Edat Moderna

Se conoix en a sciencia d'a Historia con o nombre d'Edat Moderna a o periodo historico que abraca dende zaguers d'a Edat Meya dica o prencipios d'a Edat Contemporania, estando asinas o tercer periodo en a Historia d'a Humanidat dende o punto d'envista cronolochico. Se gosa considerar, seguntes bell historiador, que prencipia en 1453 con a cayita de Constantinoble en mans d'os Imperio otomán u en 1492 con a plegata en America de Cristofo Colombo, rematando en 1789 con a Revolución francesa. A branca d'a Historia que tien iste periodo como obchecto d'estudio ye dita Historia Moderna.

Ista división ye mas que mas basata en a cultura occidental y tien a ideya implicita d'una Edat Meya escuera que s'alazeta en l'oscurantismo por contraposición a una Edat "Moderna" a on as suyas valors son de modernitat, progreso y razón, reprenendo as valors de l'humanismo. Posteriorment, s'adhibió una quarta edat, a Edat Contemporania, a on a predominancia ye de dos fuerzas socials amaneixitas mientres a Edat Moderna, a burguesía y o capitalismo que ye o suyo corolario.

Antiparte, en una atra perspectiva, mientres a Edat Moderna ye quan America s'incorpora a o territorio d'a civilización occidental, mesmo que bella parti d'Asia y d'Africa que dica l'inte no teneban conexión, en una rota enta una civilización de traza global.