Polinización

Iste articlo ye escrito con as normas graficas EFA. Si quiers, puez aduyar cambiando a la grafía oficial de Biquipedia y sacando dimpués ista plantilla.

A polinización ye o paso d'un gran de polen dende un saco polinico dica una part d'a flor feminina on pueda cherminar y desembolicar o tubo polinico, que puet estar o micropilo en as chimnospermas y o estigma en as anchiospermas.

Quan se sobate una rameta de pin en primavera se veye como sale o polen d'as flors masculinas.

Seguntes o medio fisico por on viache o polen u medio biolochico lo carreye se distiguen diferents clases de polinización. Si ye l'aire a polinizacion ye anemofila present en muitas plantas, por eixemplo as coniferas. Si son os insectos a polinización ye entomofilas, y tamién bi ha muixons y reptils que carreyan pasivament polen. A polinización por medio de l'agua ye excepcional, y tampoco no ye cheneral en as plantas aquaticas.

Polinización anemofila

A polinización anemofila ye muito pasiva, a planta ha de producir grans cantidatz de polen pa asegurar que uns pocos grans de polen arriben en un estigma d'una traza pasiva.

Os polens ixemenaus por o viento pueden viachar centenars de kilometros, sedimentan en as paúls y estanyos, fosilizan y permiten reconstruir as condicions climaticas y ecolochicas de tiempos pasaus. Vientos como o cierzo pueden levar o polen de ciertas especies por tota a val d'Ebro.

Os polens d'especies anemofilas son alergochens porque una vegada presents en a mucosa nasal cherminan y emiten un tubo polinico que obliga a intervenir a lo sistema inmunolochico, y quan a reacción ye exacherada ye una alerchia. As abellas destacan como insectos polinizadors.

Polinización entomofila

A polinización con insectos ye mes complicada que a polinización anemofila pero mes efectiva, y leva os grans de polen a flors d'a mesma especie. As plantas con flors presentan unas olors agradables, unas colors envistables y sustancias nutritivas pa atrayer a los insectos. O polen empastra determinadas partz d'o insecto, por eixemplo os pelos d'o torax, y o insecto levará grans de polen a atras flors.