Rompedura (agricultura)

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

A rompedura, rompida u rompimiento d'o suelo en l'agricultura ye l'acción de «romper» a crosta superficial d'o suelo con un aladro en a primer pasada de a labra. «Romper» sirve pa ubrir por primer vez una tierra que ha estau yerma u d'erial un tiempo y que por ixo se l'habrá formau una crosta dura y plena de hierbas que no deixaría de sembrar.

Tractor rompendo a tierra.

A segunda aladrada se diz «mantornar», y sirve ya pa deixar a tierra floixa y presta pa la siembra. En l'actualidat, con os modernos medios de tracción mecanicos y con os aladros de brabant tiraus por maquinaria, as dos accions: romper y mantornar, pueden fer-se con una sola aladrada. Más d'antes lo normal yera que se fese en dos tongadas y con aladros diferents; se rompeba con o cutre u con o rusac, que se podeban tirar con mastos, y dimpués se mantornaba con o guambre u güembre tirau con bueis, de paso más firme y carácter más templau.

En Sos de Cinco Villas, a siembra que se fa a l'arreo d'haber labrau se diz que ye feita «a rompesiembra».

Se veiga tamién

• Labranza.
  • Mantornar.
• Artica / artiga.