Murder by Numbers
Murder by Numbers (títol orichinal en anglés, en aragonés Asasinato por numeros; enguerada en Aragón con o títol en castellano de Asesinato...1-2-3, Asasinato...1-2-3 en aragonés) ye una cinta de cine estausunidense d'intriga policiaca de l'anyo 2002 dirichida por Barbet Schroeder seguntes un guión orichinal de Tony Gayton y producida por Richard Crystal, Barbet Schroeder y Susan Hoffman (l'actriz protagonista, Sandra Bullock, tamién n'estió productora executiva) ta las productoras Castle Rock Entertainment y Schroeder/Hoffman Productions. La dirección de fotografía d'a cinta ye de Luciano Tovoli, con una Banda Sonora Orichinal de Clint Mansell y los actors principals d'a cinta son Sandra Bullock, Ryan Gosling, Michael Pitt, Agnes Bruckner, Chris Penn, R. D. Call y Ben Chaplin, entre d'atros.
A cinta se basa en un caso real, o caso Leopold y Loeb, escaiciu en Chicago en 1924, cuan Nathan Freudenthal Leopold Jr. y Richard Albert Loeb, dos estudiants acabalaus d'a Universidat de Chicago, secuestroron y asasinoron a Bobby Franks, de 14 anyadas, nomás que ta poder amostrar o suyo intelecto superior, un caso que ha inspirau obras de cine, de teatro, de televisión y de literatura.
Murder by Numbers se prochectó en mayo de 2002 en a 55ena edición d'o Festival de Cine de Canas, pero no dentraba en a competición.[2]
Argumento
editarA detective Cassie Mayweather y lo suyo nuevo companyero Sam Kennedy plegan en una escena d'un crimen a on han trobau lo cadavre d'una muller. En abanzar a investigación, Cassie y Sam prencipian una relación, pero Cassie amuestra estar bien rezelosa d'una relación seria y li marca distancias, como consecuencia d'os malos tractos y intento d'asasinato que padeixió d'a suya primera parella, uns feitos d'o suyo pasau que quiere amagar. As prebas d'o caso parixen implicar a Ray Feathers, o conserche d'un instituto que amás vende drogas a los alumnos. Cuan son de momentos de detener-lo, aparixe aparentment suicidau, pero en realidat ha estau asasinau por Richard Haywood, comprador habitual d'a droga que vendía Ray. Richard tien una estranya relación d'amistat y odio con Justin Pendleton, estando toz dos brilants alumnos de l'instituto.
Cassie y Sam troban en a escena d'o crimen vomeco y, en analizar-lo en o laboratorio, troban que contiene trazas que los adrezan enta Justin, pero lo chefe d'os detectives considera que lo caso ye zarrau con a muerte de Ray, l'aparent culpable d'o crimen. Tanimientres, Cassie no se'n conforma y lo suyo treballo va acumulando prebas que amuestran la culpabilidat de Richard y Justin, encara que parixe que l'inductor y principal culpable ye Richard. Richard cita a Justin en una casa en a placha y Cassie, cuan lo sabe, marcha tamién enta ixe puesto.
| Actor | Papel | Notas |
|---|---|---|
| Sandra Bullock | Cassie Mayweather | |
| Ben Chaplin | Sam Kennedy | |
| Ryan Gosling | Richard Haywood | |
| Michael Pitt | Justin Pendleton | |
| Agnes Bruckner | Lisa Mills | |
| Chris Penn | Ray | |
| R.D. Call | Capitán Rod Cody | |
| Tom Verica | Al Swanson | |
| Janni Brenn | Ms. Elder | |
| John Vickery | Cherent d'o restaurant | |
| Michael Canavan | Mr. Chechi | |
| Krista Carpenter | Olivia Lake | |
| Neal Matarazzo | Oficial (en o "flashback") | |
| Adilah Barnes | Técnico d'o laboratorio | |
| Jim Jansen | Avogau | |
| Paula Scarpino | Oficial (en o "flashback") | |
| Brian Stepanek | Marshall d'a Chunta de Libertat Condicional | |
| Sharon Madden | Enfermera | |
| John Doolittle | Tecnico de huellas dactilars | |
| Dennis Cockrum | Criminalista | |
| Eric Saiet | Criminalista | |
| Nancy Osborne | Mai de Richard | |
| Ralph Seymour | Paramedico | |
| Christine Healy | Mai de Justin | |
| Nick Offerman | Policía en casa de Richard | |
| Todd Leatherbury | Policía en a primera escena d'o crimen | |
| Jason Flowers | Estudiant | No acreditau |
| JR Garcia | Choven | No acreditau |
| Melissa Greenfield | Estudiant | No acreditada |
| Michael Samluk | Carl Hudson | No acreditau |
| Valentin Siroon | Enfermera | No acreditada |
| Dave Thompson | Hombre d'o cigarret | No acreditau |
| Emily Young | Estudiant preocupada | No acreditada |
Producción
editarInspiración
editarTa lo guión orichinal d'a cinta, Tony Gayton se basó en un caso real, o caso Leopold y Loeb, escaiciu en Chicago en 1924, cuan Nathan Freudenthal Leopold Jr. y Richard Albert Loeb, dos estudiants acabalaus d'a Universidat de Chicago, secuestroron y asasinoron a Bobby Franks, de 14 anyadas, nomás que ta poder amostrar o suyo intelecto superior, un caso que ha inspirau bellas atras obras de cine, de teatro, de televisión y de literatura. Loeb, que teneba 18 anyadas cuan cometioron l'asasinato, yera fillo d'un vicepresident de Sears y yera un aficionau fanatico d'as novelas policiacas. Leopold teneba 19 anyadas y ya yera en ixas envueltas un reconoixiu ornitologo. Tanimientres, a productora Susan Hoffman declaró posteriorment que la suya inspiración heba estau mas amanada en o tiempo: d'una man a novela In Cold Blood, de Truman Capote, y d'atra man un asasinato de l'anyo 2000 en que dos chóvens heban asasinau a dos profesors universitarios nomás que ta experimentar ixa emoción.[4]
Casting
editarBarbet Schroeder declaró que "yera entusiasmau en ufrir a Sandra Bullock un papel que revivise la tradición d'as damas duras y complexas d'os anyos 1940'". L'actriz, qui cobró 15 millons de dólars por a suya participación, sinyaló que "ye un d'ixos escasos papels que pagan a pena. La cinta tien una complexidat que no poseyen a mayor parte d'os guions que me ninvía lo mío achent". O director iraní afirmó que lo que li atrayó d'a historia estió que "son dos mocez de familia rica, que lo tienen absolutament todo y que tanimientres sienten a necesidat de matar, de fer danyo, i ixo planteya una inquietant incognita sobre la naturaleza humana y encara mas sobre las cheneracions chóvens, saturadas d'ocio y sin problemas reals a que entringuillar-se".[5]
Ryan Gosling y Michael Pitt interpretan a los chóvens asasins. Gosling dició que "l'uno tien a bala y l'atro la pistola. Por separau no son periglosos pero cuan s'achuntan en una cambra y paran cuenta de que l'uno posee ixo que li falta a l'atro, la combinación ye explosiva".[5] Pitt niega que bi haiga atracción sexual entre éls; "no creigo que ixo que bi ha entre éls sía sexual, ye millor un fuerte magnetismo, una compenetración brutal", deciba.[5] Sandra Bullock, qui tamién en ye productora executiva, se mostró satisfeita con o resultado. "Ye lo que querebamos, una cinta entretenida con trasfondo social. O mío treballo como productora nomás consistió que en escullir un director adecuau y asegurar-me de que o guion se desembolicase en todo lo suyo potencial".[5]
Rodache
editarEl rodaje escomencipió o 27 de febrero y s'estendilló dica lo 21 de mayo de 2001, en as localidaz californianas d'Altadena, Los Angeles, Los Osos, Morro Bay y San Luis Obispo. La casa en a ralla se debantó expresament construyida ta la cinta y l'espaldoron en rematar o rodache. As escenas que s'escayecen en a escuela teneban que filmar-se en l'instituto d'a localidat de San Luis Obispo, pero lo director d'o centro escolar cambeó d'opinión en conoixer o conteniu d'o guión y tenioron que buscar un puesto alternativo.
Premios
editar| Premio | Calendata | Edición | Categoría | Premiau | Notas |
|---|---|---|---|---|---|
| Premios de l'Asociación de Criticos de Cine de Chicago[6] | 2003 | 15ena edición | Nominau a lo Premio CFCA a lo Millor Actor Promesa | Ryan Gosling | |
| Premios Young Artist[7] | 2003 | 24ena edición | Nominada a lo Premio Young Artist a la Millor Actriz Segundaria Choven | Agnes Bruckner |
Criticas
editarLa critica ye dispar y bien luent d'a unanimidat, habendo criticas prou favorables pero tamién criticas negativas y mesmo criticas que combinan aspectos positivos con negativos.
Asinas, Lisa Schwarzbaum en Entertainment Weekly califica Murder by Numbers como "mediocre".[8] Mark Caro, en o Chicago Tribune, afirmó o 20 de chulio de 2002 que "l'argumento de Murder by Numbers puet estar familiar pero lo director y Bullock fan un buen treballo en omplir-lo de color". Moira MacDonald escribió en o Seattle Times que "no bi ha maltreballo en Murder by Numbers, nomás s'escayece que ya hemos visto tot ixo d'antes mas".[9] Omar Khan en Cinemanía deciba que "no parixe tener mas pretensions que d'entretener a novios aborrius una tardada de domingo".[10]
Mike LaSalle, en o San Francisco Chronicle, deciba que:[11]
Israel Paredes en Sensacine diz que:[12]:
Enrique Colmena en Criticalia.com diz que:[13]
Se veiga tamién
editarReferencias
editar- ↑ (en) Enguero de Murder by Numbers en Internet Movie Database.
- ↑ (en) / (es) / (fr) / (zh) Murder by Numbers en a web oficial d'o Festival de Cine de Canas.
- ↑ (en) Murder by Numbers en Internet Movie Database.
- ↑ (es) Javier Ocaña: Asesinato... 1, 2, 3, en a revista Cinemanía, numero 102.
- ↑ 5,0 5,1 5,2 5,3 (es) Juan Moreno: Asesinato... 1-2-3 en Fotogramas, setiembre de 2002.
- ↑ (en) Ganadors y nominaus d'os Premios de l'Asociación de Criticos de Cine de Chicago 2003 en a pachina web d'Internet Movie Database.
- ↑ (en) Ganadors y nominaus d'os Premios Young Artist 2003 en a pachina web d'Internet Movie Database.
- ↑ (en) Lisa Schwarzbaum: Murder by Numbers, en Entertainment Weekly, 17 d'abril de 2002.
- ↑ (en) Moira MacDonald: Murder by Numbers' is a thriller without the thrills, en o Seattle Times, 19 d'abril de 2002.
- ↑ (es) Omar Khan: Otro producto para que se luzca Sandra Bullock, en Cinemanía, setiembre de 2002.
- ↑ (en) Mike LaSalle: Bullock's dark journey / Characters carry murder mystery, en o San Francisco Chronicle, 19 d'abril de 2002.
- ↑ (es) Asesinato... 1-2-3. Crimen perfecto, en Sensacine
- ↑ (es) Enrique Colmena: Asesinato... 1-2-3 (Murder by numbers). El impulso criminal de la soga, en Criticalia.com.
Vinclos externos
editar- (en) Murder by Numbers en Internet Movie Database.
- (en) Web oficial de Murder by Numbers en a web de Warner Bros..
- (en) / (es) Murder by Numbers en FilmAffinity.
- (en) Murder by Numbers en Allcinema.
- (es) Murder by Numbers en Sensacine.
- (en) Murder by Numbers en Allmovie.
- (fr) Murder by Numbers en Allociné.
- (en) Murder by Numbers en Rotten Tomatoes.
- (en) Murder by Numbers en Box Office Mojo.
Datos: Q502182
