Guerra ruso-chaponesa
|
Un u más biquipedistas son treballando actualment enamplando iste articlo. Puede estar que, por ixo, bi haiga lagunas de conteniu u deficiencias de formato. Por favor, antis de realizar correccions mayors u reescrituras, contacte con éls en a suya pachina d'usuario u a pachina de discusión de l'articlo ta poder coordinar-ne la redacción. |
.svg){kind=small}
.svg){kind=small}
A guerra ruso-chaponesa estió una guerra escaicida entre l'8 de febrero de 1904 y lo 5 de setiembre de 1905 entre l'Imperio Ruso y l'Imperio Chaponés a on as suyas batallas s'escaicioron en Corea y Manchuria (batallas terrestres) y la mar Amariella (batallas navals). A guerra remató con o tractau de Portsmouth por o cual l'Imperio Ruso acceptaba la suya redota y acceptaba igualment la cesión de bels territorios en China (mas que mas a peninsula de Liaodong con Port Arthur y Dalian, amás de ceder a Chapón o ferrocarril de Manchuria, y ceder igualment a metat sud d'a isla de Sakhalin.
A causa immediata d'a guerra estió la colisión entre dos expansions de signo nacionalista, la d'o nacionalismo ruso y la d'o nacionalismo chaponés, en tener todas dos intrés en a expansión territorial d'os suyos dos países respectivos en Manchuria y Corea, a on en 1897 s'heba proclamau l'Imperio Coreano. Ta l'Imperio Ruso yera imprescindible contar con un puerto en a mar ibre de chelo tot l'anyo en estar lo puerto de Vladivostok chelau parte de l'anyo, dixando asinas inoperativa la flota rusa de l'oceano Pacifico, y ta ixo amenistaba expandir lo suyo territorio enta lo sud a traviés de Manchuria a la vegada que controlaba Port Arthur (que li heba arrendau China en 1894) y toda la peninsula de Liaodong a on iste puerto se troba. A la vegada, ta l'Imperio Chaponés a peninsula de Corea yera obchectivo fundamental en a suya expansión, en estar situau a l'atro canto de l'estreito de Tsushima y en estar o primer trango, chunto con a isla de Formosa, ta la expansión enta China, que yera libre de presencias colonials europeas y a on l'imperialismo chaponés pensaba que yera factible la suya ocupación.
En considerar que la expansión rusa enta lo Pacifico estaría una menaza ta Chapón, iste país ufrió a l'Imperio Ruso reconoixer lo suyo dominio en Manchuria siempre que como contrapartida los rusos reconoixesen a l'Imperio Chaponés lo suyo control sobre l'Imperio Coreano y la peninsula de Corea. Tanimientres, Rusia, en considerar que podeba redotar con facilidat a l'exercito chaponés, desichió la creyación d'una zona neutral en Corea a lo norte d'o paralelo 39 norte, considerando Chapón que ixo yera inacceptable en fer imposible la suya expansión enta China y que la conversacions heban fracasau fendo inevitable la guerra.
L'Armada Imperial Chaponesa estió a lo cudiau d'ubrir as hostiidaz, con un ataque sin declaración de guerra contra la flota rusa d'Extremo Orient, ancorada en a base naval rusa de Port Arthur, o 9 de febrero de 1904.
As operacions militars estioron bien marcadas por o feito de trobar-se lo teatro d'operacions bien amán d'un d'os combatents, l'Imperio Chaponés, pero bien luent d'o centro de l'Imperio Ruso a on se trobaban los suyos centros de poder, la part fundamental d'o suyo exercito y las suyas bases de subministros, que heban d'estar tresladaus enta lo teatro d'operacions a traviés d'una luenga linia de comunicacions con un ferrocarril con una sola vía, lo ferrocarril Transiberiano. Ta las batallas navals, la distancia entre las flotas rusas d'Europa y d'o Pacifico yeran chustament de medio mundo, camín que tenió que recorrer a flota rusa.
Cuan se fació evident a redota rusa, Nicolau II de Rusia acceptó la mediación d'o president d'os Estaus Unius, Theodore Roosevelt, acción que concluyó con a sinyatura d'o tractau de Portsmouth o 5 de setiembre de 1905.
A redota rusa tenió importants consecuencias en toz dos países: en l'Imperio Ruso lo descontento provocó la revolución rusa de 1905, antecedent d'a revolución rusa de 1917, y en Chapón a victoria fomentó d'una man o nacionalismo chaponés en ubrir a puerta a la colonización de Corea y a la suya intervención en China, y d'atra man provocó la frustración d'ixe mesmo nacionalismo en considerar que a tamas d'a suya gran victoria los países d'Europa y los Estaus Unius heban maniobrau ta evitar que Chapón obtenese mas fruitos d'a suya victoria. Tamién influyó en a percepción que dica l'inte teneba lo mundo occidental sobre las capacidaz militars y politicas de Chapón, que dende alabez se consideró como un nuevo actor d'a escena politica internacional, encara que continó parcialment la visión negativa qie consideraba a Chapón como un país subdesenrollau.
Antecedents
editarModernización de Chapón
editar
.jpg)
Dimpués d'a Restauración Meichi en 1868, lo Gubierno chaponés se dixó la pelleta ta asimilar as ideas, os abances tecnolochicos y mesmo las formas de fer a guerra d'os países occidentals, contractando a asesors de toz os países ta que aduyasen a la labor de modenización. Consecuentment, a finals d'o sieglo XIX Chapón s'heba convertiu en un estau industrializau y prou moderno. Los chaponeses quereban estar reconoixius como iguals a las potencias occidentals y la Restauración Meichi teneba como obchectivo fundamental convertir a lo país en un estau moderno (encara que ixo no signifcase la suya occidentalización) y a la vegada transformar a ixe moderno Chapón en una potencia imperialista que buscase la suya expansión por territorios foranos, mas que mas en Corea y China.[1]
En zaguerías d'os anyos 1860 y primerías d'os anyos 1870 a cuestión d'o seikanron ("argumento d'a conquiesta de Corea) heba dividiu a la clase dirichent chaponesa: uns yeran partidarios de conquerir Corea immediatament y d'atros pensaban que yera millor fer tiempo dica que Chapón estase más desenrrollau antis de prencipiar una guerra de conquiesta; pero todas dos faccions teneban clarament a vocación de conquerir o país: garra miembro d'a clase dirichent chaponesa no consideró mai la ideya d'acceptar que los coreanos tenesen dreito a la suya independencia y nomás que la cuestión d'o momento de fer efectiva la conquiesta deseparaba a los dos grupos.[2] Mesmo que los europeus feban servir a excusa d'o presunto atraso d'os territorios africanos y asiaticos ta colonizar-los, ta la clase dirichent nipona yera evident que mesmo Corea que China yeran dos nacions atrasadas y en consecuencia lo Chapón teneba tot o dreito d'o mundo a invardir-las, conquerir-las y colonizar-las.[3]
En 1887, o "kazoku" Inoue Kaoru, ministro d'Asuntos Foranos de Chapón, pronunció un discurso a on afirmaba que ixo que mos cal fer ye transformar o nuestro imperio y la nuestra chent, fer que l'imperio sía mesmo que los países d'Europa y a nuestra chent como la chent d'Europa, ta continar decindo que los chuneses y los coreanos han perdiu esencialment o suyo dreito a estar independients en no modernizar-se.[3] Muita d'a presión ta que Chapón practicase una politica exterior muit agresiva no proveniba d'a clase dirichent so que de sectors d'o Jiyū Minken Undō (Movimiento la la Libertat y los Dreitos d'o Pueblo) que demanaban un Parlamento formau como resultau d'unas eleccions y que tamién yeran partidarios d'un ultranacionalismo expansivo que paraba cudiau que los chaponeses teneban o dreito d'anexionar-se Corea, mas que mas porque los partidarios d'iste movimiento politico yeran los mesmos que anyos enta zaga, en 1869-1873, yeran partidarios d'a invasión immediata de Corea.[3]
Como parte d'o proceso de modernización d'o Chapón, as teorías d'o darwinismo social sobre la supervivencia d'o mas apto estioron comuns dende los anyos 1880 y muitos chaponeses chemecaban por os elevaus impuestos que lo Gubierno recaudaba ta financiar a modernización d'o país y desichiban bella cosa tanchible, como por eixemplo una colonia, que producise recursos ta minorar a suya carga impositiva.[4]
D'atra man, o sistema educativo imposau por o Gubierno Meichi feba fincapiet en entrenar a los alumnos ta que cuan creixesen estasen buens soldaus y, en consecuencia, as escuelas chaponesas educaban a los suyos alumnos en o Bushido (o camín d'o guerrero), o codigo d'os samurais.[3] Por consiguient, en haber entrenau a toda una cheneración de chóvens en o Bushido, la elite Meichi se trobaba con una población que desichiba la guerra y que consideraba a la diplomacia como una debilidat.[3]
A presión popular en Chapón
editarRichard Storry, profesor d'Estudios Chaponeses d'a Universidat d'Oxford, diz que la mayor error d'os occidentals sobre Chapón ye considerar que lo pueblo chaponés yerfa un instrumento docil en mans d'as elites d'o país, cuan en realidat a presión ta una politica de belicherancia de Chapón entre 1894 y 1941 proveniba d'a chent común, que desichiba una politica exterior "dura" y teneba tendencia a partecipar en disturbios y mesmo asasinatos cuan se consideraba que la politica exterior yera entrecullida.[3]
Encara que la oligarquía Meichi yera refractaria a permitir una democracia liberal sí que acceptaba d'apropiar-se de bellas ideas d'o Jiyū Minken Undō y finalment acceptoron establir una Dieta Imperial electa en 1890, encara que con poders bien limitaus y tamién con unos dreitos de sufrachio bien limitaus, amás d'acceptar igualment adoptar una politica exterior mas agresiva respective de Corea.[3]
En 1884 Chapón heba alentau un golpe d'estau en o Reino de Corea a mans d'una facción modernizadora simpatizant de Chapón y, como consecuencia, lo Gubierno coreano demandó aduya a China. Asinas, tropas chaponesas y tropas chinesas s'entrincoron en Seúl.[5] Tanimientres, en ixe inte Chapón no se sentiba prou preparau ta arrisgar una guerra con China y acceptó un pacto en a Convención de Tientsin que, encara que dixaba a Corea aintro d'a esfera d'influyencia chinesa, atorgaba a Chapón bel dreito a intervenir-ie.[5] La prencipal consecuencia de l'acuerdo estió que mientres os anyos 1880 y primerías d'os anyos 1890 lo Gubierno chaponés recibió constants criticas en no haber estau prou agresivo en a cuestión coreana, lo que fa decir a l'historiador chaponés Masao Maruyama que:
Referencias
editarBibliografía
editar- (en) Richard Storry: Japan and the Decline of the West in Asia, 1894–1943. New York City, St. Martins' Press, 1979. ISBN 978-033306868-7.
Vinclos externos
editar
Se veigan as imáchens de Commons sobre Guerra ruso-chaponesa.
Datos: Q159950- Multimedia: Russo-Japanese War / Q159950
