Wikipedia:Plurilingüismo temerario
Qualques vegadas en Biquipedia, a Wikipedia en idioma aragonés, i puede amaneixer articlos escritos per editors que, lamentablement, no tienen prou conoiximientos d'a luenga aragonesa y que, anque conoixen belaltras luengas relacionatas, piensan erroniament que se defensarán bien en aragonés sin precisar garra mes conoiximiento.
Ista clase d'actitut puede producir-se, aleatoriament, per partes d'os parlants d'una luenga cara ta qualsiquiera d'as que les sona pareixitas (probablement no afecta nomás a l'aragonés) y se troba facilitada per as tecnolochías d'a información y especialment per as facilidatz que ofreix a tecnolochía Wiki. De la dita actitut, en Biquipedia, en decimos «Plurilingüismo temerario» per os problemas que puede creyar.
A experiencia nos ha demostrato que d'entre os editors de tot ixa clase d'articlos, en i ha buena cosa que lo fan perque, innocentment, piensan que como l'aragonés ye una luenga romance que se parla en a Peninsula Iberica y, principalment, que lo suyo territorio de destrubución presenta mugas con os territorios en os que se parla castellano y catalán, ista luenga be d'estar necesariament un tremescluz d'entre ixaltras dos luengas, que a sobén son millor conoixitas y con mes parladors.
Per lo que hemos puesto comprebar, tamién en i ha bells altros que simplament se miran ta escribir bell texto (a sobén, curtet) con a voluntat d'experimentar con ista luenga y/u satisfer qualque curiosidat (que puede incluir si l'articlo se correchirá u no). Puede estar que en ixes articlos se faiga servir estructuras u trazos gramaticals y morfolochicos d'as dos luengas debantditas, u d'altras luengas ibericas cheograficament més aleixatas, como l'asturleyonés, o gallego u dica lo portugués.
Si yes un usuario que s'ha advertito sobre iste aspecto, no t'apures. Confiamos en a tuya capacidat ta millorar os tuyos conoiximientos de luenga aragonesa y hemos puesto comprebar como bells usuarios, anteriorment, s'han trobato en situación pareixita y a la fin s'han tornato editors habituals en arribando a dominar bien l'idioma.
Cuenta que l'aragonés no ye una luenga dificil si conoixes unaltra luenga latina (u mes d'una). Si te piensas de fer un poder, Biquipedia ye un buen puesto a on que aprender-ne, pero caldrá que pienses en isto:
Buena fe editar
En totz os casos mentatos y en belaltros, anque as razons que impulsan a un editor novel a mirar-se ta escribir un articlo en «lo que ell suposa que be d'estar l'aragonés» son tan diversas como diferents son as presonas que en escriben, en o mundo wikipediano existe un prencipio elemental que se diz «presumpción de buena fe» (puetz trobar información sobre iste conpcepto en francés, anglés u espanyol), per lo que os usuarios habituals y os administradors nos femos obligatos a contar que ixa actitut se debe a pur desconoiximiento d'a luenga y no pas a una mala voluntat de l'usuario.
L'actuación en conseqüencia con ixe prencipio nos fa advertir a l'usuario afectato sobre aquelo que fa malament y fer-le saber cómo puede millorar as suyas contrebucions en a wikipedia en aragonés, y en o tema que mos ocupa, isto se traduce en qualques recomendacions que consellaremos que l'usuario cumpla.
Tot isto gosa significar que si yes un/a usuario/a relativament nuevo/a en Biquipedia, y bell altro usuario ta endrezato enta aquí, no te'n has de fer apuro perque la suya voluntat ye informar-te d'un problema que nos pasa a sobén, y en a mesura posible, que prengas conoiximiento de si te trobas en a situación que en ista pachina describimos y si puedes fer bella cosa ta millorar (como p. ex. aprender/amillorar o tuyo aragonés) d'antes no te tires a fer articlos. Piensa que Biquipedia, con o numer tan gran d'articlos que tiene, ye un buen puesto ta comenzar a leyer textos en luenga aragonesa que te familiarizarán con a fonetica y caracteristicas de l'idioma, y te servirán d'aduya ta que sias capable ta diferenciar os trazos de l'aragonés contra las altras luengas romances que agora yes mescluciando.
Articlos que podrán borrar-se editar
Anque en Biquipedia, en prencipio, i son biemplegatos totz os articlos y contrebucions utils, as pachinas y contrebucions con calidat lingüistica qüestionable suposan un problema que creix si se i acumulan.
Per iste motivo, os administradors de Biquipedia tenemos a necesidat de controlar o numer d'articlos redactatos con deficiencias, que cas extrimo de descontrolar-se podrían arribar a poblar buena cosa d'o corpus enciclopedico d'ista wikipedia, en comprometendo la percepción externa d'o nuestro idioma y d'a nuestra enciclopedia.
En iste sentito, os administradors nos reservamos o dreito d'eliminar os articlos que sian escritos en un aragonés deficient per man d'usuarios que s'haigan advertitos sobre o problema, lo que no quiere decir que si istes usuarios manifiestan (y demuestran) una voluntat d'amillorar o suyo nivel d'aragonés no puedan simplament estar monitoreyatos y dica contar con l'aduya d'os administradors.
A decisión de borrar un articlo no se prenerá sique quan l'usuario que l'ha feito actúe de forma que faiga entender que se desentiende d'ell, en habendo-lo escrito dimpués d'haber feito bell altro (u bells altros) articlos en condicions semellants y que se l'haiga advertito (ixo ye, demostrando que no para garra cuenta con o que le decimos), y siempre con a finalidat de no trobar-nos desbordatos per o numer d'articlos que de qualsiquier altra forma amenistarían un treballo addicional per parte nuestra, ta reformar-los y meter-los en condicions.
Os articlos anisolatos, popiellos u que no faigan parte d'un corpus d'articlos relacionatos tamién podrán borrar-se per lo problema a largo termin que puede suposar de no retrobar-los quan unaltro usuario escriba sobre ixe tema.
Consellos ta os administradors editar
- Quan bell usuario escriba lo suyo primer articlo con deficiencias lingüisticas, vale millor no borrar-le-ne y meter l'articlo a cosirar; prou que s'entiende que si ye escrito en aragonés, y no en qualsiquier atra luenga. Per cuentas d'ixo, conviene advertir-le-ne amablement y no borrar dica que se veiga claro que insiste en a suya actitut.
- Ista pachina s'ha creyato ta informar a qualques perfils de nuevos usuarios que ya conoixemos. Si se considera oportuno, dar-le a entender que cal que se la leiga puede sevir ta no fer que marche disuadito, u pensando-se que no apreciaremos a suya buena voluntat.