Fuent Pudia (paúl de Pedrola)

(Reendrezau dende Fuent Pudia (Pedrola))
Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.
Este articlo tracta sobre la paúl de Fuent Pudia situada en Pedrola. Pa atros emplegos de Fuent Pudia se veiga Fuent Pudia (desambigación).

A Fuent Pudia (transcrito como Fuempudia en a cartografía oficial) ye una chicorrona paúl que se troba en a val d'el Bayo (en o termin municipal de Pedrola).

Situada a uns 330 metros d'altaria y tien una superficie de 0.84 hectarias.[1] Sirve de refuchio a cuantas especies de fauna en una zona d'entorno estepario.

Antis mas bi heba una pardina, actualment deshabitada, an treballaban obrers d'os duques de Villafermosa. En 1930 viviban astí siet personas.[2]

En a suya redolada bi hai cuantos naixeders, denominaus "minas de Fuempudia", que dan orichen a la paúl y que dica la construcción d'a Canal Imperial d'Aragón yeran a prencipal fuent de suministro d'augua pa Pedrola.

Toponimia editar

L'hidronimo fuent Pudia presenta un segundo formant que deriva d'o latín PUTIDA, adchectivo feito a partir d'o verbo latino PUTĒRE con o sufixo latino -IDA. Lo verbo PUTĒRE orichinó "pudir" en aragonés cheneral y "putir" en aragonés central. La terminación -ia como derivación d'o sufixo -IDA presenta una evolución comparable a la terminación -io que trobamos en embefio, fastio, limpio, nedio y rancio a partir de -IDUS. En Asín de Broto se documenta d'acuerdo con la fonetica de l'aragonés central lo microtoponimo Fuendeputia,[3] pero la variant pudia yera d'emplego regular en aragonés medieval, igual como en as etapas medievals d'o leyonés y lo castellano. En a provincia de Palencia bi ha un municipio dito Ampudia que apareixe en a documentación medieval como Fuent Pudia entre atras formas.

Se fa mención d'a paúl de Fuent Pudia de Pedrola en a carta de población atorgada por lo monesterio de Veruela a los habitadors de Pozuelo d'Aragón (1245).

ço es de la font de Cardet entro a la font Pudia, e de las vertientes de las pennas de Magallon entro al forcallo de Paretes Ruvias, assí como fo determinado por mandamiento del sennor rey don Alfonso,...

Referencias editar

  1. (es) F.Larraz, J.Albisu, A.Gros: Plan General de Ordenación Urbana de Pedrola. Memoria descriptiva, 2012, p.14.
  2. (es) Catálogo de pueblos y municipios de Aragón. Estadística de población y nomenclaturas toponímicas entre 1900 y 2004, Gubierno d'Aragón, 2005, ISBN 84-7753-366-0, p.213
  3. (es) María Pilar Fuertes Casaus, María Isabel Allué Navarro: Nombres para un paisaje. Toponimia del Valle de Broto Editau por las propias autoras, 2006. p. 25.