Miguel Salamero Buesa

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.
Miguel Salamero Buesa
Información personal
Calendata de naixencia 30 de setiembre de 1760
Puesto de naixencia Zaragoza
Calendata de muerte 8 de chinero de 1840
Puesto de muerte Zaragoza

Miguel Salamero Buesa (Zaragoza, 30 de setiembre de 1760 - Zaragoza, 8 de chinero de 1840) estió un vecín d'o barrio zaragozano de Sant Pavlo y un d'os heroicos esfensors d'a ciudat en os Setios de Zaragoza, escayecitos mientres a Guerra d'o Francés.

Ye naixito d'o barrio de Sant Felipe y pasó a suya nineza en iste barrio indo ta lo colechio d'as Escuelas Pías que yera amán d'a suya casa en a carrera de l'Albardería. A suya familia yera de clase meya, estando Miguel o mas chicot d'entre os dos chirmans y as dos chirmanas que teneban.

A familia se tresladó arredol de l'anyo 1780 ta lo popular barrio de Sant Pavlo. En 1787 Miguel se casó con Rafaela Zaro, una choven de Borcha y se instaloron en a carrera Cedacería 31, dica l'anyo 1791 cuan se tresladoron ta la carrera de Sant Pavlo nº 180. Tenioron seis fillos Barbara, Agustina, Isidoro, Miguel, Antonia y Luisa. Salamero treballaba, chunto a bels vint treballadors que teneba, en o suyo propio taller en o callizo d'a China a on que feban damascos y tafetans.

O 6 de setiembre de 1801 morío por una malautía Rafaela, a muller de Miguel, y en os anyos siguients morioron tamién os suyos fillos Luisa, Miguel y Isidoro. Siet anyatas dimpués cuan esclató a Guerra d'o Francés Miguel, que teneba 47 anyos, equipó a los suyos treballadors ta formar un grupo d'escopetaires que s'enfrentasen a los invasors d'a ciudat. Participoron en os dos setios de Zaragoza, destacando prencipalment as accions d'o día 4 d'agosto, cuan os franceses heban dentrato a la ciudat por una breca que heban ubierto en a Torre del Pino. Salamero esfendió con os suyos hombres a huerta y convento de Santa Fe, de gran importancia estratechica, de traza que os franceses no podioron abanzar por iste sector de l'Arco de Sant Roque. Tamién aduyoron en ista zona Mosén Santiago Sas y os suyos hombres que luitoron en os conventos de Santa Rosa y Sant Ildefonso. Estió lo mesmo Sas qui en una carta a lo Cheneral Palafox recontó lo heroismo de Miguel Salamero en iste día, demandando ta él o Escudo de Destinción por istos feitos.

Palafox reconoixió as accions militars de Miguel Salamero en os setios de Zaragoza dando-le o Escudo d'Esfensor d'o Primer y o Segundo Setio amás d'o Escudo de Destinción.

Miguel morió chunto a la suya filla Bárbara o día 8 de chinero de 1840 con a edat de ueitanta anyos.

L'antiga huerta de Santa Fe que esfendió Miguel en a guerra s'ha convertito en hue en una plaza zaragozana con o nombre de Plaza de Miguel Salamero.

Referencias editar