Pulp Fiction

Iste articlo ye sobre una cinta estausunidense de cine policiaco; ta atros usos, se veiga Pulp Fiction (desambigación).

Pulp Fiction
Títol	Pulp Fiction
Póster d'a cinta.
Ficha tecnica
Dirección	Quentin Tarantino
Dirección artistica	Charles Collum
Producción	Lawrence Bender
Disenyo de producción	David Wasco
Guión orichinal	Quentin Tarantino
Basau en	una historia de Quentin Tarantino y Roger Avary
Fotografía	Andrzej Sekuła
Montache	Sally Menke
Escenografía	Sandy Reynolds-Wasco
Vestuario	Betsy Heimann
Casting	Ronnie Yeskel Gary M. Zuckerbrod
Actors	John Travolta Samuel L. Jackson Uma Thurman Harvey Keitel Tim Roth Amanda Plummer Maria de Medeiros Ving Rhames Eric Stoltz Rosanna Arquette Christopher Walken Bruce Willis
Color	Panavision Color by DeLuxe Eastmancolor
Datos y cifras
País(es)	Estaus Unius
Anyo	1994
Debantadera	21 de mayo de 1994 (Festival Internacional de Cine de Canas, Canas, Alpes Maritimos, Francia)^[1] 23 de setiembre de 1994 (Festival de Cine de Nueva York, Nueva York, Nueva York, Estaus Unius)^[1]
Chenero(s)	Cine policiaco
Durada	154 min.
Idioma(s)	Anglés Castellano Portugués
Companyías
Productora(s)	A Band Apart Jersey Films
Distribución	Miramax Films
Presupuesto	8-8,5 millons de dólars
Recauto	213,9 millons de dólars
Informacions en bases de datos especializadas:

Pulp Fiction (títol orichinal en anglés, en aragonés Ficción polpa, enguerada en Aragón con o suyo títol orichinal) ye una cinta de cine policiaco de cine estausunidense de l'anyo 1994 dirichida por Quentin Tarantino seguntes un guión orichinal d'él mesmo (basau en una historia d'él mesmo y de Roger Avary), con una dirección de fotografía d'Andrzej Sekuła y una producción cinematografica de Lawrence Bender ta las productoras A Band Apart y Jersey Films. Conta con un elenco d'actors formau, entre d'atros, por John Travolta, Samuel L. Jackson, Uma Thurman, Harvey Keitel, Tim Roth, Amanda Plummer, Maria de Medeiros, Ving Rhames, Eric Stoltz, Rosanna Arquette, Christopher Walken y Bruce Willis.

A cinta conta tres historias deseparadas, cadaguna con os suyos protagonistas, pero que se troban entrelazadas entre ellas, estando los protagonistas de cada hiztoria personaches segundarios d'atra u atras d'as historias. O protagonista d'una d'as tres historias ye Vincent Vega, un mafioso, d'a segunda en ye Butch Coolidge, un boxiador profesional, y lo d'a tercera historia en ye Jules Winnfield, o socio de Vincent en os suyos delictos. Istas tres historias se desembolican en cuatre series diferents (encara que la primera y la zaguera son en realidat a mesma, en o mesmo escenario, estando la zaguera la continación d'a primera) y con un preludio y deseparación entre cadaguna d'as escenas. Vincent ye, como s'ha dito, un mafioso que, como Jules, treballa ta Marcellus Wallace, y que acaba de tornar d'os Países Baixos. Buth ye un boxiador que ha amanyau un combat de boxeyo con Marcellus pero que finalment l'enganya, y Jules ye un personache que bien luego de veyer o que él creye que ye un miraglo se replanteya la suya profesión de farute.

A cinta s'ambienta en a ciudat de Los Angeles en California en a suya epoca actual (1994) y las suyas escenas se filmoron en Los Angeles, Beverly Hills, Glendale, Pasadena y Hawthorne en California.^[2]

Se tracta d'una cinta con a-saber-los de premios y nominacions, en destacando un Premio Oscar a lo Millor Guión Orichinal y atras seis nominacions (incluyida a l'Oscar a la Millor Cinta) en a 67^ena edición d'os Premios Oscar y un Globo d'Oro a lo Millor Guión y cuatre nomincions (Millor Cinta Dramatica, Millor Actor Dramatico, Millor Director y Millor Actriz Segundaria) en a suya 53^ena edición..