Vicepresident d'o Gubierno d'Espanya

A vicepresidencia d'o Gubierno ye a segunda fegura mas important d'o Gubierno espanyol. O vicepresident d'o Gubierno, tradicionalment, gosa estar a la vegada o menistro d'a Presidencia, como ocurre actualment, en que ye titular d'o Menisterio d'a Presidencia, Relacions con as Cortz y Memoria Democratica. Ye nombrau, a propuesta d'o president d'o Gubierno, por o rei d'Espanya, debant d'o qual ampra churamento u promesa. O suyo mandato, como que o d'a resta d'o Gubierno, ye ligau a o d'o president, cesando automaticament malas que ell lo faiga.

Carmen Calvo, actual vicepresidenta primera d'o Gubierno d'Espanya
Nadia Calviño, actual vicepresidenta segunda d'o Gubierno d'Espanya
Yolanda Díaz, actual vicepresidenta tercera d'o Gubierno d'Espanya
Teresa Ribera, actual vicepresidenta quatrena d'o Gubierno d'Espanya

L'actual vicepresidenta primera d'o Gubierno d'Espanya ye Carmen Calvo, doctora en dreito constitucional nombrada por o president d'o Gubierno, Pedro Sánchez. A vicepresidenta Calvo ye a ventena primera presona en tener dita posición y a quatrena muller en fer-lo. Chunto a ella, existen atras tres vicepresidencias, ocupadas por Nadia Calviño (segunda), Yolanda Díaz (tercera) y Teresa Ribera (quatrena).

HistoriaEditar

A vicepresidencia d'o Gubierno d'Espanya, igual que a presidencia, se remonta a lo sieglo XIX. Una parte d'a doctrina considera a creyación d'a vicepresidencia en 1925, con a instauración d'o Directorio Civil de Miguel Primo de Rivera, manimenos, as evidencias historicas contrimuestran que ya entre 1840 y 1841 existió o cargo baixo a nombramiento de Vicepresident d'o Consello de Ministros, exerciu por qui posteriorment lideraría o propio Consello, Joaquín María Ferrer.[1][2] Dezaga d'o Vicepresident Ferrer, o cargó no tornó a utilizar-se ni estió replegau por garra Constitución ni lei posterior dica o sieglo XX.

Dando por cumplius os obchectivos pa os quals o Directorio Militar estió creyau, Primo de Rivera transformó o Gubierno d'Espanya en un gubierno civil en 1925, restablindo o Consello de Ministros, a Presidencia d'este y tornando a creyar a Vicepresidencia, que o suyo obchectivo yera sustituyir a o president en os casos d'ausencia u malotía. Iste vicepresident, deciba l'articlo 3 d'o Real Decreto, yera nombrau por o president d'entre os miembros d'o Consello de Ministros.[3] A titularidat d'a vicepresidencia recayió en o subsecretario de Gobernación, Severiano Martínez Anido, que compachinó o cargo con o de menistro de Gubernación.[4]

Con a dimisión de Primo de Rivera y a cayedura d'a monarquía, s'instauró en Espanya a Segunda Republica, que no preveyió en garra momento a existencia d'iste cargo, manimenos, en aviento de 1933[5] o president Lerroux nombró a Diego Martínez Barrio vicepresident d'o Consello de Menistros, cargo a o que renunció tasament tres meses dimpués.[6]

A lo mesmo tiempo que a presidencia, a vicepresidencia cambió de denominación con a lei de 30 de chinero de 1938 a vicepresidencia d'o Gubierno y, con a formación d'o primer gubierno franquista, ista posición recayió en o militar Francisco Gómez-Jordana Sousa. Dende 1938 a 1981 o cargo recayió en militars, con a excepción d'os vicepresidents Torcuato Fernández Miranda (1973) y José García Hernández (1974-1975). A partir de 1981, con una democracia notablement asentada en a sociedat, o president Calvo-Sotelo nombró a un civil como vicepresident, Rodolfo Martín Villa, deseparando definitivament a o poder militar d'o poder executivo, situación que se mantiene en l'actualidat.

Amás, dende 1974 existe en Espanya a posibilidat de tener mas d'una vicepresidencia, plegando a tener en qualques periodos tres vicepresidencias. En istas situacions, o cargo de vicepresident pasa a denominar-se Vicepresident Primer d'o Gubierno d'Espanya.

O 9 de chinero de 2020, o recientment trigau president d'o gubierno, Pedro Sánchez, anunció en o marco d'as negociacions pa formar o suyo gubierno, d'o nombramiento d'una quatrena vicepresidencia, un maximo historico de cargos que ostentan ista titulación en o mesmo executivo.

FuncionsEditar

O vicepresident no tiene garra función constitucional concreta. D'alcuerdo con a Lei d'o Gubierno, as suyas funcions serán as que le asigne o president asinas como substituir-lo en caso de vacant, ausencia, malotía u feneiximiento[7].

En estar tamién habitualment menistro d'a Presidencia, asume tamién as funcions d'o cargo, estando istas:[8]

  • Asesorar a o President d'o Gubierno.
  • L'asistencia administrativa a o Consello de Ministros, presidir as Comisions Delegadas d'o Gubierno y a Comisión Cheneral de Secretarios d'Estau y Subsecretarios.
  • L'emparo a o president d'o Gubierno, en particular, en l'exercicio d'as funcions relativas a la preparación y seguimiento d'o programa gubernamental.
  • A coordinación interministerial que le encomienden as disposición vichents, o Gubierno u o suyo president.
  • L'asistencia a o Gubierno en as suyas relacions con as Cortz Chenerals.
  • A preparación, desembolique y seguimiento d'o programa lechislativo d'o Gubierno y, en especial, d'a suya tramitación parlamentaria.
  • As funcions d'emparo material, chestión economico-financiera, personal y, en cheneral, quantas atras que d'ixa naturaleza precisen o president d'o Gubierno y os órganos dependients d'a Presidencia d'o Gubierno.
  • O titular de Presidencia exerce tamién as funcions de Secretario d'o Consello de Ministros.

Estructura d'a vicepresidencia primeraEditar

A vicepresidenta ye actualment y, a la vegada, menistra d'a Presidencia, Relacions con as Cortz y Memoria Democratica y, baixo a suya dependencia dreita se troban[9]:

  • Secretaría d'Estau de Relacions con as Cortz
    • Adreza Cheneral de Relacions con as Cortz
      • Subdirección Cheneral de Coordinación Lechislativa.
      • Subdirección Cheneral d'Iniciativas Parlamentarias.
      • Subdirección Cheneral de Control Escrito.
      • Subdirección Cheneral de Propuestas Normativas y Documentación Parlamentaria.
  • Secretaría d'Estau d'Igualdat
    • Delegación d'o Gubierno pa a Violencia de Chenero, con ran d'Adreza Cheneral.
      • Instituto d'a Muller y pa la Igualdat d'Oportunidatz.
  • Comisionau d'o Gubierno frent a o Reto Demografico.
  • Centro d'Investigacions Sociolochicas
    • Secretaría Cheneral d'o CIS.
    • Departamento d'Investigación.
    • Departamento de Cadieras de Datos.
    • Departamento de Publicacions y Fomento d'a Investigación.
  • Centro de Estudios Politicos y Constitucionals
    • Secretaría Cheneral de Publicacions y Documentación.
    • Secretaría Cheneral de Estudios y Investigación.
    • Cherencia d'o CEPC.
  • Presidencia d'o Consello d'Administración de Patrimonio Nacional.
    • Cherencia d'o Consello d'Administración de Patrimonio Nacional.
      • Adreza d'Administración y Meyos.
      • Adreza d'as Coleccions Reals.
      • Adreza d'Inmuebles y Meyo Natural.
      • Adreza d'Actos Oficials y Culturals

GabinetEditar

A vicepresidencia primera d'o Gubierno poseye como que organo d'asistencia un Gabinet que ye formau, d'alcuerdo con o Real Decreto 595/2018, por:[10]

  • O director d'o Gabinet, con ran de subsecretario.
  • O director Adchunto d'o Gabinet, con ran de director cheneral.
  • Ueito asesors con ran de subdirectors chenerals.

Linia de succesiónEditar

En poseyer Espanya un sistema parlamentario, a Constitución no replega una linia de succesión presidencial. A Lei d'o Gubierno estableix que, en caso de dimisión u cese d'o president d'o Gubierno, o Gubierno en pleno, incluindo o suyo president, se mantiene en funcions dica a esleción d'un nuevo president. Manimenos, i hai dos supuestos en os quals unatra persona distinta d'o president d'o Gubierno ha d'asumir la chefatura d'o Gubierno en funcions: a muerte d'o president u l'ausencia d'o president d'o territorio nacional. En tal caso, de conformidat con l'articlo 13 d'a mencionada Lei, asumen a suplencia[11]:

1) O vicepresident d'o Gubierno, en o suyo caso y, en caso d'existir varios, d'alcuerdo con a suya orden de prelación. 2) Os menistros d'o Gubierno, seguntes l'orden de precedencia d'os suyos ministerios.

Conforme a lo previsto por a lechislación vichent, en caso de feneiximiento u ausencia de l'actual president d'o Gubierno, a presidencia d'o Gubierno en funcions la asumiría a vicepresidenta primera d'o Gubierno y ministra de Presidencia, Relacions con as Cortz y Memoria Democratica, Carmen Calvo.

Vicepresidents segundos, tercers y quartosEditar

En Espanya, existe a posibilidat que, si o president d'o Gubierno lo veye necesario, pueda nombrar a mas d'un vicepresident, habendo habiu en qualques lechislaturas vicepresident segundo y en belunas, mesmo tercer y quarto. A o primer vicepresident d'o Gubierno, en istos casos, se le conoixe tamién como que vicepresident primer d'o Gubierno d'Espanya.

Aquí as listas d'os vicepresidents primers, segundos, tercers y quartos que i hai habiu en Espanya:

Se veiga tamiénEditar

ReferenciasEditar