editarComo una forma d'emparo pa la Escuela d’Aragonés de Nogará, l'Asociación Cultural Nogará – Religada desenrolla materials didacticos que se pueden trobar en a suya pachina web. Entre éls se troban:
- Manual de conchugación de verbos aragoneses
- Diccionario visual
- Infografías sobre gramatica
- Infografías sobre vocabulario
L'Asociación Cultural Nogará – Religada colabora con l'Instituto de Montaña (CSIC – Universidat de León) en o desenrollo d'o Calandario Cientifico Escolar pa acercar la cultura cientifica a la población mas choven a traviés d’aniversarios cientificos diarios.
- Calandario Cientifico Escolar
-
-
-
Actividaz de divulgación
editar
En o mes d'abril, Nogará organiza las Chornadas d’as Luengas d’Aragón. Se trata d'una serie de charradas, seminarios y actividaz de libre acceso a la ciudadanía que pretenden afondar en a conoixencia d'as luengas d'Aragón, a traviés d'a divulgación d’estudios cientificos sobre las mesmas, u dar a conoixer prochectos y actividaz en relación a l'aragonés y a lo catalán d'Aragón. En l'anyo 2024 se celebró la edición 30 d'estas Chornadas d’as Luengas d’Aragón.
Actividaz de socialización
editarL'Asociación Cultural Nogará – Religada organiza viaches y convivencias con personas que charran aragonés de forma nativa, en os puestos en os cuals se charra l'aragonés.
A lo largo de l'anyo, tamién realiza chentas de chermandat, conciertos, participa en as fiestas d'o vico d'a Madalena de Zaragoza, recreación d'a Tronca de Nadal, realiza de tallers sobre temas diversos, exposicions, visitas turisticas, chuegos tradicionals, concursos literarios, etc.
Atros prochectos y actividaz
editarAmás, Nogará tamién colabora con diversas asociacions y entidaz y participa en diferents prochectos, como Trobada Vivir en Aragónes (Colla Nabarra de Fablans), D’estrela a estrela, Cincomarzada, Feria d’o libro aragonés de Monzón y de l’Almozara. Zinentiendo, biera Religada (con Ordio Minero), Charradas en aragonés (con Ordio Minero), Día d'o Libro, Zaragoza en Corto...
Se veiga tamién
editarVinclos externos
editar
Datos: Q3331377
