As bestas
As bestas (títol orichinal en gallego, en aragonés As bestias, enguerada en Aragón co o suyo títol orichinal) ye una cinta de cine de drama d'intriga coproducida por o cine espanyol y lo cine francés, enguerada l'anyo 2022, dirichida por Rodrigo Sorogoyen seguntes un guión orichinal d'Isabel Peña y Rodrigo Sorogoyen, con una banda sonora orichinal d'Olivier Arson, una dirección de fotografía d'Alejandro de Pablo Pérez y una producción cinematografica de Thomas Pibarot, Anne-Laure Labadie, Jean Labadie, Rodrigo Sorogoyen, Nacho Lavilla, Eduardo Villanueva, Sandra Tapia Diaz, Ignasi Estapé y Ibon Cormenzana. Conta con un elenco formar por os actors Denis Ménochet, Marina Foïs, Luis Zahera, Diego Anido, Marie Colomb, Machi Salgado y Luisa Merelas, entre d'atros.
As bestas s'inspira en un feito real, un asasinato cometiu en chinero de 2010 en a parroquia de Santoalla do Monte en o termin municipal de Petín en a provincia gallega d'Ourense, cuan uns vecins d'o lugar asasinoron a una parella neerlandesa. En a cinta se conta cómo Antoine, un francés, s'instala en una chicota aldeya gallega acompanyau por su muller Olga. Bien luego prencipia a tener friccions con dos chirmanos d'o lugar, Anta y Lorenzo, motivaus por o feito que los chirmanos quieren vender bellas propiedaz ta que se i instale un parque eolico, y Antoine se niega en estar un ecolochista convenciu. Os atros vecins d'o lugar, encara que no comparten as formas d'os chirmanos, tamién deseyan vender as suyas propiedaz a lo parque eolico, y ka parella francesa se troba cada vegada mas acosada, y marchan a denunciar os feitos a la Guardia Civil, pero en realidat no fan cosa y nomás li dicen que prebe de dialogar con os vecins d'o lugar. Bien luego Antoine decide grabar os acosos d'os chirmanos, que plegan a emponzonyar l'augua que fan servir ta regar as verduras d'o suyo huerto, pero ixo encara enaltera mas a los chirmanos, que menazan con un arma a la parella. Cuan muere lo solo vecino que tamién s'oponeba a lo parque y por contra lo suyo fillo y hereu l'accepta, la parella francesa se troba sola. Finalment, los chirmanos asasinan a Antoine, encara que iste ha amagau una camara y ha grabau lo suyo asasinato. Tanimientres, no se troban prebas d'o crimen, dica que un anyo dimpués Olga troba la camara, encara que con o dispositivo de grabación danyau.
A cinta s'ambienta en a suya epoca actual (2022) en bel puesto indeterminau de Galicia, y las suyas escenas se filmoron en o lugar de Quintela en o termin municipal de Barxas, en Ponferrada y Vilafranca del Bierzo (Leyón, Castiella y Leyón) y en Becerreá (Lugo, Galicia).[2]
As bestas ye una cinta que ha recibiu cuantos premios y nominacions, en destacando entre éls nueu Premios Goya (Millor Cinta, Millor Dirección, Millor Guión Orichinal, Millor Actor, Millor Actor Segundario, Millor Fotografia, Millor Montache, Millor Musica Orichinal y Millor Soniu) y ueito nominacions (Millor Actriz, Millor Actor Segundario, Millor Actriz Segundaria, Millor Dirección Artistica, Millor Disenyo de Vestuario, Millor Maquillache y Peluquería, Millors Efectos Especials y Millor Dirección de Producción) en a suya 37ena edición, un Premio César a la Millor Cinta Forana en a suya 48ena edición y un Premio David de Donatello a la Millor Cinta Forana en a suya 69ena edición.
| Actor | Papel | Notas |
|---|---|---|
| [[]] | ' |
Se veiga tamién
editarVinclos externos
editar
Referencias
editar- ↑ 1,0 1,1 (en) Enguero d'As Bestas en Internet Movie Database.
- ↑ (es) Localizacions d'As Bestas en Internet Movie Database.
- ↑ (en) As bestas en Internet Movie Database.
| Premios Goya | ||
|---|---|---|
| Predecesor: El buen patrón |
Premio Goya a la Millor Cinta 2023: 37ena edición |
Succesor: Pendient |
Datos: Q108919489
Multimedia: As bestas / Q108919489
