Cafetería

Una cafetería, u simplement un café, ye un establimiento que sirve sobretot café de quantos tipos, per eixemplo espresso, café con leit y capuccino. Qualques cafeterías pueden servir bebidas fredas, como café chelau, té chelau y atras bebidas sin cafeína. En Europa continental, os cafés sirven tamién bebidas alcoolicas. Una cafetería tamién puede servir virolla, como refricherios liuchers, entropans, panets, fruitas u pastels. As cafeterías van dende chicotas interpresas operadas per os suyos propietarios dica grans corporacions multinacionals. Qualques cadenas de cafeterías operan con un modelo comercial de franquicia, con numbrosas sucursals en quantos países d'o mundo.

O desapareixiu Gran café en a carrera Alfonso de Zaragoza.

Dende un punto d'envista cultural, as cafeterías sirven en gran medida como centros d'interacción social: una cafetería ofreix a los suyos clients un puesto pa reunir-se, charrar, leyer, escribir, entretener-se u pasar o tiempo, ya sía individualment u en chicotz grupos. Dende a popularización d'o Wi-Fi, as cafeterías con ista capacidat tamién s'han convertiu en puestos pa que os clients accedan a Internet en os ordinadors portatils y tabletas. Una cafetería puede servir como un club informal pa os suyos miembros regulars.

Historia

Os primers cafés d'o mundo islamico, qahveh khaneh ("casa de café" en persa), amaneixioron en Domás. Istos cafés otomans tamién amaneixioron en A Meca, en a Peninsula arabica en o sieglo XV, y dimpués s'extendioron a la capital de l'Imperio Otomán, Istambul, en o sieglo XVI.

Scena en un café per o pintor hongaro Artúr Lajos Halmi.

En o sieglo XVII, o café amaneixió per primera vegada en Europa difuera de l'Imperio Otomán y s'establioron cafeterías que luego se fazioron cada vegada mas populars. Se diz que os primers cafés amaneixioron en 1632 en Livorno per un comerciant chodigo , u mas tardi en 1640, en Venecia. En os sieglos XIX y XX en Europa, os cafés yeran a ormino puestos de trobada pa escritors y artistas.