Medios de producción

Iste articlo ye escrito con as normas graficas EFA. Si quiers, puez aduyar cambiando a la grafía oficial de Biquipedia y sacando dimpués ista plantilla.

Os medios de producción (en alemán: Produktionsmittel) son, seguntes a teoría marxista, a conchunción d'os medios de treballo y os subchectos d'o treballo. Concretament ixo incluye maquinas, ferramientas, a tierra, as materias primas, as unidatz de producción de biens (fabricas) y en cheneral tot ixo que medía entre o treballo humán en l'acto de transformación d'a naturaleza y a naturaleza mesma.

Desembolique conceptual

O termin ye construito por Karl Marx qui explicitament lo diferencia d'o capital. Seguntes Marx, os medios de producción son os trastes y materials d'o treballo independientment d'o modo de producción y d'apropiación d'a ganancia. Nomás se convierten en capital dentro de relacions de producción particulars: quan os mesmos participan en o proceso d'explotación ta lograr plusvalor (ye decir, quan sirven, a la vegata, como medios d'explotación y de sochuzgamiento d'o treballador). Dentro d'os medios de producción existe a siguient esferenciación:

Medios de producción dreitos: Intervienen dreitament en o proceso productivo, estando a producción o resultato obtenito d'o conchunto formato por:

• Os operarios.
• O material.
• A maquinaria.

Medios auxiliars de producción: No intervienen dreitament en o proceso productivo, encara que sin ells o proceso no se puet fer. Os mas importants son os siguients:

• Servicios chenerals
• Puestos de treballo
• Almacens de materias primas

A propiedat d'os medios de producción, seguntes a teoría marxista, determina a posición dominant d'a burguesía en o modo de producción capitalista. A dictadura d'o proletariato puet definir-se por a expropiación d'istos medios de producción, que serían obchecto d'una apropiación por o proletariato que d'ista traza adubiría a suya emancipación. Seguntes distintas modalidatz d'o socialismo, en a etapa socialista os medios de producción serán chestionatos por o Estato (por eixemplo, en l'antiga Unión Sovietica) u por medio de l'autochestión d'os mesmos treballadors (por eixemplo, en l'antiga Yugoslavia). Baixo o capitalismo, os medios de producción son propiedat privata d'o capitalista, ye decir, un medio ta explotar o treballo asalariato. Os treballadors no poseyen istos medios y asinas restan obligatos a vender a suya fuerza de treballo y a creyar asinas una plusvalía, a quala ye apropiata por o capitalista.