A Meca

A Meca (en arabe Makka (مكة المكرمة, Makka al-Mukkarama) ye una ciudat d'Arabia Saudí situata a l'ueste d'a peninsula arabica, en a rechión d'Hichaz, una d'as más importants d'ista peninsula. Ye a capital d'a provincia d'A Meca. D'antis más yera dita Makoraba.

A Meca مكة المكرمة
Localidat d'Arabia Saudí
Anvista d'A Meca en 1910.
Estau  • Provincia	Arabia Saudí A Meca (capital)
Superficie	26 km²
Población  • Total	1675368 hab. (2004)
Altaria  • Meyana	277 m.
Alcalde	Khalid bin Faisal Al Saud
Chentilicio	Mequí
A Meca A Meca en Arabia Saudí
Web oficial

A suya población ye de 1.294.168 habitants (2004) en una superficie de 26 km², con una densidat de población de 49.775,69 hab/km².

En ista ciudat naixió Mahoma y ye amás important ciudat santa d'o Islam, estando o cinqueno pilar d'o islam o Hach u pelegrinación t'A Meca.

Historia

A primera vegata que A Meca ye mencionata ye con o nombre de Makoraba en o sieglo II, en un texto de Claudio Ptolomeu.

A Meca yera una ciudat santa antis de Mahoma, y o suyo lugar mes important yera Al-Kaaba.

Cheografía

A Meca ye situata a 277 metros d'altaria dencima d'o ran d'a mar, a una distancia de 80 km d'a Mar Roya.

Toponimia

En os textos medievals aragoneses se gosa escribir Mecha (o digrafo ch n'estos casos representa o fonema /k/ u o fonema velar que a ortografia actual se representa por h) u Meca sin articlo:

Al tiempo que los godos passoron mar estonz se mouie Mahomath de Meca e fo predicant en Arabia e conuertie grant gent en so lei. Era dc.LX.II.

Et en tiempo de aquesti començó a predicar Mahomat la suya maluada secta en la tierra de Mecha, et en otras tierras de allende el mar, que agora son de moros.

Item la Cibdat de mecha / que los payanos claman Jatrib en do machomet jaze / Et assi enlos grandes desiertos de arabia ailli jaze el cuerpo deill muy honnorablement en vn templo que los moros llaman musket

O chentilicio s'escribiba mechi, ye dicir, "mequí".

Economía

A Kaaba.

A economía d'ista ciudat ye muit dependient d'a pelegrinación de purificación dita Hach. A ciudat ingresa mes de 100 millons de dolars cada anyo.

Puestos d'intrés

En A Meca estan as Torres Abraj Al Baita que ye l'edificio mas grande d'Arabia Saudí, a quarta estructura con mas altaria d'o mundo dimpués d'a Shanghai Tower, a Tokyo Skytree y el Burj Khalifa y l'estructura mas grande d'o mundo seguntes o suyo tamanyo por masa. Mugant a las torres ye a Mezquita Al-Haram a on orientan o suyo rezo os musulmans de tot o mundo, en o suyo interior ye a Kaaba.

• Pozo de Zamzam.
• Mina.
• Monte Arafat.

Bibliografía

• James Morris, The Hashemite Kings, Nueva York, 1959.
• F. Wüstenfeld, Die Chroniken der Stad Mekka, Gottinga, 1857-1861.

Veyer tamién

• Islam.

Vinclos externos

• Se veigan as imáchens de Commons sobre A Meca.
• Pachina web oficial municipal.