Tributo d'as Tres Vacas
Se conoix con o nombre de Tributo d'as Tres Vacas a una ceremonia que se celebra anualment cada 13 de chulio en o puerto de La Pèira Sant Martin, que comunica las vals de Varetons en Biarn a lo norte y Roncal a lo sud en Navarra, y que consiste en a entrega de tres vacas por part d'os varetoneses en cumplimiento d'una sentencia arbitral dictada en l'anyo 1375 por l'alcalde d'Ansó y atros cinco ansotanos, y que remataba con as discrepancias entre roncaleses y varetoneses por l'acceso a las pasturas d'as montanyas de verano.
A ceremonia
editarA ceremonia se celebra en a muga entre Navarra y lo Biarn, y consiste en a entrega por part d'os varetoneses de tres vacas, que han d'estar sanas y con deteminadas caracteristicas fisicas: animals de dos anyadas que no han de tener garra defecto ni lesión. L'alcalde d'Isaba, que preside la delegación roncalesa vestida con os traches tradicionals, demana a los varetoneses si son conformes con pagar o tributo, y istos li responden que sí, repetindo-se pregunta y respuesta tres vegadas. Inmediatament dimpués, un d'os varetoneses mete la suya man sobre la monchoya que actualment marca la muga substituyindo a l'antiga piedra de Sant Martín que da lo suyo nombre a lo puerto, y dencima d'a suya man un roncalés y mete la suya, succedendo-se las mans dica que toz os miembros de todas dos delegacions i han meso las suyas. O zaguero en meter a suya man ye l'alcalde d'Isaba, que pronuncia las palabras "Pax avant, pax avant, pax avant", que repiten os varetoneses.
Posteriorment, l'albeitar d'Isaba fa lo reconoiximiento d'o vacumen y dimpués de declarar-lo apto, s'entregan dos a Isaba y lo tercero se reparte rotativament entre Uztárroz, Urzainqui y Garde seguntes a secuencia Uztárroz, Urzainqui, Uztárroz y Garde. DE contino, l'alcalde d'Isaba sinya lo recibo d'as vacas y nombra a los cuatre guardas que ixe anyo cudiarán d'os terrenos de pastura y lis pren churamento. A ceremonia remata con a redacción de l'acta que sinyan toz os representants.
Tradicionalment se celebra una mincha de chermandat, consistent en ternasco a lo chilindrón.
Datos: Q3100145
Multimedia: Hiru behien zerga / Q3100145
