Félix Lambán
|
Iste articlo ye escrito con as normas graficas EFA. Si quiers, puez aduyar cambiando a la grafía oficial de Biquipedia y sacando dimpués ista plantilla. |
| Félix Lambán Ventura | ||
|---|---|---|
| Información personal | ||
| Naixencia | 1925 Exeya d'os Caballers (Cinco Villas, Aragón)
| |
| Muerte | 3 de chulio de 2013 | |
| Embote | El León de Ejea y El Estrangulador | |
| Esporte | Luita libre | |
| Profesional en | 1948 | |
| Retirata | 1974 | |
Félix Lambán Ventura naixito d'Exeya d'os Caballers, Cinco Villas, en 1925 y muerto o 3 de chulio de 2013, fue un luitador de luita libre aragonés, que fue campión d'o mundo.[1]
Encomenzó a suya afición d'a luita libre en a bodega Mariano Murillo en a carrera d'a Concordia d'Exeya, a on uns amigos facioron un ring con quatre barrils unitos con sogas, en iste puesto tamién principiaron a practicar luita o suyo chirmán Emilio, Antonio Posa y Antonio Morlans entre d'atros. Fació o servicio militar en Zaragoza y allí entrenaba en o Chimnasio Zaragoza, d'a calle Predicadores, en 1948 se federó en a Federación Aragonesa de Luita de nueva creación. O suyo primer combate fue o 21 de febrero de 1948 en o trinquet d'o Cinema Zaragoza, y ganó, rapedament principió a ser un luitador popular y habitual d'os millors combates de Zaragoza celebratos en o frontón Jai Alai y en a plaza de toros d'a Misericordia. En primeras de 1949 bi heba partecipato en 96 combates y yera campión de Aragón, mientres os siguients anyos aconsiguió o títol de Campión d'Espanya (1950 y 1952), de Europa (1952) y d'o Mundo en 1954 luitando contra l'hungaro Stan Koroly en a Sala Price de Barcelona, títols que esfendió con exito qualques vegatas y facioron que prencipiara a luitar en dimfuera d'Espanya. Chunto a o luitador espanyol Eduardo Castillo luitó en a modalidat d'exhibición d'o catch a quatre a on luitan d'os parellas de luitadors y facioron muitas actuacions en Estaus Unius con a embotada de Los Godos.[2]